ភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បាន​លើកឡើងថា ការធ្វើជំរឿនសេដ្ឋកិច្ចជាតិឆ្នាំ២០២២ គឺ​ជាមូលដ្ឋា​​នសំខាន់សម្រាប់កម្ពុជាដើរទៅមុខ សម្រេចផែនការអភិវឌ្ឍនជាតិ និងឆ្លើយតបចំគោលដៅ​រយៈពេល១០ឆ្នាំទៀត។ ​ប្រមុខរដ្ឋាភិបាលកម្ពុជា​ថ្លែងដូចនេះ​ ​ក្នុងពិធីប្រកាសផ្សព្វផ្សាយ​របាយការណ៍ថ្នាក់ជាតិស្តីពីលទ្ធផលចុងក្រោយនៃជំរឿនសេដ្ឋកិច្ចនៅព្រះរាជាណាចក្រកម្ពុជា ឆ្នាំ២០២២ នា​ថ្ងៃទី២៦ ខែធ្នូ ឆ្នាំ២០២៣។ ​

សម្ដេចធិបតី ហ៊ុន ម៉ាណែត បាន​ឱ្យដឹងថា ទិន្នន័យជំរឿនសេដ្ឋកិច្ចជាតិនេះ នឹងជួយរដ្ឋាភិបាលលើការរៀបចំគោ​លនយោបាយប្រកបដោយការឆ្លុះបញ្ចាំងស៊ីជម្រៅលើស្ថានភាពសុខភាពសេដ្ឋកិច្ច ការលានុវត្តភាពសេ​ដ្ឋ​កិ​ច្ច និង​អាចកំណត់តម្រូវការជាក់លាក់ទៅតាមវិស័យ ការបែងចែកធនធានប្រកបដោយប្រសិទ្ធភាព វិធា​នការអន្តរាគមន៍ និងការត្រួតពិនិត្យលើគោលដៅអភិវឌ្ឍន៍ជាតិ។ ​

សម្ដេចបានមានប្រសាសន៍​ថា ៖

«ទិន្នន័យ​ជួយឱ្យយើងអាចព្យាករសេណារីយ៉ូ និងអនាគត ថាវានឹងប្រែប្រួ​លកម្រិតណា បើយើងមិនអាចព្យាករណ៍ស្ថានការណ៍ទៅមុខយ៉ាងណា យើងនឹងដើរក្រោយសភាពការណ៍ យើងមិនអាចបុរេសកម្មបានទេ។ យើងនឹងត្រូវប្រតិកម្ម ហើយពាក្យថាប្រតិកម្មហើយ ច្រើនតែលុបលាងបញ្ហា សម្អាតបញ្ហា។ ការព្យាករក្នុងសេដ្ឋកិច្ចយើង ឧទាហរណ៍ កូវីដ១៩ ឬ២០២៤ តើវិស័យអីដែលងើបឡើ​ង ហើយវិស័យអីដែលយើងត្រូវទាញសក្តានុពល?»​

សម្ដេចនាយករដ្ឋមន្ត្រីបាន​​បញ្ជាក់​ថា ជំរឿនសេដ្ឋកិច្ចជាតិឆ្នាំ២០២២ បានជួយដល់រដ្ឋាភិបាលអាណត្តិទី៧ អាចដឹងពីស្ថានភាពវិវត្តសេដ្ឋកិច្ចរយៈពេល ១០ឆ្នាំមកនេះ ទៅលើកម្រិតសេដ្ឋកិច្ច-សង្គម រចនាសម្ព័ន្ធសេ​ដ្ឋ​កិច្ច អាជីវកម្មក្នុង និងក្រៅប្រព័ន្ធ ផលប៉ះពាល់ពីវិបត្តិកូវីដ១៩ ជាដើម។​​ ​ទន្ទឹមនឹងនេះ លោកក៏​បានស្នើដល់ក្រសួងផែនការ ជួយប្រែក្លាយទិន្នន័យជំរឿនសេដ្ឋកិច្ចជាតិឆ្នាំ២០២២ ទៅជាព័ត៌មានដែលមានលក្ខណៈគ្រប់ជ្រុងជ្រោយ និងច្បាស់លាស់តាមបែបវិទ្យាសាស្ត្រ ដោយការប្រើប្រា​ស់វិធីសាស្ត្រសមស្របបែបវិទ្យាសាស្ត្រស្ថិតិ ដើម្បីផ្តល់ជាធាតុចូលរឹងមាំសម្រាប់គ្រប់ក្រសួង-ស្ថាប័ន ប្រើប្រា​ស់ក្នុងការងាររៀងៗខ្លួន ជាពិសេសការរៀបចំគោលនយោបាយ និងការផ្សព្វផ្សាយជូនសាធារណជន និងទូលំទូលាយដល់គ្រប់ក្រសួង-ស្ថាប័ន ពាក់ព័ន្ធ។​

