សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ប្រមុខរាជរដ្ឋាភិបាលកម្ពុជា ក្នុងសន្និបាតបូកសរុបលទ្ធផលការងាររបស់ក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ កាលពីថ្មីៗនេះបានដាក់ចេញគោលនយោយបាយក្នុងការជួយគាំទ្រសហគ្រាស SME និងអង្គភាពសេដ្ឋកិច្ចក្រៅប្រព័ន្ធ តាមរយៈការលើកទឹកចិត្ត និងការអនុគ្រោះពន្ធផ្សេងៗ ដែលជាគោលដៅដើម្បីបង្កើតកម្លាំងសរុបរួមលើការអភិវឌ្ឍមូលដ្ឋានសេដ្ឋកិច្ច ខណៈដែលមូលដ្ឋានសេដ្ឋកិច្ចជាតិរឹងមាំដោយសារវិស័យឯកជន។
សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងពីការគាំទ្រដល់ដំណើរការសហគ្រាស SME ដែលជាគ្រឹះសម្រាប់ការបង្កើតការងារ និងជំរុញដល់ការអភិវឌ្ឍសេដ្ឋកិច្ច និងសង្គម។ វិស័យ SME ជាមូលដ្ឋានបង្កើតការងារ ដែលចាំបាច់ត្រូវមានការគាំទ្រ និងការយកចិត្តទុកដាក់។ បច្ចុប្បន្ននេះភាគរយនៃការផ្តល់ការងារក្នុងប្រទេសជាង៧០% បានពីវិស័យ SME។
យោងតាមរបាយការណ៍ប្រចាំឆ្នាំ២០២៣ របស់ក្រសួងឧស្សាហកម្ម បច្ចេកវិទ្យា វិទ្យាសាស្រ្ត និងនវានុវត្តន៍ បានបង្ហាញថា សហគ្រាសធុនតូច និងមធ្យម ថ្មីៗ ដែលបានចុះបញ្ជីមានចំនួន ១,៤០៦ បានបង្កើតការងារថ្មីចំនួន ២០,៦៨៣ ដែលបានបង្កើនឱកាសការងារសរុបចំនួន ៤៦៣ ៩៦៦ កន្លែង (ស្ត្រី ១៣៥,២៩០ នាក់) សម្រាប់ប្រជាជនកម្ពុជា កើនឡើង ២.៨៦ ភាគរយធៀបនឹងឆ្នាំ២០២២ ពោលគឺកើនដល់ ៤៤៦២៨មូលដ្ឋាន។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានអះអាងថា ការចុះបញ្ជីសហគ្រាសធុនតូច និងមធ្យមថ្មីនេះ បានមកពីការខិតខំប្រឹងប្រែងរបស់រដ្ឋាភិបាល ។ កិច្ចខិតខំប្រឹងប្រែងទាំងនេះបានឆ្លុះបញ្ចាំងពីការប្តេជ្ញាចិត្តរបស់ក្រសួងក្នុងការអភិវឌ្ឍសហគ្រិន និងការជំរុញបរិយាកាសល្អសម្រាប់កំណើនអាជីវកម្ម។
សម្តេចធិបតី ហ៊ុន ម៉ាណែត បានថ្លែងថា គោលដៅរបស់រដ្ឋាភិបាលនីតិកាលទី ៧ ធ្វើយ៉ាងណាជំរុញបង្កើតការងារឱ្យបានច្រើនដល់ពលរដ្ឋ ជាមួយការដាក់ចេញគោលនយោយបាយអភិវឌ្ឍសេដ្ឋកិច្ចប្រកបចីរភាព និងភាពធន់។ ប្រទេសរីកចម្រើនទាល់តែចំណូលប្រជាជនម្នាក់កើនដល់ចំណុចមួយសមរម្យ និងខ្ពស់។ ក្រៅពីបង្កើតការងារ ហើយការងារនោះអាចទាញចំណូលបានខ្ពស់ទើបមាននិរន្តរភាព និងភាពធន់។
ដូច្នេះដើម្បីគាំទ្រផ្នែកហិរញ្ញវត្ថុ រាជរដ្ឋាភិបាលកម្ពុជា បានសម្រេចចិត្តបង្កើត SME Bank ធនាគារសហគ្រាសធុនតូច និងមធ្យម ជាធនាគារពាណិជ្ជ ដោយមានគោលបំណង និងទិសដៅជាយុទ្ធសាស្ត្ររបស់ធនាគារ ស្របនឹងគោលនយោបាយដែលកំណត់ដោយរដ្ឋាភិបាល។
ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ត្រូវជំរុញឱ្យមានការបង្កើតក្រុមសហគ្រាសធុនតូច និងមធ្យម ដើម្បីជួយកសិករលក់ផលិតផល ទៅកាន់ផលិតកម្មក្នុងស្រុក រួមចំណែកដល់ការនាំចេញផលិតផលសម្រេច ខណៈធនាគារសហគ្រាសធុនតូច និងមធ្យម បានបង្កើនការផ្តល់ប្រាក់កម្ចីប្រមាណជាង ២០០ លានដុល្លារអាមេរិកដល់សហគ្រាសធុនតូច និងមធ្យម ។
ក្នុងទំហំទឹកប្រាក់នេះក៏នឹងរួមបញ្ចូលផងដែរនូវបរិក្ខារធុរកិច្ច បរិក្ខារសម្រាប់កម្មករនិយោជិត និងសេវាកម្មគាំទ្រផ្សេងទៀត ដូចជាសេវាកម្ម គណនេយ្យ ធនធានមនុស្ស ទីផ្សារ និងបច្ចេកវិទ្យាព័ត៌មាន ការបញ្ចូលមុខដំណើរការ ការផ្តល់ប្រឹក្សាផ្នែកហិរញ្ញវត្ថុ និងសេវាកម្មកម្ចីក្នុងចំណោមសេវាកម្មផ្សេងៗទៀត៕
Account
Security
Favourite Content