សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កសិផលធម្មជាតិស្រស់ៗ មិនត្រឹមតែមានទីផ្សារល្អ និងផ្គត់ផ្គង់តម្រូវការក្នុងស្រុកប៉ុណ្ណោះទេ គេក៏អាចកែច្នៃទៅជាផលិតកសិផលក្រៀម ឬផលិតសម្ងួតផ្សេងទៀតដែលអាចរក្សាទុកបានយូរ គុណភាពល្អ រស់ជាតិឆ្ងាញ់ និងកាន់តែមានទីផ្សារទូលាយរហូតអាចនាំចេញទៅក្រៅប្រទេសបានទៀតផង។
បើតាម ឯកឧត្តមបណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនាភូមិមួយផលិតផលមួយនៃទីស្ដីការគណៈរដ្ឋមន្ដ្រីបានមានប្រសាសន៍ទាក់ទងនឹងផលិតផលមួយចំនួនថា ផលិតលក្នុងស្រុកដែលមានសក្ដានុពលក្នុងការនាំចេញ ភាគច្រើនជាផលិតផលកែច្នៃ និងផលិតសម្ងួតដែលមានស្តង់ដារ មានអនាម័យ គុណភាពល្អ និងសុវត្ថិភាពដល់អ្នកទិញ។
ឯកឧត្ដមបញ្ជាក់ថា៖
«ផលិតផលក្នុងស្រុករបស់យើងមានច្រើន ហើយផលិតផលដែលមានសក្ដានុពលខ្ពស់ក្នុងការនាំចេញភាគច្រើនជាផលិតផលកែច្នៃពីកសិផលស្រស់ៗ ដូចជា ប្រភេទម្សៅរមៀត ម្សៅពន្លៃ ម្សៅរំដេង ស្វាយក្រៀម មៀនក្រៀម ក្រៅពីនេះក៏មាន ទឹកត្រី ទឹកស៊ីអ៊ីវ ក៏យើងអាចនាំចេញបានដែរ»។
ឯកឧត្តមបន្តថា ចំពោះគុណភាពវិញ រាល់ផលិតផលកែច្នៃទាំងនេះ សុទ្ធសឹងជាផលិតផលច្នៃចម្រាញ់ពីកសិផលធម្មជាតិតាមតំបន់ផ្សេងៗគ្នាទូទាំងប្រទេស អាស្រ័យទៅលើភាពអំណោយផលតាមស្រុកភូមិរៀងៗខ្លួន ប៉ុន្តែអាចនិយាយបានថា ជាផលិតកែច្នៃដែលមានគុណភាព សុវត្ថិភាព ជាពិសេសផលិតផលបំប៉នដល់សុខភាពអ្នកប្រើប្រាស់ ដូចជា ម្សៅរមៀតជាដើម។
សម្រាប់ម្ចាស់សិប្បកម្ម ក៏ដូចជាម្ចាស់សហគ្រាសនានា ឆ្លៀតក្នុងឱកាសនេះគួរតែខិតខំពង្រឹងគុណភាពផលិតផលរបស់ខ្លួន ក៏ដូចជាស្វះស្វែងរកនូវការកែច្នៃថ្មីៗឱ្យបានកាន់តែច្រើន កាត់បន្ថយការជន់កសិផលពេលដល់រដូវប្រមូលម្ដងៗ និងជួយគាំទ្រដល់កសិករ ក្រុមអ្នកផលិត និងអ្នកពាក់ព័ន្ធទាំងអស់នៅក្នុងខ្សែចង្វាក់ផលិតកម្មនីមួយៗ។
ដោយឡែក ពីសំណាក់អ្នកប្រើប្រាស់ ក៏ដូចជាអតិថិជនវិញ ក៏គួរតែគាំទ្រនូវផលិតផលក្នុងស្រុក ឬតាមតំបន់ផ្សេងៗគ្នាបន្ថែមទៀត មិនថាជាកសិផលស្រស់ៗ ឬកែច្នៃនោះទេ ព្រោះរាល់ការទិញរបស់អតិថិជន មិនថាទិញដោយផ្ទាល់ ឬនៅតាមបណ្ដាផ្សារម៉ាត ផ្សារកសិផលដែលយកមកលក់បន្ត សុទ្ធសឹងជាសកម្មភាពគាំទ្រដល់កសិករ ក៏ដូចជាអ្នកផលិតក្នុងស្រុក និងសេដ្ឋកិច្ចជាតិផ្ទាល់តែម្ដង៕
Account
Security
Favourite Content