ភ្នំពេញ ៖ រាជរដ្ឋាភិបាល បានកំណត់ពិតាននៃការខ្ចីបំណុលពីស្ថាប័នហិរញ្ញវត្ថុ និងដៃគូអភិវឌ្ឍក្រៅប្រទេសមិនឱ្យលើសពី ១៣,៥ ប៊ីលានដុល្លារអាម៉េរិក ក្នុងរយៈពេល ៥ឆ្នាំខាងមុខ ដើម្បីប្រើប្រាស់សម្រាប់វិនិយោគលើវិស័យហេដ្ឋារចនាសម្ព័ន្ធសាធារណៈ។ នេះបើយោងតាមរបាយការណ៍យុទ្ធសាស្រ្ត ស្តីពីការគ្រប់គ្រងបំណុលសាធារណៈ ឆ្នាំ២០២៤-២០២៨ របស់ក្រសួងសេដ្ឋកិច្ច និងហិរញ្ញវត្ថុ ដែលចេញផ្សាយកាលពីពេលថ្មីៗនេះ។

របាយការណ៍បានឱ្យដឹងថា ការកំណត់ពិតាននៃការខ្ចីប្រចាំឆ្នាំ ដោយក្នុងនោះ ការខ្ចីពីស្ថាប័នហិរញ្ញវត្ថុ និងដៃគូអភិវឌ្ឍក្រៅប្រទេសក្នុងរង្វង់ ១,៧ ប៊ីលាន ទៅ ២ ប៊ីលាន អេសដេអ៊ែ ក្នុងមួយឆ្នាំ ហើយក្នុងកាលៈទេសៈចាំបាច់អាចបង្កើនដល់ ២,៥ ប៊ីលាន អេសដេអ៊ែ ក្នុងមួយឆ្នាំ ប៉ុន្តែមិនត្រូវលើសពី ១០ ប៊ីលាន អេសដេអ៊ែ (សមមូលនឹងប្រមាណ ១៣,៥ ប៊ីលានដុល្លារអាម៉េរិក) ក្នុងរយៈពេល ៥ឆ្នាំ។

កំណត់គោលការណ៍នៃការប្រើប្រាស់ហិរញ្ញប្បទានពីការខ្ចីប្រាក់ពីគេមានដូចតទៅ ៖ ចំពោះហិរញ្ញប្បទានដែលកៀរគរតាមរយៈការខ្ចីពីស្ថាប័នហិរញ្ញវត្ថុ និងដៃគូអភិវឌ្ឍក្រៅប្រទេស ត្រូវប្រើប្រាស់សម្រាប់វិនិយោគលើវិស័យហេដ្ឋារចនាសម្ព័ន្ធសាធារណៈ ដែលមានប្រសិទ្ធភាពសេដ្ឋកិច្ចខ្ពស់ ជាពិសេស ការបង្កើនផលិតភាពផលិតកម្ម, ការជំរុញការតភ្ជាប់, និងការលើកកម្ពស់សមត្ថភាពប្រកួតប្រជែង ដូចជា៖ ផ្លូវថ្នល់ ស្ពាន ប្រព័ន្ធស្រោចស្រព អគ្គិសនី កំពង់ផែ ការផ្គត់ផ្គង់ទឹកស្អាតនៅទីប្រជុំជន ប្រព័ន្ធប្រព្រឹត្តិកម្មទឹកកខ្វក់ ការបណ្តុះបណ្តាលវិជ្ជាជីវៈសម្រាប់ជំរុញការអភិវឌ្ឍវិស័យ ឧស្សាហកម្ម ឡូជីស្លឹក ឌីជីថល ជាដើម។

ទន្ទឹមនេះ គម្រោងវិនិយោគហេដ្ឋារចនាសម្ព័ន្ធសាធារណៈទាំងនោះត្រូវមានស្តង់ដា និងគុណភាពខ្ពស់ ស្របតាមគោលការណ៍គ្រឹះនៃការគ្រប់គ្រងការវិនិយោគសាធារណៈ ព្រមទាំងឆ្លើយតបទៅនឹងតម្រូវការនៃការអភិវឌ្ឍជាតិនៅក្នុងដំណាក់កាលថ្មី ពិសេស ធានាបាននូវចីរភាពសេដ្ឋកិច្ច សង្គម បរិស្ថាន និងភាពធន់ទៅនឹងការប្រែប្រួលអាកាសធាតុ។ បន្ថែមលើនេះ ចំពោះគម្រោងណាដែលអាចបង្កើតចំណូលដោយផ្ទាល់ ត្រូវអនុវត្តតាមយន្តការឱ្យខ្ចីបន្ត ឬយន្តការផ្សេងទៀត ដែលមានកំណត់ក្នុងលិខិតបទដ្ឋានគតិយុត្តជាធរមាន។

ក្រសួងសេដ្ឋកិច្ច បានឱ្យដឹងថា បើទោះជាប្រឈមនឹងវិបត្តិនៃជំងឺកូវីដ-១៩ និងភាពមិនប្រាកដប្រជានៃសេដ្ឋកិច្ចសកលក៏ដោយ ក៏កម្ពុជាអាចមានលទ្ធភាពគ្រប់គ្រងស្ថានការណ៍បានដោយជោគជ័យ ព្រមទាំងអាចស្តារសេដ្ឋកិច្ចកម្ពុជាឡើងវិញបានយ៉ាង ឆាប់រហ័ស ហើយស្ថានភាពបំណុលសាធារណៈរបស់កម្ពុជានៅតែមាន «ចីរភាព» និង «ហានិភ័យកម្រិតទាប» ដោយ រាល់សូចនាករបំណុលគន្លឹះៗទាំងអស់សុទ្ធតែស្ថិតក្រោមពិតានកំណត់ ក្នុងនោះ សូចនាករតម្លៃបច្ចុប្បន្ននៃបំណុលសាធារណៈក្រៅប្រទេសធៀបនឹង ផលិតផលសរុបក្នុងស្រុក (ផសស) ពីឆ្នាំ២០១៩ ដល់ឆ្នាំ២០២៣ មានជាមធ្យមត្រឹមរង្វង់ ១៨% ប៉ុណ្ណោះ ធៀបនឹងអនុបាតគោល ៤០%។

