ភ្នំពេញ ៖ នៅក្នុងជំនួប​ពិភាក្សា​ជាមួយ​សម្ព័ន្ធធុរកិច្ច​ Baiyi Club មកពីប្រទេស​ចិន កាលពីថ្ងៃទី​១៣ ខែវិច្ឆិកា ឆ្នាំ ២០២៥ ឯកឧត្តម ជា វុទ្ធី​ អគ្គលេខាធិការគណៈកម្មាធិការ​វិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានបង្ហាញក្ដីរំពឹងថា​ ​សម្ព័ន្ធធុរកិច្ច​នេះ នឹងជួយ​ជំរុញ​វិនិយោគិន​ចិន​ចូលមកបណ្ដាក់ទុនវិនិយោគ​នៅក្នុងប្រទេស​កម្ពុជា​បន្ថែម ស្របពេល​បច្ចុប្បន្ន​នេះ ចិន​បានឈរ​លំដាប់ទី​១ ដែលមានវិនិយោគិន​ដាក់ទុនវិនិយោគច្រើនជាង​គេ​នៅកម្ពុជា ។

នៅក្នុងជំនួប​នោះ ឯកឧត្តម ជា វុទ្ធី បានមានមតិស្វាគមន៍យ៉ាងកក់ក្តៅបំផុតជូនចំពោះគណៈប្រតិភូ និងបានសម្តែងនូវសេចក្តីសោមនស្សរីករាយ ដែលលោក វ៉ាង យ៉ុង (Wang Yong) បានដឹកនាំគណៈប្រតិភូមកទស្សនកិច្ចនៅកម្ពុជាដោយផ្ទាល់ និងក្នុងពេលវេលាដ៏សមស្របបំផុត។

ឯកឧត្តមអគ្គលេខាធិការបានកត់សម្គាល់ឃើញថា វត្តមានរបស់ម៉ាកយីហោល្បីៗរបស់ចិនកំពុងតែលេចឡើង និងមានប្រជាប្រិយភាពនៅកម្ពុជា ជាពិសេសក្នុងវិស័យយានយន្ត និងគ្រឿងអេទ្បិចត្រូនិក។ តាមរយៈជំនួបលើកនេះ ឯកឧត្តមអគ្គលេខាធិការសង្ឃឹមថា គណៈប្រតិភូដែលជាសមាជិកនៅក្នុងសម្ព័ន្ធធុរកិច្ច Baiyi Club នឹងនាំយកម៉ាកល្បីៗរបស់ចិនក៏ដូចជាជំរុញវិនិយោគិនចិនមកបណ្តាក់ទុនវិនិយោគនៅកម្ពុជា។ មួយវិញទៀត កម្ពុជាបានមានគំនិតផ្តួចផ្តើមឧស្សាហកម្មសមាហរណ (Integrated Industrial Initiative) សំដៅចាប់យកនូវការវិនិយោគរបស់ចិនក្នុងចង្កោមឧស្សាហកម្មដែលអាចធានាដល់ខ្សែច្រវាក់ផ្គត់ផ្គង់ ពិសេស ការផលិតវត្ថុធាតុដើម និងផលិតផលពាក់កណ្តាលសម្រេច។ ក្នុងន័យនេះឯកឧត្តមអគ្គលេខាធិការបានស្នើឱ្យគណៈប្រតិភូគិតគូរពីការវិនិយោគក្នុងការផលិតវត្ថុធាតុដើម ឬផលិតផលពាក់កណ្តាលសម្រេចនៅកម្ពុជាដែលបច្ចុប្បន្នកំពុងមានសក្តានុពលខ្ពស់។

លោក វ៉ាង យ៉ុង ប្រធានក្រុមហ៊ុន TopBrand Union, ស្ថាបនិក Baiyi Club បានមានប្រសាសន៍ថា​ សម្ព័ន្ធធុរកិច្ច​ Baiyi Club បានបង្កើតទ្បើងតាំងពីឆ្នាំ១៩៩៦ ដើម្បីចងក្រងជាសម្ព័ន្ធធុរកិច្ចចិនផ្តោតទៅលើការអភិវឌ្ឍម៉ាកយីហោ (Brand) ឱ្យមានលក្ខណៈអន្តរជាតិ ជាពិសេសការស្វែងរកទីផ្សារដែលទើបតែងើបទ្បើង។ បច្ចុប្បន្ន Baiyi Club មានសមាជិកជាសហគ្រាសធំៗជាច្រើន ដែលមានកម្មវត្ថុអាជីវកម្មក្នុងវិស័យមួយចនួនដូចជា យានយន្ត បរិស្ថាន មូលប័ត្រ និងការផលិតបរិក្ខារវេជ្ជសាស្ត្រ។ល។

លោក វ៉ាង យ៉ុង (Wang Yong) បានធ្វើការកត់សម្គាល់ថាកម្ពុជាមានកណើនសេដ្ឋកិច្ចយ៉ាងឆាប់រហ័ស, មានស្ថិរភាពនយោបាយ, សំបូរធនធានធម្មជាតិ ហើយមានទីតាំងភូមិសាស្ត្រអំណោយផលដល់ការទាក់ទាញវិនិយោគ។ ឆ្លៀតក្នុងឱកាសនេះ សមាជិកគណៈប្រតិភូក៏បានសម្តែងនូវចំណាប់អារម្មណ៍របស់ខ្លួន និងបានសួរនូវសំណួរពាក់ព័ន្ធនឹងការវិនិយោគក្នុងវិស័យមួយចំនួន។ ជារួម សមាជិកគណៈប្រតិភូបានកត់សម្គាល់ឃើញថា កម្ពុជាមាន ហេដ្ឋារចនាសម្ព័ន្ធល្អប្រសើរ ហើយបរិស្ថានវិនិយោគនៅកម្ពុជាពិតជាមានភាពអំណោយផល។ លើសពីនេះ សមាជិកគណៈប្រតិភូបានបង្ហាញឆន្ទៈយ៉ាងមុតមាំក្នុងការបណ្តាក់ទុនវិនិយោគនៅកម្ពុជាផងដែរ ។

បើតាមរបាយការណ៍របស់​ក្រុមប្រឹក្សាអភិវឌ្ឍន៍កម្ពុជា​ចេញផ្សាយ​កាលពីដើម​ខែវិច្ឆិកា ២០២៥ ឱ្យដឹងថា ក្នុង​រយៈពេល១០ខែ ​ឆ្នាំ២០២៥ កម្ពុជា​បានចុះបញ្ជីគម្រោ​ងវិនិយោគ​ចំនួន៥៧៥​គម្រោង​ ដែលមានដើមទុនចុះបញ្ជីប្រមាណ៩,២ពាន់លានដុល្លារអាមេរិក ហើយក្នុង​ចំណោមទុនវិនិយោគទាំង​៩,២ពាន់លានដុល្លារអាមេរិក​នេះ គ្រាន់តែប្រភពទុនវិនិយោគមកពីប្រទេស​ចិន​មានរហូតដល់​៥២,៣៨ភាគរយ ឈរលំដាប់ទី១ដែលមានវិនិយោគិន​វិនិយោគច្រើនជាងគេ​នៅកម្ពុជា ៕