បរទេស ៖ យោងតាមប្រភពព័ត៌មានពីរ៉យទ័រ បានរាយការណ៍ថា រុស្ស៊ី ​បាន​ក្លាយ​ជា​អ្នក​នាំ​ចូល​រថយន្តរបស់​ចិនដ៏​កំពូល​ ខណៈដែលទំហំពាណិជ្ជកម្មរវាងប្រទេសទាំងពីរត្រូវបានរំពឹងថានឹងឈានដល់ ៣០០ ពាន់លានដុល្លារនៅចុងទសវត្សរ៍នេះ។

ទន្ទឹមនឹងនេះ ស្ថិតិបង្ហាញថា បន្ទាប់ពីក្រុមហ៊ុនផលិតរថយន្តអ៊ឺរ៉ុប អាមេរិក កូរ៉េខាងត្បូង និងជប៉ុន បានចេញពីប្រទេសរុស្ស៊ី ម៉ាកយីហោចិនមានចំនួនជាង ៩០ ភាគរយបាននាំចេញរថយន្តទៅកាន់រុស្ស៊ីនៅឆ្នាំនេះ។ វាគឺជាផ្នែកមួយនៃការពង្រីកខ្លួនចូលទៅក្នុងទីផ្សាររុស្ស៊ី។ ថ្មីៗនេះ ក្រុមហ៊ុនផលិតរថយន្តរបស់ចិនបានចាប់ផ្តើមផលិតកម្មរថយន្តនៅរោងចក្រ Avtotor ក្នុងតំបន់ Kaliningrad របស់រុស្ស៊ី ដែលពីមុនគឺជាកន្លែងដំឡើងរថយន្ត BMW របស់អាល្លឺម៉ង់ និងរថយន្ត Hyundai និង Kia របស់កូរ៉េខាងត្បូង។

មិនត្រឹមតែប៉ុណ្ណោះ ប្រធានាធិបតីរុស្ស៊ី លោក Vladimir Putin បានបង្ហើបថា រថយន្តរបស់ចិនកាន់តែមានប្រជាប្រិយភាពនៅក្នុងប្រទេស ដោយកត់សម្គាល់ថាពួកគេក៏កំពុងធ្វើសកម្មភាពយ៉ាងសកម្មផ្លាស់ប្តូរម៉ាកយីហោអឺរ៉ុបពីទីផ្សារពិភពលោកផងដែរ។

លោក Zhang Hanhui ឯកអគ្គរដ្ឋទូត​ចិន​ប្រចាំ​នៅ​រុស្ស៊ីនិយាយថា ពាណិជ្ជកម្ម​រវាង​ប្រទេស​ទាំង​ពីរកំពុង​រីក​ចម្រើន​ ដោយសារ​តែ​ទណ្ឌកម្ម​របស់​លោកខាងលិច​ដែល​បាន​ដាក់​លើ​ក្រុង​ម៉ូស្គូ​ និង​សង្គ្រាម​ពាណិជ្ជកម្ម​ដែល​កំពុង​បន្ត​រវាង​អាមេរិក​ និង​ចិន។ បច្ចុប្បន្ននេះ កិច្ចសហប្រតិបត្តិការក្នុងឧស្សាហកម្មរថយន្តបានក្លាយជាធាតុដ៏សំខាន់នៃពាណិជ្ជកម្មទ្វេភាគី។ លើសពីនេះ កិច្ចសហប្រតិបត្តិការរវាងប្រទេសទាំងពីរបានកំពុងអភិវឌ្ឍ និងបង្ហាញពីភាពជោគជ័យគួរឱ្យកត់សម្គាល់។ មិនត្រឹមតែប៉ុណ្ណោះ ទីក្រុងប៉េកាំងគឺជាដៃគូពាណិជ្ជកម្មដ៏ធំបំផុតរបស់ទីក្រុងម៉ូស្គូក្នុងរយៈពេល ១៣ ឆ្នាំជាប់ៗគ្នា ដោយវិសាលភាពនៃកិច្ចសហប្រតិបត្តិការទ្វេភាគីកំពុងពង្រីកឥតឈប់ឈរ ហើយបណ្តាក្រុមហ៊ុនចិនកំពុងចាប់អារម្មណ៍យ៉ាងខ្លាំងជាមួយភាគីរុស្ស៊ី។

