បរទេស៖ ទីផ្សារថាមពលសកលនៅតែស្ថិតក្នុងហានិភ័យដោយសារជម្លោះ និងភ្លើងសង្គ្រាមនៅមជ្ឈិមបូព៌ា ដែលធ្វើឲ្យប្រទេសនៅជាប់ឈូងសមុទ្រជាច្រើនផ្អាកការផលិតប្រេង និងឧស្ម័ន ដែលធ្វើឲ្យតម្លៃថាមពលទាំងនេះឡើងថ្លៃដល់កម្រិតខ្ពស់ក្នុងរយៈពេលប៉ុន្មានថ្ងៃចុងក្រោយនេះ នេះបើយោងតាមសេចក្ដីរាយការណ៍ពី Al Jazeera ។

ចាប់តាំងពីមានការវាយប្រហារគ្នាដោយអាម៉េរិក និងអ៊ីស្រាអែលទៅលើអ៊ីរ៉ង់មក ហេដ្ឋារចនាសម្ព័ន្ធជាច្រើនរួមមាន សណ្ឋាគារ អាកាសយានដ្ឋាន និងកន្លែងផលិតថាមពលត្រូវរងការបំផ្លិចបំផ្លាញ ជាពិសេស ចរាចរណ៍នៅច្រកសមុទ្រ Hormuz ត្រូវបានផ្អាក។ ការវាយប្រហារនាពេលថ្មីៗនេះបានបំផ្លាញហេដ្ឋារចនាសម័្ពន្នផលិតជាច្រើនដូចជា៖ ទី១. រោងចក្រចម្រាញ់ប្រេង Ras Tanura, អារ៉ាប៊ីសាអូឌីត៖ រោងចក្រចម្រាញ់ប្រេង Ras Tanura ដែលជាកម្មសិទ្ធិរបស់ Saudi Aramco និងជាកន្លែងចម្រាញ់ប្រេងដ៏ធំបំផុតមួយរបស់ពិភពលោក ត្រូវបានបង្ខំឱ្យបញ្ឈប់ប្រតិបត្តិការបន្ទាប់ពីរងការបំផ្លាញពីយន្តហោះគ្មានមនុស្សបើករបស់អ៊ីរ៉ង់។ Saudi Aramco គឺជាក្រុមហ៊ុនដ៏ធំបំផុតមួយរបស់ពិភពលោក ដែលមានមូលធនប័ត្រទីផ្សារលើសពី ១,៧ ទ្រីលានដុល្លារ និងប្រាក់ចំណូលចំនួន ៤៨០ ពាន់លានដុល្លារ។ ក្រុមហ៊ុននេះមានសមត្ថភាពផលិតប្រេងច្រើនជាង ១២ លានបារ៉ែលក្នុងមួយថ្ងៃ ឬ ស្មើរនឹង ១២%​ នៃផលិតកម្មសកល។

ទី២. ទីក្រុងឧស្សាហកម្ម Ras Laffan, កាតា៖ អ៊ីរ៉ង់បានកំណត់គោលដៅវាយប្រហារដោយយន្តហោះគ្មានមនុស្សបើកលើរោងចក្រថាមពលមួយនៅទីក្រុងឧស្សាហកម្ម Ras Laffan ដែលជាបណ្តុំកន្លែងផលិតឧស្ម័នធម្មជាតិរាវ (LNG)។ ទីក្រុងឧស្សាហកម្ម Ras Laffan គឺជាកម្មសិទ្ធិរបស់ក្រុមហ៊ុន QatarEnergy ដែលជាអ្នកផលិត LNG ដ៏ធំបំផុតរបស់ពិភពលោក។ ទោះបីជាគ្មានរបាយការណ៍អំពីអ្នកស្លាប់ និងរបួសក្តី ប៉ុន្តែក្រុមហ៊ុនបានផ្អាកការផលិត LNG និងផលិតផលផ្សេងទៀតនៅកន្លែងដែលរងផលប៉ះពាល់។ ការនាំចេញឧស្ម័នធម្មជាតិរាវ (LNG) របស់​ QatarEnergy មានចំនួន ៨១ លានតោនដែលភាគច្រើនទៅកាន់ទីផ្សារអាស៊ីរួមមាន ប្រទេសចិន ជប៉ុន ឥណ្ឌា កូរ៉េខាងត្បូង ប៉ាគីស្ថាន និងប្រទេសផ្សេងទៀតនៅក្នុងតំបន់។ ការ​ផ្អាក​ផលិតកម្ម​បានជំរុញឲ្យតម្លៃ​​ឧស្ម័ន​ឡើងថ្លៃ​ដល់​កម្រិត​ខ្ពស់​រយៈពេល​បី​ឆ្នាំ។

