ភ្នំពេញ៖ រាជរដ្ឋាភិបាលកម្ពុជា ក្នុងកិច្ចប្រជុំពេញអង្គគណៈរដ្ឋមន្ត្រី ដែលធ្វើឡើងនៅវិមានសន្តិភាពក្នុងសប្ដាហ៍នេះ បានអនុម័តសេចក្តីព្រាងច្បាប់ថវិកាសម្រាប់ចំណាយក្នុងឆ្នាំ២០២៥ ប្រមាណ ៣៧ ៩៥០ ពាន់លានរៀល (៩,៣២ ពាន់លានដុល្លារ) ធ្លាក់ចុះពី ៣៨ ៨២៩ ពាន់លានរៀល (៩,៥៤ ពាន់លានដុល្លារ) ក្នុងឆ្នាំ២០២៤។

យោងតាមសេចក្តីព្រាងច្បាប់ថវិកាចំនួន ៦ជំពូក ក្នុងចំណោម១៥ មាត្រា ការចំណាយដែលបានគ្រោងទុកនៅឆ្នាំ២០២៥ គឺប្រមាណ ៣៧ ៩៥០,៣៨៥ លាន​រៀល (ប្រហែល៩,៣២ ពាន់លានដុល្លារ) ឬស្មើ ១៨,​១៤ ភាគរយនៃផលិតផលក្នុងស្រុកសរុប (ផ.ស.ស.) (GDP) របស់ប្រទេស ដែល​ក្នុង​នោះ​ចំណាយ​ចរន្ត ២៦ ០៥៤ ០១៩ លាន​រៀល និង​ចំណាយ​មូលធន ១១ ៨៩៦ ៣៦៦ លានរៀល ដើម្បីទ្រទ្រង់និរន្តរភាព​នៃកិច្ចប្រតិ​បត្តិការរបស់​ស្ថាប័នរដ្ឋ ជាពិសេស​ដើម្បី​សម្រេចឱ្យបានជាអតិបរមានូវគោលដៅ​ជាយុទ្ធសាស្ត្រទាំង៥ នៃយុទ្ធសាស្ត្រ​បញ្ចកោណ- ដំណាក់កាលទី១ របស់​រដ្ឋាភិបាលអាណត្តិទី៧។

សេចក្តីព្រាងច្បាប់ថវិកាឆ្នាំ២០២៥ ដែល​ត្រូវ​បាន​អនុម័ត​នៅក្នុង​កិច្ចប្រជុំពេញ​អង្គគណៈរដ្ឋមន្ត្រី​ក្រោមអធិបតីភាព​សម្តេចមហាបវរធិបតី ហ៊ុន ម៉ាណែត ថវិកាឆ្នាំ២០២៥នេះ នឹងដើរតួនាទីជាឧបករណ៍នយោបាយដ៏មានប្រសិទ្ធភាព និង​ស័ក្ដិសិទ្ធិ​ភាពរបស់រាជរដ្ឋាភិបាល ក្នុងការបន្តថែរក្សា ការពារ និងពង្រឹងសមិទ្ធផលសំខាន់ៗ ដែលកម្ពុជាទទួលបានកន្លងមក ក៏ដូចជាមូលដ្ឋានគ្រឹះសម្រាប់ការអភិវឌ្ឍន៍ប្រទេសជាតិបន្ថែមទៀត។

ផ្អែកលើការវាយតម្លៃរយៈពេលមធ្យមនៃក្របខ័ណ្ឌហិរញ្ញវត្ថុសាធារណៈ សេដ្ឋកិច្ចកម្ពុជាត្រូវបានគេព្យាករណ៍ថានឹងកើនឡើងក្នុងអត្រា ៦,៣ ភាគរយនៅឆ្នាំក្រោយ ជាមួយនឹងផលិតផលក្នុងស្រុកសរុបចំនួន ៥១ ៣៩៨ លានដុល្លារអាមេរិក ។

កំណើនសេដ្ឋកិច្ចដែលរំពឹងទុកត្រូវបានគាំទ្រដោយវិស័យសេដ្ឋកិច្ចសំខាន់ៗ រួមទាំងឧស្សាហកម្មដែលមានអត្រាកំណើន ៨,៦ ភាគរយ សេវាកម្ម ៥,៦ ភាគរយ និងកសិកម្ម ១,១ ភាគរយ និង អត្រាអតិផរណាត្រូវបានព្យាករ​ណ៍ថានឹងស្ថិតក្នុងរង្វង់ ២,៥ ភាគរយ។

សម្រាប់ច្បាប់ថវិកាសម្រាប់ឆ្នាំ២០២៤ បានចែងថា ការចំណាយលើផែនការរបស់រាជរដ្ឋាភិបាលមានចំនួន ៣៨ ៨២៩ពាន់លានរៀល ឬប្រមាណ ៩,៤ ពាន់លានដុល្លារអាមេរិក ដែលស្មើនឹង២៩,៨៧ ភាគរយនៃផលិតផលក្នុងស្រុកសរុប។

សេចក្តីព្រាងច្បាប់ថវិកាឆ្នាំ២០២៥ នឹងត្រូវដាក់ជូនរដ្ឋសភាពិនិត្យ និងអនុម័ត បន្ទាប់មកដាក់ជូនព្រឹទ្ធសភាដើម្បីពិនិត្យ និងអនុម័តជាចុងក្រោយមុននឹងថ្វាយជូនព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។

ការចំណាយថវិកាឆ្នាំ២០២៥ ត្រូវបានរៀបចំឡើងដើម្បីឆ្លើយតបនឹងតម្រូវការ និងអាទិភាពរបស់ក្រសួង ស្ថាប័ន ជាពិសេសការផ្សារភ្ជាប់ការងារប្រចាំថ្ងៃទៅនឹងគោលដៅគោលនយោបាយរបស់ក្រសួង ស្ថាប័ន ដែលនឹងចូលរួមចំណែកក្នុងការអនុវត្តគោលនយោបាយអាទិភាពរួមរបស់រដ្ឋាភិបាល រួមមាន ការកសាងសមត្ថភាពស្ថាប័ន ការអភិវឌ្ឍមូលធនមនុស្ស ការកសាង និងថែទាំហេដ្ឋារចនាសម្ព័ន្ធរូបវន្ត និងពិពិធកម្មសេដ្ឋកិច្ច។

សូមជម្រាបដែរថា ថវិកាឆ្នាំ២០២៥ត្រូវបានរៀបចំឡើងនៅក្នុងបរិបទដែលសេដ្ឋកិច្ចពិភពលោកស្ថិតនៅក្នុងភាពមិនច្បាស់លាស់ដោយសារការកើនឡើងនៃភាពតានតឹងភូមិសាស្ត្រនយោបាយ កំណើនសេដ្ឋកិច្ចពិភពលោកយឺត ជាពិសេសនៅក្នុងប្រទេសដែលជាដៃគូពាណិជ្ជកម្មសំខាន់ៗរបស់កម្ពុជា និងដើម្បីសម្រេចបាននូវរបៀបវារៈដែលបានកំណត់ក្នុងយុទ្ធសាស្ត្របញ្ចកោណដំណាក់កាលទី១របស់រដ្ឋាភិបាលអាណត្តិទី៧ ៕