សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា ប្រធានាធិបតីកូរ៉េខាងត្បូង លោក Yoon Sukyeol បានប្រកាសច្បាប់អាជ្ញាសឹកទាំងយប់ជាលើកដំបូងក្នុងរយៈពេលជាង ៤៤ ឆ្នាំ ដែលបង្កឱ្យមានភាពចលាចលនៅក្នុងប្រទេស និងបង្កការភ្ញាក់ផ្អើលជាខ្លាំងនៅជុំវិញពិភពលោក។
កាលពីយប់ថ្ងៃអង្គារ ប្រធានាធិបតីកូរ៉េខាងត្បូង លោក Yoon Suk Yeol បានប្រកាសច្បាប់អាជ្ញាសឹកដាក់ប្រទេសក្នុងគ្រាអាសន្ន ដោយចោទប្រកាន់ថា គណបក្សប្រឆាំងបានគាំទ្រកូរ៉េខាងជើង និងបង្កសកម្មភាពប្រឆាំងរដ្ឋ។ នៅក្នុងសេចក្តីប្រកាសដ៏គួរឱ្យភ្ញាក់ផ្អើលនេះ ប្រធានាធិបតីរូបនេះបានលើកឡើងថា ចលនារបស់គណបក្សប្រឆាំងដែលជាគណបក្សប្រជាធិបតេយ្យ (DPK) មានសំឡេងភាគច្រើននៅក្នុងសភាបានចោទប្រកាន់ព្រះរាជអាជ្ញាកំពូល និងបដិសេធសំណើថវិការបស់រដ្ឋាភិបាល។
ប្រធានាធិបតីកូរ៉េខាងត្បូង លោកYoon Suk Yeol បានចាត់ទុកសកម្មភាពរបស់ក្រុមប្រឆាំងថាជាសកម្មភាពប្រឆាំងនឹងរដ្ឋក្នុងគោលបំណងញុះញង់ឱ្យមានការបះបោរ។ មិនត្រឹមតែប៉ុណ្ណោះ ទង្វើនេះបានធ្វើឲ្យខូចដល់អភិបាលកិច្ច និងស្ថិរភាពរបស់ប្រទេស ហើយបានប្រែក្លាយរដ្ឋសភាទៅជាកន្លែងនៃឧក្រិដ្ឋជន។
ប្រធានាធិបតីកូរ៉េខាងត្បូង លោក Yoon Suk Yeol បានពណ៌នាអំពីច្បាប់អាជ្ញាសឹកថាជាវិធានការចាំបាច់មួយដើម្បីលុបបំបាត់កងកម្លាំងដែលគាំទ្រកូរ៉េខាងជើង។ ច្បាប់អាជ្ញាសឹក គឺជាការដាក់ប្រទេសក្នុងគ្រាមានអាសន្ន ដោយប្រទេសត្រូវស្ថិតក្រោមការគ្រប់គ្រងរបស់កម្លាំងយោធា ហើយពួកគេមានសិទ្ធិពេញលេញក្នុងការចាប់ឃាត់ខ្លួនដោយគ្មានដីកា។ ការសម្រេចចិត្តគឺដើម្បីការពារសេរីភាព និងសុវត្ថិភាពរបស់ប្រជាជន ធានានូវនិរន្តរភាពរបស់ប្រទេស និងរក្សាស្ថិរភាពដល់មនុស្សជំនាន់ក្រោយ។ ប្រធានាធិបតីរូបនេះធានាដល់សាធារណជនថា គាត់នឹងលុបបំបាត់កងកម្លាំងប្រឆាំងរដ្ឋ និងស្ដារប្រទេសឱ្យមានភាពប្រក្រតីវិញឲ្យបានលឿនតាមដែលអាចធ្វើទៅបាន។
លោក Yoon Suk Yeol មិនបានបញ្ជាក់ពីវិធានការជាក់លាក់ណាមួយដែលនឹងត្រូវធ្វើឡើងនោះទេ ប៉ុន្តែនៅក្នុងក្រឹត្យយោធាពេញលេញ គឺច្បាប់អាជ្ញាសឹកអាចហាមឃាត់រាល់សកម្មភាពនយោបាយ និងអនុញ្ញាតឱ្យមានការចាប់ខ្លួនដោយគ្មានដីកា។ ក្រឹត្យនេះក៏ហាមឃាត់ពីការប្រឆាំងលទ្ធិប្រជាធិបតេយ្យសេរី ការបះបោរ ហាមឃាត់ព័ត៌មានក្លែងក្លាយ និងបំភ្លៃមតិសាធារណៈផងដែរ។ មនុស្សដែលបំពានលើក្រឹត្យនេះអាចត្រូវបានចាប់ខ្លួនដោយមិនចាំបាច់មានដីកា។ ក្នុងឆ្នាំ១៩៨០ គឺជាលើកចុងក្រោយដែលប្រធានាធិបតីកូរ៉េខាងត្បូងបានប្រកាសច្បាប់អាជ្ញាសឹក ដោយសារការបះបោរទូទាំងប្រទេសដែលដឹកនាំដោយនិស្សិត និងសហជីពការងារ។