ទី៣. ទីក្រុងឧស្សាហកម្ម Mesaieed, កាតា៖ ក្រសួងការពារជាតិរបស់កាតា រាយការណ៍ថា ការវាយប្រហារដោយយន្តហោះគ្មានមនុស្សបើកលើកទីដោយអ៊ីរ៉ង់ បានបំផ្លាញធុងស្តុកទឹកដែលជាកម្មសិទ្ធិរបស់រោងចក្រថាមពលនៅ Mesaieed។ ក្រោយក QatarEnergy ក៏​បាន​បញ្ឈប់​ការ​ផលិតមួយចំនួនដែលត្រូវការទឹក​ជាចម្បងរួមមាន៖ អ៊ុយ ប៉ូលីមែរ មេតាណុល អាលុយមីញ៉ូម និង​ផលិតផល​ផ្សេង​ទៀត។

ទី៤. ស្ថានីយ៍ប្រេង Fujairah និង Mussafah, អារ៉ាប់រួម៖ ស្ថានីយ៍ប្រេងឥន្ធនៈ Mussafah នៅភាគនិរតីនៃទីក្រុង Abu Dhabi ត្រូវបានរងអគ្គីភ័យឆាបឆេះដោយសារយន្តហោះគ្មានមនុស្សបើក។ មិនត្រឹមតែប៉ុណ្ណោះ បំណែកកម្ទេចកម្ទី​ធ្លាក់​ចុះ​ពី​លើមេឃ​​បណ្តាល​ឲ្យ​មាន​ភ្លើង​ឆេះ​នៅ​ស្ថានីយ​ប្រេង Fujairah នៅ​តាម​បណ្តោយ​ឆ្នេរ​ភាគ​ខាង​កើត​នៃ​​អារ៉ាប់រួមផងដែរ។

ទី៥. កំពង់ផែ Duqm និង Salalah, អូម៉ង់៖ កាលពីថ្ងៃអង្គារ៍ យន្តហោះគ្មានមនុស្សបើករបស់អ៊ីរ៉ង់ជាច្រើនគ្រឿងបានវាយប្រហារនៅកំពង់ផែ Duqm ដែលធ្វើឲ្យកប៉ាល់ដឹកប្រេងយ៉ាងហោចណាស់មួយបុកធុងស្តុកផ្ទុកប្រេង បណ្តាលឱ្យមានការផ្ទុះ ឆាប់ឆេះ។ នៅថ្ងៃដដែលនោះ យន្តហោះគ្មានមនុស្សបើកបានវាយប្រហារទៅកំពង់ផែ Salalah ដែលជាកន្លែងគ្រប់គ្រងប្រេងឥន្ធនៈ និងរ៉ែផងដែរ។

ទី៦. នាវាដឹកប្រេងរបស់ Athe Nova, ហុងឌូរ៉ាស៖ កាលពីថ្ងៃចន្ទ កប៉ាល់ដឹកប្រេងរបស់ Athe Nova ដែលមានទង់ជាតិហុងឌូរ៉ាសត្រូវបានវាយប្រហារដោយយន្តហោះគ្មានមនុស្សបើករបស់អ៊ីរ៉ង់ និងបណ្តាលឱ្យឆាបឆេះ ខណៈដែលវាកំពុងឆ្លងកាត់ច្រកសមុទ្រ Hormuz។ ទោះបីជាមានអគ្គីភ័យក៏ដោយ កប៉ាល់នេះអាចគ្រប់គ្រងហានិភ័យបានដោយចេញតាមឈូងសមុទ្រអូម៉ង់ ហើយមិនមានអ្នកស្លាប់ និងរបួសនោះទេ។ ការវាយប្រហារចំនាវាដឹកប្រេងរបស់ Athe Nova បានធ្វើឲ្យអ៊ីរ៉ង់ប្រកាសបិទច្រកសមុទ្រ Hormuz ដោយព្រមានថា កប៉ាល់ណាដែលឆ្លងកាត់អាចនឹងត្រូវរងការវាយប្រហារ។ ចាប់​តាំង​ពី​ពេល​នោះ​មក នាវា​ដឹក​ប្រេងមួយចំនួន​ផ្សេង​ទៀតត្រូវបានរងការប្រហារផងដែរ​។

