ភ្នំពេញ ៖ ជាទូទៅ ស្ទើរគ្រប់យានយន្ត បញ្ហាប្រេងម៉ាស៊ីនជាចំណុចសំខាន់បំផុតដែលត្រូវតែថែទាំ ជាពិសេសនៅពេលបើកបរទៅឆ្ងាយៗ ឬចេញទៅតាមបណ្តាខេត្តក្រុងផ្សេងៗ ដោយតម្រូវឲ្យអ្នកបើកបរត្រូវយកចិត្តទុកដាក់ខ្លាំង ឬផ្លាស់ប្ដូរឱ្យបានញឹកញាប់។ ជាមួយគ្នានេះ ដើម្បីផ្ដល់ភាពងាយស្រួល និងចំណេញពេលក្នុងប្ដូរប្រេងម៉ាស៊ីនយានយន្ត បច្ចុប្បន្ននេះ គេសង្កេតឃើញមានសេវាកម្មថ្មីមួយដែលមានទទួលប្ដូរប្រេងម៉ាស៊ីនចល័តដែលអាចទៅដល់ទីកន្លែង ឬនៅតាមផ្ទះ ក៏ដូចជាកន្លែងធ្វើការជាដើម។

ជាក់ស្ដែង លោក អឿ រ៉ាយុទ្ធ ជាម្ចាស់អាជីវកម្មប្ដូរប្រេងម៉ាស៊ីនចល័ត Mr. Lube បានប្រាប់ AMS Economy បានឲ្យដឹងថា ៖ សម្រាប់សេវាកម្មប្ដូរប្រេងម៉ាស៊ីនចល័តនេះ គឺបានផ្តល់ជូននូវភាពងាយស្រួលដល់អតិថិជនដែលមានម្ចាស់យានយន្ត ឬម្ចាស់រថយន្ត ដោយសារតែក្រុមការងារដែលជាអ្នកផ្តល់សេវាកម្មអាចចុះទៅដល់ផ្ទះ ឬតាមកន្លែងនានា ដែលអតិថិជនហៅទៅ។ ជាមួយការផ្តល់សេវាកម្មនេះ អតិថិជនអាចមានពេលធ្វើការគ្រប់គ្រាន់នៅកន្លែងការងារដោយផ្ទាល់ ឬនៅទីតាំងណាមួយដោយមិនចាំបាច់អង្គុយរង់ចាំយូរដូចនៅពេលទៅប្ដូរប្រេងម៉ាស៊ីននៅតាមរោងជាង យានដ្ឋានជួសជុល ដូចមុនទៀតនោះទេ។

លោកបន្ថែមថា៖

«អាជីវកម្មរបស់យើងខ្ញុំនេះ គឺមានត្រឹមឡានមួយគ្រឿងដែលមានផ្ទុកសម្ភារៈសម្រាប់ជាងក្នុងការប្ដូរប្រេងម៉ាស៊ីនតែប៉ុណ្ណោះ ហើយក្រៅពីការប្ដូរប្រេងម៉ាស៊ីន យើងក៏មានការពិនិត្យម៉ាស៊ីនរថយន្តឲ្យអតិថិជន ដែលអាចឲ្យគាត់ដឹងពីសភាពនៃម៉ាស៊ីនយានយន្ត និងអាចរកជួសជុលបានទាន់ពេល ចៀសវាងមានគ្រោះថ្នាក់ណាមួយកើតឡើងនៅពេលបើកបរលើដងផ្លូវ»។

បន្ថែមពីលើនេះ លោកក៏មានសេវាកម្មប៉ះកង់ ឬប្ដូរអាគុយផងដែរសម្រាប់ករណីរថយន្តណាដែលមានបញ្ហាបន្ទាន់ បញ្ឆេះមិនឆេះ តែមិនមែនជាសេវាកម្មចម្បងនោះទេ គ្រាន់តែជាករណីណាចាំបាច់ ពិសេសគិតដល់បងប្អូនារីៗដែលពិបាកក្នុងការជួសជុល ឬប្ដូរកង់នៅពេលមានបញ្ហាប៉ុណ្ណោះ។ ចំណែកអតិថិជនរបស់លោក ភាគច្រើនជាអ្នករស់នៅរាជធានីភ្នំពេញ ដែលស្គាល់សេវាកម្មនេះតាមរយៈបណ្ដាញសង្គម ដូចជា Tik Tok និងក្រុម Telegram ជាដើម ហើយក៏មានអ្នកតាមខេត្តមួយចំនួនទាក់ទងដែរ ប៉ុន្តែដោយសារតែមិនទាន់មានសាខាទៅដល់ខេត្តនៅឡើយនោះ ភាគច្រើនត្រូវបានលោកបដិសេធ។ នេះជាអ្វីដែលម្ចាស់អាជីវកម្មខាងលើបានលើកឡើង។

គួរបញ្ជាក់ដែរថា លោក អឿ រ៉ាយុទ្ធ បានចាប់ផ្ដើមអាជីវកម្មប្ដូរប្រេងម៉ាស៊ីនចល័តនេះនៅឆ្នាំ២០២៣ ដោយសារខ្លួនមានជំនាញជួសជុលយានយន្តយូរឆ្នាំមកហើយ ណាមួយលោកមានចិត្តចង់បង្កើតអាជីវកម្មក្នុងដើមទុនតិច ដែលទាក់ទងនឹងថែទាំរថយន្ត ជាពិសេសលោកបានស្គាល់ និងដឹងពីគុណភាពប្រេងម៉ាស៊ីនច្បាស់ផងដែរនោះ ទើបលោកបានយករថយន្តសំណព្វចិត្តមួយគ្រឿង រួមជាមួយនឹងដើមទុនប្រមាណ ៥ពាន់ដុល្លារបង្កើតជាអាជីវកម្មនេះឡើង។

ដោយឡែក ពាក់ព័ន្ធនឹងផលលំបាកវិញ លោកបញ្ជាក់ដែរថា មិនសូវជាមានកត្តាប្រឈមអ្វីច្រើននោះទេ ក្រៅតែពីការខកណាត់ជាមួយអតិថិជនដោយសារការស្ទះចរាចរណ៍ប៉ុណ្ណ៉ ជាពិសេសពេលល្ងាច ប៉ុន្តែទោះជាយ៉ាងណា អតិថិជនក៏មានការយោគយល់ដែរ។ សម្រាប់ពេលអនាគត លោកចង់បង្កើតជាយានដ្ឋានមួយកន្លែង ក៏ដូចជាពង្រីកសេវាកម្មប្ដូរប្រេងចល័តនេះឲ្យទៅដល់តាមខេត្ត និងតំបន់ឆ្ងាយៗបន្ថែមទៀត៕