ភ្នំពេញ ៖ កម្ពុជា​ទទួល​បាន​ភ្ញៀវ​ទេសចរ​ចិន​ចំនួន​ ​៤​៩​៨​ ២​៥​០​នាក់​ ​ក្នុង​អំឡុង​ពេល​១​១​ ​ខែ​ដំបូង​នៃ​ឆ្នាំ​២​០​២​៣​។​ នេះបើយោងតាមរបាយការណ៍​របស់​​​ក្រសួង​ទេសចរណ៍​កាលពីថ្ងៃទី២៥ ខែធ្នូ ឆ្នាំ២០២៣ ស្មើនឹង​ ​១​០​,​១​ ​ភាគរយ​នៃ​ចំនួន​ភ្ញៀវ​ទេសចរ​បរទេស​សរុប​ចំនួន​ ​៤​,​៩​១​ ​លាន​នាក់​ដែល​បាន​មក​ក​ម្សាន្ត​នៅ​កម្ពុជា​ក្នុង​អំឡុង​ពេល​ខែ​មករា​ដល់​ខែវិច្ឆិកា​ឆ្នាំ២០២៣នេះ។​

ប្រទេស​ចិន​ គឺជា​ប្រភព​ទេសចរ​បរទេស​ធំ​ជាងគេ​ទី​៣​សម្រាប់​កម្ពុជា​ ​តាម​ពីក្រោយ​ប្រទេស​ថៃ​ ​និង​វៀតណាម​ ​ដោយមាន​ជនជាតិ​ថៃ​ប្រហែល​ ​១​,​៦​៥​ ​លាន​នាក់​ ​និង​ជនជាតិ​វៀតណាម​ចំនួន​៩​២​០​,​០​៩​៣​ ​នាក់​បាន​ធ្វើដំណើរ​មក​កម្ពុជា​ក្នុង​អំឡុង​ពេល​១១ខែកន្លងមកនេះ។

​វិស័យទេសចរណ៍​ គឺជា​សសរស្តម្ភ​មួយ​ក្នុងចំណោម​សសរស្តម្ភ​ទាំងបួន​ដែល​ជួយ​ដល់​សេដ្ឋកិច្ច​របស់​ប្រទេស​កម្ពុជា​ ​បន្ថែម​លើ​ការនាំចេញ​ស​ម្លៀ​ក​បំពាក់​ ​ស្បែកជើង​ ​និង​ការនាំចេញ​ទំនិញ​ធ្វើដំណើរ​ ​កសិកម្ម​ ​សំណង់​ ​និង​អចល​ន​ទ្រព្យ​។​

គួរកត់សម្គាល់ផងដែរ កាល​ពី​ខែ​វិចិ្ឆកា​កន្លង​ទៅ ​កម្ពុជា​បាន​ដាក់​ឱ្យ​ដំណើរ​ការ​ព្រលាន​យន្តហោះ​ថ្មី​មួយ​ដែល​ជា​ជំនួយ​ដោយ​ប្រទេស​ចិន​ ក្រោម​គម្រោង​គំនិត​ផ្តួច​ផ្តើម​ផ្លូវ​ក្រវាត់​ពាណិជ្ជ​កម្ម​ (Belt and Road Initiative ឬBRI) ​ដែល​នៅ​មិន​ឆ្ងាយ​ពី​ប្រាសាទ​អង្គរ​វត្ត​ក្នុង​ខេត្ត​សៀមរាប ​ដែល​ជា​តំបន់​បេតិក​ភណ្ឌ​ពិភព​លោក​របស់​អង្គការ​យូណេស្កូ។​ គោល​ដៅ​នេះ​បាន​កើត​ឡើង​បន្ទាប់​ពី​ការ​ដាក់​ចេញ​នូវ​យុទ្ធ​សាស្ត្រ​ទេសចរណ៍​មួយ​ហៅ​ថា ​«China Ready» ​ក្នុង​ឆ្នាំ​ ២០១៦ ​ដែល​មាន​គោល​បំណង​បំពាក់​មគ្គុទ្ទេសក៍​ទេស​ចរណ៍​ជាមួយ​នឹង​ជំនាញ​ភាសា​ចិន​ ការ​ផ្តល់​សញ្ញា​ និង​ឯកសារ​ធ្វើ​ដំណើរ​ជា​ភាសា​ចិន​ និង​ធ្វើ​ឱ្យ​ប្រាកដ​ថា​ ម្ហូប​អាហារ និង​គ្រឿង​បរិក្ខារ​នានា​ត្រូវ​នឹង​រស​ជាតិ​ចិន។​

ប្រទេសចិន ជាប្រទេសធំមានប្រជាជនច្រើន ជាទីផ្សារទេសចរណ៍ដ៏ធំបំផុតនៅក្នុងតំបន់ និងពិភពលោក និងជាប្រទេសមួយ ដែលនៅក្នុងតំបន់មិនឆ្ងាយពីកម្ពុជា និងមាន ទំនាក់ទំនង​សហប្រតិបត្តិការ តភ្ជាប់ជើងហោះហើរ និងការដឹកជញ្ជូនល្អ ជាពិសេសគឺចំណងមិត្តភាព ដ៏រឹងមាំជាយុទ្ធសាស្ត្រ សហគមន៍ជោគវាសនារួម ដែលបង្ហាញឱ្យ​ឃើញកាន់តែច្បាស់ថា ទីផ្សារទេសចរណ៍ ចិន ជាទីផ្សារអាទិភាពខ្ពស់បំផុតសម្រាប់អាស៊ាន ក៏ដូចជាកម្ពុជា។

មុនវិបត្តិជំងឺកូវីដ-១៩នៅឆ្នាំ២០១៩ ទេសចរចិនបានចេញក្រៅប្រទេសមានប្រមាណ ១៥៥លាននាក់ ស្មើនឹង១០% នៃទេសចរពិភពលោក (១៥០០លាននាក់) នាំមកនូវ​ចំណាយទេសច​រ​ណ៍ប្រមាណ ២៥៨ ប៊ីលានដុល្លារ ស្នើនឹង១ភាគ៥នៃចំណាយទេសចរណ៍ពិភពលោក (១.៣ ទ្រីលានដុល្លារ)។ ដោយឡែក ទេសចរចិនមកកម្ពុជានៅឆ្នាំ២០១៩ មានជាង ២.៣លាននាក់ ស្មើនឹង ៣៥.៧%នៃទេសចរអន្តរជាតិសរុប (៦.៦លាននាក់) គិតជាចំណូលស្មើប្រមាណ ១ ៨០០លាន ដុល្លារអាមេរិក លើចំណូលទេសចរណ៍​សរុបប្រមាណ ៥ប៊ីលានដុល្លាររបស់កម្ពុជា ខណៈដែលឆ្នាំ២០១៩ កម្ពុជាក៏ទទួលបានវិនិយោគគិនចិនលើវិស័យពាក់ព័ន្ធនឹងទេសចរណ៍ប្រមាណជាង ៥០%នៃទុនវិនិយោគ បរទេស (FDI) សរុបរបស់កម្ពុជា។

គួររម្លឹកថា តាម​ទិន្នន័យ​របស់​ក្រសួង​ទេស​ចរណ៍ ក្នុង​រយៈ​ពេល​ ១០ ​ខែ​ដើម​ឆ្នាំ ​២០២៣​ កម្ពុជា​ទទួល​បាន​ភ្ញៀវ​ទេសចរ​ចិន​ប្រមាណ ​៤៥ ​ម៉ឺន​នាក់៕