ភ្នំពេញ៖ ក្រុមហ៊ុនបណ្តាញផ្សព្វផ្សាយសារពត៌មាន AMS (Apsara Media Services) ព្រមទាំងបណ្តាញព័ត៌មានកម្ពុជាចំនួន៧ផ្សេងទៀត នៅថ្ងៃទី៣០ ខែវិច្ឆិកា ឆ្នាំ២០២៤ បានចុះអនុស្សារណៈយោគយល់គ្នាជាមួយមជ្ឈមណ្ឌលផ្សព្វផ្សាយអន្តរជាតិ ក្វាងស៊ី (Quangxi ) ដែលជាបណ្តុំប្រព័ន្ធផ្សព្វផ្សាយដ៏ធំនៅខេត្តក្វាងស៊ី នៃសាធារណរដ្ឋប្រជាមានិតចិន ។ កម្មវិធីនេះ ត្រូវបានធ្វើឡើងដោយមានវត្តមាន លោក លឹម ឃុនស្រ៊ុន អគ្គនាយក AMS ព្រមទាំងតំណាងបណ្តាញផ្សព្វផ្សាយទាំង៧ផ្សេងទៀត ព្រមទាំងតំណាងមជ្ឈមណ្ឌលផ្សព្វផ្សាយអន្តរជាតិក្វាងស៊ីផងដែរ ។

លោក លឹម ឃុនស្រ៊ុន បានមានប្រសាសន៍ថា៖ អនុស្សារណៈយោគយល់គ្នារវាង AMS និងមជ្ឈមណ្ឌលផ្សព្វផ្សាយអន្តរជាតិក្វាងស៊ី មានគោលបំណងដើម្បីពង្រឹងពង្រីក និងផ្លាស់ប្តូរកិច្ចសហប្រតិបត្តិការវិស័យសារពត៌មាន ការបណ្តុះបណ្តាលធនធានមនុស្ស និងការផ្លាស់ប្តូរទស្សនកិច្ចរួមគ្នា។

លោកអគ្គនាយកបានលើកឡើងថា៖ ភាគីទាំង ២ បានយល់ព្រមពង្រីកការផ្សព្វផ្សាយ និងឥទ្ធិពលនៃព័ត៌មានតាមរយៈការធ្វើបទសម្ភាសរួម ក៏ដូចជាកិច្ចសហប្រតិបត្តិការលើកម្មវិធីជាច្រើនទៀត ជាពិសេសបង្កើនកិច្ចសហការលើបច្ចេកវិទ្យាព័ត៌មានទំនើប បង្កើតថ្នាលផ្លាស់ប្តូរវិស័យបច្ចេកវិទ្យា ចែករំលែកបទពិសោធន៍ និងសមិទ្ធផលថ្មីៗ ព្រមទាំងលើកទឹកចិត្តដល់កិច្ចសហប្រតិបត្តិការឆ្លងកាត់ព្រំដែន។

លោក លឹម ឃុនស្រ៊ុន បានបញ្ជាក់បន្ថែមថា៖

« AMS និង មជ្ឈមណ្ឌលផ្សព្វផ្សាយអន្តរជាតិក្វាងស៊ី នឹងរៀបចំការផ្លាស់ប្តូរទស្សនកិច្ច ការបណ្តុះបណ្តាល និងកម្មវិធីផ្សេងៗ សំដៅរួមគ្នាលើកកម្ពស់គុណភាព និងជំនាញនៃការរាយការណ៍ព័ត៌មាន»។

មជ្ឈមណ្ឌលផ្សព្វផ្សាយអន្តរជាតិក្វាងស៊ី គឺជាស្ថាប័នដែលបានបង្កើតឡើងក្រោមការដឹកនាំផ្ទាល់ដោយក្រសួងឃោសនានៃគណៈកម្មាធិការបក្សនៃតំបន់ស្វយ័តក្វាងស៊ី ដែលមានការដឹកនាំដោយ «Guangxi Daily» និងសម្របសម្រួលដោយស្ថានីយ៍វិទ្យុ និងទូរទស្សន៍ក្វាងស៊ី។ មជ្ឃមណ្ឌលនេះ គឺជាស្ថាប័នដែលមានឥទ្ធិពលមួយសម្រាប់ខេត្តក្វាងស៊ីក្នុងការផ្លាស់ប្តូរព័ត៌មាន និងវប្បធម៌ជាមួយប្រទេសជុំវិញពិភពលោក។

ឯកឧត្តម ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មានកម្ពុជា បានថ្លែងថា៖