ពាក់ព័ន្ធនឹងបញ្ហានេះ លោក ប៉ា ចន្ទរឿន ​ប្រធានវិទ្យាស្ថានប្រជាធិបតេយ្យកម្ពុជា បាន​​លើកឡើងដូចគ្នានេះដែរ​ថា ការធ្វើគោលនយោបាយ និងការសម្រេចចិត្តណាមួយត្រូវឈរលើគោលការណ៍ភស្តុតាងជាក់ស្តែង ដែលកើតចេញពីការសិក្សាស្រាវជ្រាវ។

លោកបានបន្តថា របាយការណ៍ជំរឿនសេដ្ឋកិច្ចជាតិឆ្នាំ២០២២ របស់ក្រ​សួងផែនការនេះជាទិន្នន័យ និងភស្តុតាងចាំបាច់មួយដើម្បីគូសវាងសកម្មភាពសេដ្ឋកិច្ចកម្ពុជា និងត្រួតពិនិត្យសកម្មភាពដែលបានអនុវត្តកន្លងមក ហើយកំណត់សកម្មភាពដែលត្រូវបន្ត ដែលជាស្ពានសម្រេចគោលដៅប្រែក្លាយជាប្រទេសចំ​ណូល​មធ្យមកម្រិតទាបឆ្នាំ២០៣០ និងចំណូលកម្រិតខ្ពស់ឆ្នាំ២០៥០។​

លោកបាន​ប្រាប់​​ថា ៖

«នៅកម្ពុជាយើង មានធនធានមនុស្សដែលអាចសិក្សាស្រាវជ្រាវកម្រិតខ្ពស់បាន សំ​ខាន់ទៅលើការឱ្យ​តម្លៃ និងការចេះប្រើធនធានទាំងនោះឱ្យមានប្រយោជន៍ដល់សង្គមប៉ុណ្ណោះ។ របាយកា​រណ៍បែបវិទ្យាសាស្ត្រ ជាទិសដៅចង្អុលបង្ហាញអ្នកធ្វើគោលនយោបាយ អ្នកនយោបាយ ការដាក់ចេញផែ​នការអភិវឌ្ឍន៍ និងគម្រោងនានាទាំងដំ​ណាក់កាលខ្លី និងវែង»។ ​

លោក ប៉ា ចន្ទរឿន សង្ឃឹមថា របាយការណ៍ជំរឿនសេដ្ឋកិច្ចជាតិឆ្នាំ២០២២ នេះប្រើប្រាស់វិធីសាស្ត្រកម្រិ​ត​ខ្ពស់តាមបែបវិទ្យាសាស្ត្រ ចៀសវាងការធ្វើដោយរួចពីដៃ ដោយសាររបាយការណ៍ថ្នាក់ជាតិនេះនឹងក្លាយទៅ​ជាទិន្នន័យគោលសម្រាប់ការដឹកនាំប្រទេស ការសម្រេចចិត្ត និងធ្វើគោលនយោបាយជាតិទាំងមូល។​

សូម​ជម្រាបដែរ​ថា ​បញ្ជីមេនៃអង្គភាព​សេដ្ឋ​កិច្ច​​ក៏ត្រូវ​បានប្រើប្រាស់ជាបញ្ជីគោលនៃជំរឿនសេដ្ឋកិច្ច និងធ្វើជាបញ្ជីសំណាកគំរូ សម្រាប់​ជ្រើសរើសសំណាកគំរូនៃអង្កេតផ្សេងៗពាក់ព័ន្ធនឹងក្រុមហ៊ុន សហគ្រាសអាជីវកម្ម សិប្បកម្ម ពាណិជ្ជកម្ម និងសេវាកម្ម លើកលែងតែអង្គភាពសេដ្ឋកិច្ចក្នុងវិស័យកសិកម្ម៕ អត្ថបទ CPA ៖ សំបា​ន ច័ន្ទដារ៉ា​