បរទេស ៖ យោងតាមប្រភពព័ត៌មានពីញូវយ៉កថាមបានរាយការណ៍ថា មូលនិធិរូបិយវត្ថុអន្តរជាតិ IMF បានបង្កើនការព្យាករណ៍លើកំណើនសេដ្ឋកិច្ចរបស់ចិន ប៉ុន្តែបានព្រមានអំពីហានិភ័យដែលបង្កឡើងដោយវិស័យហិរញ្ញវត្ថុ និងអចលនទ្រព្យរបស់ប្រទេសនេះផងដែរ។

កាលពីថ្ងៃអង្គារកន្លងទៅនេះ IMF ព្យាករណ៍ថា សេដ្ឋកិច្ចរបស់ចិននឹងកើនឡើង ៥,៤ ភាគរយនៅឆ្នាំនេះ និង ៤,៦ ភាគរយនៅឆ្នាំ២០២៤ ដោយការប៉ាន់ប្រមាណនីមួយៗត្រូវបានដំឡើង ០,៤ ភាគរយខ្ពស់ជាងការព្យាករណ៍កាលពីបួនសប្តាហ៍មុន។ លើសពីនេះ IMF បានចេញផ្សាយសេចក្តីសង្ខេបនៃការវាយតម្លៃប្រចាំឆ្នាំរបស់ខ្លួនអំពីប្រព័ន្ធសេដ្ឋកិច្ច និងហិរញ្ញវត្ថុរបស់ចិនផងដែរ។ IMF ​បាន​អំពាវនាវ​ឱ្យចិន​អនុញ្ញាត​ឱ្យ​អ្នក​អភិវឌ្ឍន៍​ដែលអស់​ក្តី​សង្ឃឹម​ពី​ការ​ងើប​ឡើង​វិញឲ្យចាកចេញ​ពី​វិស័យមួយ​នេះ ដោយសារចិនបានអនុញ្ញាតឱ្យអ្នកអភិវឌ្ឍន៍ដែលក្ស័យធនបន្តនៅក្នុងវិស័យនេះ ដែលវាអាចរារាំងដល់ការងើបឡើងវិញនៃវិស័យ។

នៅក្នុងសន្និសីទសារព័ត៌មាននៅទីក្រុងប៉េកាំង លោកស្រី Gita Gopinath នាយករងទីមួយនៃមូលនិធិរូបិយវត្ថុអន្តរជាតិ IMF បាននិយាយថា ការផ្លាស់ប្តូរនេះឆ្លុះបញ្ចាំងពីដំណើរការសេដ្ឋកិច្ចដែលមានភាពខ្លាំងជាងការរំពឹងទុកកាលពីខែកក្កដាដល់ខែកញ្ញា និងការខិតខំប្រឹងប្រែងថ្មីៗរបស់ទីក្រុងប៉េកាំងដើម្បីជំរុញសេដ្ឋកិច្ច។ កាលពី ២ សប្តាហ៍មុន ចិនបាននិយាយថា ខ្លួននឹងបញ្ចេញមូលបត្របំណុលដែលមានតម្លៃជិត ១៤០ ពាន់លានដុល្លារ ដើម្បីចំណាយសម្រាប់ការជួសជុលការខូចខាតដោយសារទឹកជំនន់កាលពីរដូវក្តៅមុន និងកម្មវិធីកែលម្អភាពធន់របស់ប្រទេសចំពោះការប្រែប្រួលអាកាសធាតុផងដែរ។ យ៉ាងណាមិញ លោកស្រី Gopinath បង្ហាញការព្រួយបារម្ភអំពីវិស័យអចលនទ្រព្យរបស់ចិន ដែលប្រឈមនឹងការធ្លាក់ចុះតម្លៃ និងការលក់ ក៏ដូចជាការខកខានក្នុងការសងបំណុលពីអ្នកអភិវឌ្ឍន៍ធំៗ។ ដូច្នោះហើយ វា​មាន​សារៈសំខាន់​ខ្លាំង​ណាស់​ក្នុង​ការ​ដោះស្រាយ​បញ្ហា​ក្នុង​វិស័យ​អចលន​ទ្រព្យ​ដែល​នៅ​តែ​មាន​ភាព​ទន់​ខ្សោយ។