ភ្លាមៗបន្ទាប់ពីការប្រកាសរបស់ប្រធានាធិបតី មានការប៉ះទង្គិចគ្នារវាងសមាជិកសភាកូរ៉េខាងត្បូង និងអាជ្ញាធរនៅខាងក្រៅអគាររដ្ឋសភា ខណៈដែលសមាជិកសភាបានព្យាយាមរារាំងមិនឲ្យដាក់ប្រើប្រាស់ច្បាប់អាជ្ញាសឹក។ មិនត្រឹមតែប៉ុណ្ណោះ សមាជិកសភាកូរ៉េខាងត្បូងបានបោះឆ្នោតរារាំងក្រឹត្យច្បាប់អាជ្ញាសឹក ដោយសមាជិកសភាចំនួន ១៩០ នាក់ក្នុងចំណោម ៣០០ នាក់បានបោះឆ្នោតលុបចោលវិធានការនេះ។
យោងតាមប្រភពព័ត៌មានពី AP News បានឲ្យដឹងថា សភាបានបោះឆ្នោតលុបចោលសេចក្តីប្រកាសនេះ ដោយប្រធានរដ្ឋសភា Woo Won Shik បានប្រកាសថា ច្បាប់អាជ្ញាសឹកគឺមិនត្រឹមត្រូវនោះទេ ហើយសមាជិកសភានឹងការពារលទ្ធិប្រជាធិបតេយ្យជាមួយប្រជាជន។ ជាលទ្ធផល សភាកូរ៉េខាងត្បូងអនុម័តលើសំណើទាមទារឲ្យប្រធានាធិបតី Yoon Suk Yeol លុបចោលនូវច្បាប់អាជ្ញាសឹក។ ក្រោយមក បន្ទាប់ពីលោក Woo Won Shik បានអំពាវនាវឱ្យដកខ្លួនចេញ ប៉ូលិស និងទាហានបានចាប់ផ្តើមចាកចេញពីទីធ្លានៃសភា។
ទោះជាយ៉ាងណាក្តី មនុស្សជាច្រើនយល់ឃើញថា ប្រធានាធិបតីកូរ៉េខាងត្បូង Yoon Suk Yeol ឈានដល់ការប្រើប្រាស់ច្បាប់អាជ្ញាសឹក គឺដើម្បីឆ្លើយតបទៅនឹងព្រឹត្តិការណ៍នយោបាយជាបន្តបន្ទាប់។ គួរឲ្យបញ្ជាក់ដែរថា លោក Yoon Suk Yeol ដែលតំណាងឱ្យគណបក្សអំណាចប្រជាជនបានកាន់តំណែងជាប្រធានាធិបតីកូរ៉េខាងត្បូងចាប់តាំងពីឆ្នាំ២០២២។ ក្នុងតំណែងនេះ លោកបានប្រឈមមុខនឹងបញ្ហាជាច្រើនរួមមាន ការគំរាមកំហែងពីកូរ៉េខាងជើង ការកើនឡើងភាពតានតឹងរវាងដៃគូសំខាន់ៗរបស់កូរ៉េខាងត្បូង គឺសហរដ្ឋអាមេរិក និងចិន និងអត្រាកំណើតធ្លាក់ចុះ។ កាលពីដើមឆ្នាំនេះ លោកបានបាត់បង់អំណាចគ្រប់គ្រងសភា រដ្ឋាភិបាលរបស់គាត់ទទួលរងនូវចលនាប្រឆាំងជាបន្តបន្ទាប់ ដែលធ្វើឱ្យអំណាច និងប្រជាប្រិយភាពរបស់ប្រធានាធិបតីរូបនេះធ្លាក់ចុះ ខណៈដែលមានរឿងអាស្រូវពុករលួយផងដែរ។ ក្រុមអ្នកសង្កេតការណ៍នយោបាយយល់ឃើញថា លោក Yoon Suk Yeol ជំរុញឱ្យឈានដល់ការប្រើប្រាស់ច្បាប់អាជ្ញាសឹក គឺគ្រាន់តែជាលេសទប់ទល់ពីការវាយប្រហារនយោបាយតែប៉ុណ្ណោះ៕
Account
Security
Favourite Content