«កិច្ចសហប្រតិបត្តិការក្នុងវិស័យព័ត៍មាន គឺជាស្ពានដ៏សំខាន់មួយសម្រាប់ការពង្រឹងទំនាក់ទំនងមិត្តភាពរវាងប្រទេសកម្ពុជា និងចិន។ បណ្តាញសារព័ត៌មាន មានតួនាទីសំខាន់ក្នុងការផ្សារភ្ជាប់ និងបង្កើនការយល់ដឹងរវាងប្រជាជន និងប្រទេសទាំង២»។

ឯកឧត្តមបានបន្ថែមថា៖ អនុស្សរណៈយោគយល់គ្នានេះ មិនត្រឹមតែពង្រឹងទំនាក់ទំនងបច្ចុប្បន្នប៉ុណ្ណោះទេ ប៉ុន្តែថែមទាំងបើកទំព័រថ្មីសម្រាប់ការផ្លាស់ប្តូរ និងការផ្សព្វផ្សាយព័ត៌មានឱ្យទូលំទូលាយក្នុងប្រទេសទាំង២។ កិច្ចសហប្រតិបត្តិការនេះនឹងក្លាយជាវិធីសាស្ត្រដែលអាចចែករំលែកធនធាន ការផ្លាស់ប្តូរបទពិសោធន៍ នឹងបច្ចេកវិទ្យា ដើម្បីសហការក្នុងការផ្សព្វផ្សាយអត្ថបទ ដែលទាក់ទងនឹងការទំនាក់ទំនងមិត្តភាពរវាងប្រទេសទាំងពីរ។

លោក យ៉ាង ធាន (Yang Tian) អគ្គនិពន្ធនាយករង Quangxi Daily បានមានប្រសាសន៍ថា៖ នេះគឺជាចំណុចចាប់ផ្តើមថ្មីមួយសម្រាប់កិច្ចសហប្រតិបត្តិការប្រព័ន្ធផ្សព្វផ្សាយរវាងចិន និងកម្ពុជា ហើយវាក៏ជាការឆ្លុះបញ្ចាំងយ៉ាងរស់រវើកនៃចំណងមិត្តភាពដ៏ស៊ីជម្រៅរវាងចិន និងកម្ពុជា។ ការចុះអនុស្សរណៈយោគយល់គ្នានេះ មានសារៈសំខាន់ណាស់ក្នុងការជំរុញ និងបង្កើនកិច្ចសហប្រតិបត្តិការវិស័យសារពត៌មានរវាងចិន និងកម្ពុជា ដើម្បីផ្តល់ផលប្រយោជន៍ទៅវិញទៅមក។ នេះក៏បញ្ជាក់ឱ្យឃើញពីទំនាក់ទំនងដ៏ល្អរវាងមជ្ឈមណ្ឌលផ្សព្វផ្សាយអន្តរជាតិក្វាងស៊ី និងបណ្តាញសារព័ត៌មានកម្ពុជា។

លោកបានបន្ថែមថា៖

«MoU នេះ ជាផ្នែកមួយនៃការពង្រីកកិច្ចសហប្រតិបត្តិការរវាងប្រព័ន្ធផ្សព្វផ្សាយចិន-អាស៊ាន ដើម្បី រួមចំណែក កសាងសហគមន៍វាសនារួមចិន-អាស៊ានកាន់តែជិតស្និទ្ធ ពង្រឹងបន្ថែមទៀតនូវមូលដ្ឋានគ្រឹះនៃការជឿទុកចិត្តគ្នាទៅវិញទៅមក និងជំរុញទំនាក់ទំនងរវាងប្រជាជន និងប្រជាជនកាន់តែជិតស្និទ្ធ។ នៅថ្ងៃទី ៦ ខែកញ្ញាឆ្នាំនេះ មជ្ឈមណ្ឌលផ្សព្វផ្សាយអន្តរជាតិក្វាងស៊ី ត្រូវបានបើក​ចំហជាងមុន អនុវត្តការផ្លាស់ប្តូរកាន់តែទូលំទូលាយ និងកិច្ចសហប្រតិបត្តិការស៊ីជម្រៅជាមួយប្រព័ន្ធផ្សព្វផ្សាយក្នុងបណ្តាប្រទេសអាស៊ាន រួមទាំងប្រទេសកម្ពុជា និងបានដាក់ឱ្យដំណើរការផលិតផលប្រព័ន្ធផ្សព្វផ្សាយរួមបញ្ចូលគ្នាមួយចំនួន ដោយប្រើប្រាស់កម្លាំងនៃប្រព័ន្ធផ្សព្វផ្សាយដើម្បីពង្រឹងមិត្តភាព»។