ជម្លោះនេះកំពុងរំខានដល់ឧស្សាហកម្មថាមពលក្នុងកន្លែងផ្សេងទៀត ទោះបីជាមិនបានកំណត់គោលដៅដោយផ្ទាល់ក៏ដោយ។ ជាក់ស្តែង កន្លែងផលិតឧស្ម័ននៅឈូងសមុទ្រអ៊ីស្រាអែលដូចជា Leviathan និង Tamar ត្រូវបានបិទក្រោមវិធានការប្រុងប្រយ័ត្ន បន្ទាប់ពីការបាញ់បង្ហោះដ្រូន និងមីស៊ីលក្នុងតំបន់។ លើសពីនេះ កន្លែងផលិតប្រេងនៅតំបន់ Kurdistan ដែលមានអ្នកផលិតដូចជា DNO, Gulf Keystone និង Dana Gas បានបញ្ឈប់ការផលិត។​ អណ្តូងប្រេងដ៏ធំបំផុតរបស់អ៊ីរ៉ាក់ Rumaila ត្រូវបានបញ្ឈប់ប្រតិបត្តិការផងដែរ។

គួរឲ្យបញ្ជាក់ដែរថា មជ្ឈិមបូព៌ាគឺជាប្រភពទុនបំរុងអ៊ីដ្រូកាបូនដ៏សំខាន់របស់ពិភពលោក ហើយក៏ជាអ្នកនាំចេញប្រេងឆៅ​ និងឧស្ម័នធំមួយផងដែរ។ តំបន់នេះមានស្តុកប្រេងធំជាងគេចំនួនប្រាំក្នុងចំណោមប្រេងចំនួនប្រាំពីរនៅលើពិភពលោក។ បន្ទាប់ពីវេណេហ្ស៊ុយអេឡាដែលមានទុនបម្រុងប្រេងធំជាងគេ ៣០៣ ពាន់លានបារ៉ែល អារ៉ាប៊ីសាអូឌីតមានស្តុកទុកប្រេងឆៅធំបំផុតទីពីរមានចំនួនប្រហែល ២៦៧ ពាន់លានបារ៉ែល។ ទុនបម្រុងប្រេងធំបំផុតនៅមជ្ឈិមបូព៌ារួមមាន៖ អារ៉ាប៊ីសាអូឌីត ២៦៧ ពាន់លានបារ៉ែល, អ៊ីរ៉ង់៖ ២០៩ ពាន់លានបារ៉ែល, អ៊ីរ៉ាក់ ១៤៥ ពាន់លានបារ៉ែល, អារ៉ាប់រួម ១១៣ ពាន់លានបារ៉ែល, គុយវ៉ែត៖ ១០២ ពាន់លានបារ៉ែល។ យោងតាមទិន្នន័យពី Observatory of Economic Complexity (OEC) បានបង្ហាញពីអ្នកនាំចេញប្រេងកំពូលនៅមជ្ឈិមបូព៌ារួមមាន៖ អារ៉ាប៊ីសាអូឌីត ១៨៧ ពាន់លានដុល្លារ, អារ៉ាប់រួម៖ ១១៤ ពាន់លានដុល្លារ, អ៊ីរ៉ាក់៖ ៩៨ ពាន់លានដុល្លារ, អ៊ីរ៉ង់ ៤៧ ពាន់លានដុល្លារ (ការលក់ភាគច្រើនក្នុងការបញ្ចុះតម្លៃ ដោយសារតែទណ្ឌកម្មរបស់អាម៉េរិក), គុយវ៉ែត៖ ២៩ ពាន់លានដុល្លារ, អូម៉ង់ ២៨,៩ ពាន់លានដុល្លារ និងកាតា ២១ ពាន់លានដុល្លារ)។

ក្រៅពីប្រេងឆៅ មជ្ឈិមបូព៌ាគឺជាអ្នកផលិតឧស្ម័នធម្មជាតិដ៏ធំមួយដែលមានចំណែកជិត ១៨% នៃផលិតកម្មសកល និងប្រហែល ៤០% ភាគរយនៃទុនបម្រុងសរុបរបស់ពិភពលោក។ ឧស្ម័នធម្មជាតិត្រូវបានប្រើប្រាស់ជាចម្បងសម្រាប់ផលិតអគ្គិសនី កំដៅឧស្សាហកម្ម និងក្នុងសារធាតុគីមី និងជី។ ការនាំចេញឧស្ម័ន​ត្រូវ​បាន​ដឹក​ជញ្ជូន​តាម​បំពង់​បង្ហូរ​ប្រេង ឬ​តាម​កប៉ាល់។ មិនត្រឹមតែប៉ុណ្ណោះ ទាំងការដឹកជញ្ជូនប្រេង និងឧស្ម័នត្រូវឆ្លងកាត់ច្រកសមុទ្រ Hormuz ឆ្ពោះទៅកាន់ទីផ្សារធំៗនៅអាស៊ីរួមមាន ប្រទេសចិន ជប៉ុន កូរ៉េខាងត្បូង និងឥណ្ឌា ក៏ដូចជាទៅកាន់ទ្វីបអឺរ៉ុបផងដែរ៕