ទន្ទឹមនឹងនេះ លោកស្រី Gopinath បាននិយាយថា ៖ «ក្តីសង្ឃឹមនៅដើមឆ្នាំនេះសម្រាប់ការងើបឡើងវិញនៃទីផ្សារអចលនទ្រព្យត្រូវបានរារាំងរួចហើយដោយការធ្លាក់ចុះជាលើកទីពីរនៅក្នុងវិស័យនេះ។ យើងត្រូវគ្រប់គ្រងល្បឿនរបស់វាយ៉ាងប្រុងប្រយ័ត្ន ដើម្បីជៀសវាងការធ្លាក់ចុះយ៉ាងខ្លាំង និងផលវិបាកដោយអចេតនា ដោយយើង​បាន​ដាក់​ចេញ​នូវ​វិធានការ​ជា​ច្រើន​ដើម្បី​រក្សា​ស្ថិរភាព​ទីផ្សារ​អចលនទ្រព្យ។ យើងសូមអំពាវនាវ​ឲ្យ​រដ្ឋាភិបាលចិន​ស្វែងរក​មធ្យោបាយ​ថ្មី​ដើម្បី​រក្សា​កំណើន​សេដ្ឋកិច្ចផងដែរ ខណៈដែលប្រព័ន្ធធនាគារដែលគ្រប់គ្រងដោយរដ្ឋបានបង្កើនការផ្តល់ប្រាក់កម្ចីសម្រាប់ការសាងសង់រោងចក្រ និងការវិនិយោគឧស្សាហកម្មផ្សេងទៀត។ លោកស្រីបានលើកជាសំណួរថា តើប្រព័ន្ធធនាគារមានទុនបំរុងហិរញ្ញវត្ថុគ្រប់គ្រាន់ដែរ ឬទេ ដែលជាក្តីបារម្ភសម្រាប់អ្នកវិនិយោគ ខណៈដែលវិស័យអចលនទ្រព្យរបស់ប្រទេសនៅតែបន្តធ្លាក់ចុះ។

មិនត្រឹមតែប៉ុណ្ណោះ IMF បានលើកឡើងថា ហានិភ័យស្ថិរភាពហិរញ្ញវត្ថុត្រូវបានកើនឡើង ដោយសារដើមទុនរបស់ស្ថាប័នហិរញ្ញវត្ថុត្រូវបានថយចុះ ខណៈដែលការព្រួយបារម្ភអំពីគុណភាពទ្រព្យសកម្មកំពុងកើនឡើង។ ទន្ទឹមនឹងនេះ របាយការណ៍របស់វិទ្យាស្ថាន AidData បានរកឃើញថា ចិនបានផ្តល់ប្រាក់កម្ចីសង្គ្រោះយ៉ាងច្រើនដល់ប្រទេសកំពុងអភិវឌ្ឍន៍ដែលបានខ្ចីពីទីក្រុងប៉េកាំងមុនពេលការរាតត្បាតកូវីដ-១៩ ដើម្បីចំណាយលើការសាងសង់ផ្លូវ ខ្សែរថភ្លើង និងហេដ្ឋារចនាសម្ព័ន្ធផ្សេងៗទៀត។ យ៉ាងណាមិញ លោក Wang Wenbin អ្នកនាំពាក្យក្រសួងការបរទេសចិនបានអះអាងថា ថាលោកមិនមានព័ត៌មានជាក់លាក់អំពីរបាយការណ៍ AidData នោះទេ។ ​បន្ទាប់​ពី​របាយការណ៍ AidData ត្រូវ​បាន​ចេញ​ផ្សាយ លោក​បានឆ្លើយតប​នៅ​ក្នុង​សន្និសីទ​ខ្លី​មួយ​ថា បំណុល​សម​ហេតុ​ផល​គឺ​ល្អ​សម្រាប់​ការ​អភិវឌ្ឍ​សេដ្ឋកិច្ច។ ប្រទេសជាច្រើនប្រើប្រាស់បំណុលរបស់រដ្ឋាភិបាលជាមធ្យោបាយសំខាន់មួយក្នុងការបង្កើនហិរញ្ញវត្ថុ និងអានុភាពសម្រាប់ការអភិវឌ្ឍន៍សេដ្ឋកិច្ច។

គួរបញ្ជាក់ថា កាលពីថ្ងៃអង្គារសប្ដាហ៍កន្លងទៅនេះ រដ្ឋាភិបាលរបស់ប្រទេសចិនបាននិយាយថា ការនាំចេញបានធ្លាក់ចុះ ៦,៦ ភាគរយ បើធៀបនឹងខែតុលាក្នុងឆ្នាំមុន ប៉ុន្តែពាក់កណ្តាលនៃការធ្លាក់ចុះនោះបានឆ្លុះបញ្ចាំងពីការធ្លាក់ចុះនៃរូបិយប័ណ្ណយ័នធៀបនឹងប្រាក់ដុល្លារ។ ការ​នាំ​ចូល​របស់​ចិន​បាន​កើន​ឡើង ៣ ភាគរយ​កាល​ពី​ខែ​មុន​បើធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន​។ ស្របពេលនេះដែរ សេដ្ឋវិទូយល់ឃើញថា ផ្នែកមួយនៃការធ្លាក់ចុះ គឺដោយសារការនាំចេញទំនិញផលិតមួយចំនួនរបស់ចិនមានការយឺតយ៉ាវដូចជា គ្រឿងអេឡិចត្រូនិក គ្រឿងសង្ហារឹម និងទំនិញផ្សេងទៀតក្នុងអំឡុងពេលរាតត្បាត៕