លោក Andrey Belousov ឧបនាយករដ្ឋមន្ត្រីរុស្ស៊ីបាននិយាយថា ទំហំពាណិជ្ជកម្មរវាងរុស្ស៊ី និងចិននៅតែបន្តកើនឡើង ដែលអាចនឹងឈានដល់ ៣០០ ពាន់លានដុល្លារនៅចុងទសវត្សរ៍នេះ ។ ថ្លែងនៅក្នុងកិច្ចប្រជុំនៃគណៈកម្មការអន្តររដ្ឋាភិបាលរុស្ស៊ី-ចិននៅទីក្រុងប៉េកាំងក្នុងសប្តាហ៍នេះ លោក Belousov បាននិយាយថា ចិនគឺជាដៃគូពាណិជ្ជកម្មដ៏សំខាន់របស់រុស្ស៊ីជាយូរមកហើយ ខណៈដែលវិសាលភាពនៃឱកាសវិនិយោគសម្រាប់ប្រទេសទាំងពីរកំពុងកើនឡើង។

គួរកត់សម្គាល់ថា ចាប់តាំងពីដើមឆ្នាំ២០២៣ មក ចំណូលពាណិជ្ជកម្មទ្វេភាគីបានកើនឡើងមួយភាគបី ហើយវាមានការរីកចម្រើនគួរឱ្យកត់សម្គាល់ក្នុងពាណិជ្ជកម្មផលិតផលលោហធាតុ សារធាតុគីមី អាហារ ឧបករណ៍ និងយានជំនិះ។​ គេរំពឹងថា ពាណិជ្ជកម្មរវាងប្រទេសទាំងពីរនឹងលើសពីគោលដៅ ២០០ ពាន់លានដុល្លារនៅឆ្នាំនេះ ដែលលឿនជាងការព្យាករណ៍​ថា គោលដៅនេះ​នឹង​សម្រេច​បាន​តែ​ក្នុង​ឆ្នាំ ២០២៤។

យោងតាមទិន្នន័យគយចិនបង្ហាញថា ចំណូលពាណិជ្ជកម្មរវាងរុស្ស៊ី និងចិនបានកើនឡើង ២៩,៥ ភាគរយនៅក្នុងត្រីមាសទី ៣ ឆ្នាំនេះ ដែលស្មើនឹងជិត ១៧៦,៩ ពាន់លានដុល្លារ។ ស្របពេលដែលលោកខាងលិចដាក់់ទណ្ឌកម្មលើរុស្ស៊ី និងជម្លោះពាណិជ្ជកម្មរវាងអាមេរិក-ចិនកំពុងបន្ត រុស្ស៊ីបានផ្គត់ផ្គង់ទៅកាន់ប្រទេសចិនជាចម្បងនូវផលិតផលថាមពល ប្រេង ហ្គាស ផលិតផលចម្រាញ់ កសិ-អាហារ និងផលិតផលឧស្សាហកម្ម។ បន្ថែមពីនេះ ចិនបាននាំចេញទំនិញស្ទើរតែគ្រប់ប្រភេទរួមមាន ម្ហូបអាហារ បរិក្ខារ ទូរស័ព្ទដៃ គ្រឿងអេឡិចត្រូនិច ផលិតផលវិស្វកម្ម រថយន្ត គ្រឿងសង្ហារឹម វាយនភ័ណ្ឌ សម្លៀកបំពាក់ និងស្បែកជើងជាដើមទៅកាន់រុស្ស៊ី៕