សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី Financial Times បានរាយការណ៍ថា រដ្ឋាភិបាលរុស្ស៊ី បានសម្រេចប្រកាសពីផែនការដំឡើងអត្រាពន្ធអាករតម្លៃបន្ថែម (VAT) ពី ២០% ទៅ ២២% ខណៈដែលសង្រ្គាមជាមួយនឹងអ៊ុយក្រែនកាន់តែប៉ះពាល់ដល់សេដ្ឋកិច្ច។
VAT គឺជាពន្ធមួយប្រភេទដែលត្រូវគិតបន្ថែមលើតម្លៃដើមនៃផលិតផល ឬសេវាកម្មជាប់អាករ និងត្រូវបានចំណាយដោយអ្នកប្រើប្រាស់ចុងក្រោយ។ យ៉ាងណាមិញ វិធានការនេះផ្ទុយពីការសន្យារបស់ប្រធានាធិបតីរុស្ស៊ី Vladimir Putin កាលពីឆ្នាំមុនថានឹងមិនដំឡើងពន្ធម្តងទៀតនោះទេមុនឆ្នាំ២០៣០។ ក្រោយមក ក្រសួងហិរញ្ញវត្ថុបានធ្វើការកែតម្រូវដោយលើកឡើងថា គោលបំណងនៃការដំឡើងពន្ធនេះដើម្បីគ្របដណ្តប់លើការចំណាយផ្នែកការពារជាតិ និងសន្តិសុខរបស់រុស្ស៊ី ក៏ដូចជា ការគាំទ្រសម្រាប់អតីតយុទ្ធជន និងការចំណាយលើសង្គម។ ផែនការនេះត្រូវបានប្រកាសឡើងមួយថ្ងៃបន្ទាប់ពីប្រធានាធិបតីអាម៉េរិក Donald Trump រិះគន់រុស្ស៊ីថាគឺជាខ្លាក្រដាសដែលកំពុងនៅក្នុងវិបត្តិសេដ្ឋកិច្ចដ៏ធំ ហើយវាអាចជាឱកាសសម្រាប់អ៊ុយក្រែនទទួលបានផលចំណេញធំនៅលើសមរភូមិ។
យ៉ាងណាក៏ដោយ ទោះបីជាវិមានក្រឹមឡាំងបានច្រានចោលការអត្ថាធិប្បាយរបស់ Trump ក៏ដោយ ប៉ុន្តែផែនការថ្មីរបស់ខ្លួនបានបង្ហាញពីការកើនឡើងនៃឱនភាពថវិកា ខណៈដែលការព្យាករណ៍ GDP ផ្លូវការក៏ធ្លាក់ចុះខ្លាំងផងដែរ។
លោក Alexandra Prokopenko អតីតមន្ត្រីធនាគារកណ្តាលរុស្ស៊ី បានលើកឡើងថា ៖
«អាទិភាពរបស់វិមានក្រឹមឡាំងនៅតែជាការចំណាយផ្នែកយោធា ហើយឥឡូវនេះវាជាបញ្ហាចម្បងសម្រាប់មនុស្សគ្រប់គ្នា។ នៅពេលចាប់ផ្តើមសង្រ្គាម ការចំណាយលើកងទ័ពបានមកពីទុនបំរុង និងចំណូលលើសលប់ពីប្រេង រួមទាំងឧស្ម័ន។ បន្ទាប់មក ពួកគេបានដំឡើងពន្ធសាជីវកម្ម ដែលធ្វើឲ្យអាជីវកម្មទាំងអស់នៅរុស្ស៊ី និងពលរដ្ឋផ្តល់ហិរញ្ញប្បទានដល់សង្រ្គាមដោយផ្ទាល់ ពីព្រោះមិនមានប្រភពផ្សេងទៀតនៅសេសសល់ទេ»។