ក្រសួងសេដ្ឋកិច្ច បានឱ្យដឹងទៀតថា ទន្ទឹមនឹងការសម្រេចបាននូវលទ្ធផលខាងលើ និងក្នុងស្ថានការណ៍ដែលនយោបាយសកលនៅតែបន្តមានភាពផុយស្រួយ ហើយក្នុងបរិការណ៍ថ្មីនៃការវិវត្តឈានឡើងជាលំដាប់នៃសេដ្ឋកិច្ចកម្ពុជា ដែលក្នុងនោះកម្ពុជាមានសមត្ថភាពក្នុងការខ្ចីបន្ថែម មានលទ្ធភាពក្នុងការធ្វើពិពិធកម្មប្រភពហិរញ្ញប្បទានបន្ថែមតាមរយៈការបោះផ្សាយលក់ មូលបត្ររដ្ឋ និងពីវិស័យឯកជន និងមានដៃគូអភិវឌ្ឍជាច្រើនត្រៀមផ្តល់កិច្ចសហប្រតិបត្តិការ ព្រមទាំងដើម្បីគាំទ្រដល់ការអនុវត្តយុទ្ធសាស្ត្របញ្ចកោណ-ដំណាក់កាលទី១ រាជរដ្ឋាភិបាលចាំបាច់ត្រូវពិនិត្យឡើងវិញ និងធ្វើបច្ចុប្បន្នកម្មយុទ្ធសាស្ត្រស្តីពីការគ្រប់គ្រងបំណុលសាធារណៈ ឱ្យកាន់តែគត់មត់ និងគ្រប់ជ្រុងជ្រោយបន្ថែមទៀត។

ក្នុងន័យនេះ រាជរដ្ឋាភិបាលសម្រេចដាក់ឱ្យអនុវត្តនូវ “យុទ្ធសាស្ត្រស្តីពីការគ្រប់គ្រងបំណុលសាធារណៈ ២០២៤ – ២០២៨” ក្នុងគោលបំណងធានានូវប្រសិទ្ធភាព ស័ក្តិសិទ្ធភាព តម្លាភាព គណនេយ្យភាព និងចីរភាពនៃការគ្រប់គ្រងបំណុលសាធារណៈ រួមទាំងមូលបត្ររដ្ឋ សំដៅរួមចំណែកក្នុងការបង្កើនល្បឿននៃការធ្វើពិពិធកម្មសេដ្ឋកិច្ច និងពង្រឹងសមត្ថភាពប្រកួតប្រជែង ដែលជាមូលដ្ឋានគ្រឹះក្នុងការរក្សាបាននូវកំណើនសេដ្ឋកិច្ចខ្ពស់ប្រកប ដោយចីរភាព និងបរិយាប័ន្ន ឆ្ពោះទៅសម្រេចបង្គោលចរឆ្នាំ២០៣០ និងចក្ខុវិស័យកម្ពុជាឆ្នាំ២០៥០។

យុទ្ធសាស្ត្រនេះ មានវិសាលភាពគ្របដណ្តប់លើរាល់ប្រតិបត្តិការពាក់ព័ន្ធនឹងការគ្រប់គ្រងបំណុលសាធារណៈ (រួមមាន៖ ការខ្ចីប្រាក់ពីគេ ការឱ្យប្រាក់គេខ្ចី ការធានារបស់រដ្ឋ និងការគ្រប់គ្រងហានិភ័យបំណុល រួមទាំងកាតព្វកិច្ចបំណុលជាយថាហេតុ) និងការតាមដានលើស្ថានភាព និងនិន្នាការនៃបំណុលរបស់វិស័យឯកជន សំដៅរួមចំណែកគ្រប់គ្រងស្ថិរភាពម៉ាក្រូសេដ្ឋកិច្ច និងហិរញ្ញវត្ថុ ក្នុងរយៈពេលមធ្យម និងវែង។

គិតត្រឹមដំណាច់ឆ្នាំ២០២៣ កម្ពុជាមានសន្និធិបំណុលសាធារណៈសរុបចំនួនប្រមាណ ១១,២ ប៊ីលានដុល្លារអាម៉េរិក ដែលភាគច្រើនលើសលុបជាបំណុលសាធារណៈក្រៅប្រទេស មានចំនួនប្រមាណ ១១,១ ប៊ីលានដុល្លារអាម៉េរិក ស្មើនឹង ៩៩,៥% នៃសន្និធិសរុប ក្នុងនោះ៖ ក្របខ័ណ្ឌទ្វេភាគីប្រមាណ ៦៤% និងក្របខ័ណ្ឌពហុភាគីប្រមាណ ៣៦% ខណៈដែលបំណុលសាធារណៈក្នុងប្រទេស មានចំនួន ២១៤ ប៊ីលានរៀល សមមូលនឹងប្រមាណ ៥២ លានដុល្លារអាម៉េរិក ស្មើនឹង ០,៥% នៃសន្និធិសរុប៕