លោកបានបន្តថា ៖

«បើក្រឡេកមកមើលអតីតកាល កិច្ចសហប្រតិបត្តិការរបស់យើងជាមួយប្រព័ន្ធផ្សព្វផ្សាយកម្ពុជា មានរយៈពេលយ៉ាងយូរ និងជិតស្និទ្ធ។ ជាពិសេស ក្នុងឆ្នាំ២០១៩ ចាប់តាំងពីការបង្កើតស្ថានីយ៍ទំនាក់ទំនងអន្តរជាតិ Guangxi Cloud-អាស៊ាន (កម្ពុជា) មក យើងបានបន្តពង្រឹងទម្រង់នៃកិច្ចសហប្រតិបត្តិការជាមួយប្រព័ន្ធផ្សព្វផ្សាយឆ្លងដែន និងបានរួមគ្នារៀបចំផែនការផ្សព្វផ្សាយព័ត៍មានដ៏មានឥទ្ធិពលជាច្រើន ដើម្បីបង្ហាញពីភាពស្រស់ស្អាតនៃតំបន់ភ្នំ និងទន្លេរបស់ខេត្តក្វាងស៊ី និងភាពទាក់ទាញនៃមនុស្សជាតិដល់ប្រទេសកម្ពុជា ហើយក៏បានបង្ហាញអំពីប្រវត្តិសាស្រ្ត វប្បធម៌ ប្រពៃណី និងទំនៀមទម្លាប់ដ៏ល្អផូរផង់របស់ប្រទេសកម្ពុជាទៅដល់ប្រជាជនខេត្តក្វាងស៊ី ដោយចាក់បញ្ចូលនូវភាពរឹងមាំថ្មីទៅក្នុងចំណងមិត្តភាពរវាងប្រទេសចិន និងកម្ពុជា»។

លោក ផ្លុង វិចិត្រ អគ្គនាយក CC Time តំណាងឱ្យសារពត៌មានកម្ពុជាក្នុងពិធីចុះហត្ថលេខា បានលើកឡើងថា៖ តាមរយៈ MoU នេះ នឹងជួយពង្រឹងពង្រីក និងផ្លាស់ប្តូរកិច្ចសហប្រតិបត្តិការវិស័យសារព័ត៌មាន ការបណ្តុះបណ្តាលធនធានមនុស្ស ការផ្លាស់ប្តូរទស្សនកិច្ច  បច្ចេកវិទ្យា និងគម្រោងនានា ជាពិសេសដើម្បីបង្ខិតឱ្យជិតរវាងប្រជាជន និងរាជរដ្ឋាភិបាលទាំង២ កម្ពុជា-ចិន ខេត្តក្វាងស៊ី។

លោកអគ្គនាយក CC Time បានបញ្ជាក់ថា៖

«MoUនេះ មិនត្រឹមតែជួយពង្រឹងការយោគយល់គ្នារវាងប្រជាជន និងប្រជាជនប៉ុណ្ណោះទេ តែថែមទាំងជាស្ពានដ៍សំខាន់ដើម្បីបង្កើនការផ្លាស់ប្តូរ និងកិច្ចសហប្រតិបត្តិការក្នុងតំបន់»។

គួរជម្រាបថា៖ ពិធីចុះហត្ថលេខាលើអនុស្សារណៈយោគយល់គ្នារវាងសារពត៌មានកម្ពុជា និងមជ្ឈមណ្ឌលផ្សព្វផ្សាយអន្តរជាតិក្វាងស៊ី បានធ្វើឡើងនៅសណ្ឋាគារសូហ្វីតែលភ្នំពេញ ក្រោមអធិបតីភាព ឯកឧត្តម ហួត ឃាងវេង រដ្ឋលេខាធិការ តំណាងឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន និងលោកស្រី ឈិន អ៊ីជុន (Chen Yijun) សមាជិកាគណៈកម្មាធិការអចិន្ត្រៃយ៍ នៃគណៈកម្មាធិការបក្ស និងជារដ្ឋមន្ត្រីឃោសនាការនៃតំបន់ស្វយ័តជនជាតិជាំងក្វាង ប្រទេសចិន ដោយមានការចូលរួមពី ឯកឧត្តម ផុស សុវណ្ណ ប្រតិភូរាជរដ្ឋាភិបាល ទទួលបន្ទុកជាអគ្គនាយកអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន និងតំណាងសារព័ត៌មានកម្ពុជា-ចិនសំខាន់ៗជាច្រើនផងដែរ។

ជារួម សារព័ត៌មានខ្មែរចំនួន៨ ដែលបានចុះអនុស្សារណៈជាមួយមជ្ឈមណ្ឌលផ្សព្វផ្សាយអន្តរជាតិក្វាងស៊ី មាន ៖ AMS ,Thmey Thmey, ស៊ីស៊ីថែមស៍ (CC Time) ,JIAN HUA DAILY ,Commercials News មជ្ឈមណ្ឌលសារព័ត៌មាន «នគរវត្ត» និងគេហទំព័រ «នគរដ្រាហ្គន», People News Asia និងមជ្ឈមណ្ឌលព័ត៌មាន Fresh news ៕