គួរកតសម្គាល់ថា ឱនភាពថវិការបស់រុស្ស៊ីបានកើនឡើងដល់ ៤,២ ទ្រីលានរូប៊ល (ប្រមាណ ៥០ ពាន់លានដុល្លារ) ដែលស្មើរនឹង ១,៩% នៃផលិតផលក្នុងស្រុកសរុប ចំពេលមានការធ្លាក់ចុះនៃប្រាក់ចំណូលដោយសារតម្លៃប្រេងធ្លាក់ចុះ និងការដាក់សម្ពាធរបស់អាម៉េរិកលើការនាំចេញថាមពលរបស់រុស្ស៊ី។ សម្រាប់រយៈពេលពេញមួយឆ្នាំ២០២៥ ក្រសួងហិរញ្ញវត្ថុបានព្យាករណ៍ថា ឱនភាពនឹងឈានដល់ ៥,៧ ទ្រីលានរូប៊ល ឬ ២,៦% នៃផលិតផលក្នុងស្រុកសរុប។ លើសពីនេះ ការព្យាករណ៍ជាផ្លូវការសម្រាប់កំណើនផលិតផលក្នុងស្រុកសរុប (GDP) សម្រាប់ឆ្នាំនេះធ្លាក់ចុះពី ២,៥% មកត្រឹម ១% ប៉ុណ្ណោះ និង ១,៣% នៅឆ្នាំ ២០២៦។ គួរឲ្យបញ្ជាក់ដែរថា ឱនភាពថវិកា សំដៅទៅលើការចំណាយលើសប្រាក់ចំណូលរបស់រដ្ឋ ដែលជាសូចនាករមួយនៃសុខភាពហិរញ្ញវត្ថុ ។
លោក Dmitry Peskov អ្នកនាំពាក្យរបស់ Putin ទទួលស្គាល់ចំណុចតានតឹងមួយចំនួននៅក្នុងសេដ្ឋកិច្ចរុស្ស៊ី ប៉ុន្តែលោកបានអះអាងថា ថវិកាជាតិបន្តមានតុល្យភាព។ ទន្ទឹមនឹងនេះ គេរំពឹងថា ការដំឡើងពន្ធ VAT អាចនាំមកនូវចំណូលបន្ថែម ១ ទ្រីលានរូប៊ល ឬ ០,៥% នៃផលិតផលក្នុងស្រុកសរុបក្នុងមួយឆ្នាំ។ កាលពីសប្តាហ៍មុន រដ្ឋមន្ត្រីក្រសួងហិរញ្ញវត្ថុរុស្ស៊ី Anton Siluanov បានបង្ហើ់បថា រុស្ស៊ីចង់កាត់បន្ថយតម្លៃប្រេងម្តង ១ ដុល្លារក្នុងមួយឆ្នាំក្នុងរយៈពេល ៥ ឆ្នាំខាងមុខ ដើម្បីការពារសេដ្ឋកិច្ចពីការប៉ះទង្គិចពីខាងក្រៅ។ ការលក់ប្រេង និងឧស្ម័នដែលពីមុនមានចំណែកជិតពាក់កណ្តាលនៃថវិការបស់រុស្ស៊ី អាចនឹងមិនរកចំណូលលើសពី ២២% នៃប្រាក់ចំណូលរបស់ខ្លួននៅឆ្នាំក្រោយនោះទេ។ ជាក់ស្តែងនាពេលថ្មីៗនេះ អាម៉េរិកបានដំឡើងពន្ធទ្វេដងដល់ ៥០% លើការនាំចូលពីឥណ្ឌាពាក់ព័ន្ធការទិញប្រេងពីរុស្ស៊ី។ មិនត្រឹមតែប៉ុណ្ណោះ Trumpបញ្ចុះបញ្ចូលឲ្យ EU និង NATO ដំឡើងពន្ធលើឥណ្ឌា និងចិនផងដែរ ដោយសារពួកគេជាអ្នកទិញប្រេងធំបំផុតរបស់រុស្ស៊ី៕
Account
Security
Favourite Content