សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNA បានរាយការណ៍ថា ភាពជឿជាក់ និងការផ្តល់ទំនុកចិត្ត (សន្ទស្សន៍នៃមនោសញ្ចេតនា) ទៅលើវិស័យឧស្សាហកម្មទូទៅរបស់ថៃ បានធ្លាក់ចុះដល់កម្រិតទាបបំផុតក្នុងរយៈពេល ៣ ឆ្នាំចុងក្រោយ ដោយសារការព្រួយបារម្ភអំពីភាពមិនច្បាស់លាស់ទាំងផ្នែកនយោបាយក្នុងស្រុក ទាំងផ្នែករូបិយប័ណ្ណ(លុយបាត) ជាពិសេសអត្រាពន្ធគយរបស់អាម៉េរិក។
នៅព្រឹកថ្ងៃពុធសប្ដាហ៍នេះ សហព័ន្ធឧស្សាហកម្មថៃ បានបង្ហាញថា សន្ទស្សន៍នៃមនោសញ្ចេតនា ឬ ភាពជឿជាក់ និងទំនុកចិត្តទៅលើវិស័យឧស្សាហកម្មបានធ្លាក់ចុះពីពិន្ទុ ៨៦,៦ ក្នុងខែកក្កដា មកនៅត្រឹមពិន្ទុ ៨៦,៤ ក្នុងខែសីហា ដែលជាអត្រាទាបបំផុតក្នុងរយៈពេល ៣ ឆ្នាំ។ ការស្ទង់មតិនេះត្រូវបានធ្វើឡើងមុនពេលសភាបោះឆ្នោតជ្រើសរើស លោក Anutin Charnvirakul ជានាយករដ្ឋមន្ត្រីរយៈពេលខ្លី(៤ខែ) កាលពីដើមខែកញ្ញា ឆ្នាំ២០២៥នេះ។ គួរឲ្យបញ្ជាក់ដែរថា មនោសញ្ចេតនាឧស្សាហកម្មគឺជារង្វាស់នៃទំនុកចិត្តរបស់អាជីវកម្មនៅក្នុងឧស្សាហកម្មជាក់លាក់មួយ ដែលជាអារម្មណ៍ពាក់ព័ន្ធនឹងស្ថានភាពសេដ្ឋកិច្ច និងការរំពឹងទុករបស់ពួកគេនាពេលអនាគតតាមរយៈការស្ទង់មតិ។ វាជាសូចនាករសម្រាប់វាស់ស្ទង់ភាពជឿជាក់ទៅលើឧស្សាហកម្ម។ បើការវាស់ស្ទង់មតិបង្ហាញពីអារម្មណ៍វិជ្ជមាន នោះមានន័យថា ឧស្សាហកម្មមានការលូតលាស់ល្អ ប៉ុន្តែអារម្មណ៍អវិជ្ជមានវិញ វាបានបង្ហាញពីបញ្ហាប្រឈម និងការធ្លាក់ចុះសក្តានុពល។
អនុប្រធាន FTI លោក Nava Chantanasurakon លើកឡើងថា ៖
«ចំណុចល្អមួយដែលយើងជឿជាក់នោះ គឺគណៈរដ្ឋមន្ត្រីនេះមានអាណត្តិខ្លី ដែលនឹងធ្វើឱ្យរដ្ឋាភិបាលផ្តោតលើការងារដោយឧស្សាហ៍ព្យាយាម។ ប្រសិនបើមានការផ្តល់អាទិភាព និងអនុវត្តសំណើរបស់វិស័យឯកជនប្រកបដោយប្រសិទ្ធភាព នោះសន្ទស្សន៍នៅខែបន្ទាប់ៗនឹងមានភាពប្រសើរជាងក្នុងខែសីហា»។
នាយករដ្ឋមន្ត្រីថ្មីរបស់ថៃ លោក Anutin Charnvirakul បានបង្ហាញពីបំណងចង់ជំរុញសេដ្ឋកិច្ចដែលកំពុងជួបការលំបាក ជាមួយនឹងការប្តេជ្ញាថា នឹងព្យាយាមដោះស្រាយការឡើងថ្លៃរបស់ប្រាក់បាត។ ការឡើងថ្លៃនៃប្រាក់បាតដល់កម្រិតខ្ពស់ក្នុងរយៈពេល ៤ ឆ្នាំធៀបនឹងប្រាក់ដុល្លារបានធ្វើឱ្យមានការព្រួយបារម្ភអំពីការប្រកួតប្រជែងក្នុងចំណោមអាជីវកម្ម រួមទាំងអ្នកនាំចេញអង្ករផងដែរ។ នៅក្នុងឆ្នាំនេះ ប្រាក់បាតឡើងថ្លៃ ៨% ភាគរយធៀបនឹងប្រាក់ដុល្លារ។ ធនាគារកណ្តាលថៃ បានលើកឡើងថា ខ្លួនកំពុងពិចារណាវិធានការមួយចំនួនរួមមាន ពន្ធលើការជួញដូរមាសផងដែរ ដើម្បីទប់ទល់នឹងការឡើងថ្លៃបន្ថែមទៀត ខណៈដែលទីភ្នាក់ងារផែនការរដ្ឋបានព្យាករណ៍ថា កំណើនសេដ្ឋកិច្ចថៃអាចនឹងមានអត្រាចន្លោះពី ១,៨% ទៅ ២,៣% ប៉ុណ្ណោះនៅឆ្នាំនេះ ដែលទាបជាងកំណើន ២,៥% ក្នុងឆ្នាំ ២០២៤៕
Account
Security
Favourite Content