សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នៅក្នុងជំនួបជាមួយឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីរសៀលថ្ងៃទី ៥ ខែវិច្ឆិកា ឆ្នាំ២០២៤ អគ្គនាយកក្រុមហ៊ុន Samsung Pharm របស់កូរ៉េ បានសន្យាថានឹងខិតខំប្រឹងប្រែងជួយកម្ពុជាឱ្យលទ្ធភាពក្នុងការពង្រីកទីផ្សារ និងបង្កើតរោងចក្រនៅកម្ពុជាផ្ទាល់ដើម្បីរួមចំណែកជាមួយកម្ពុជាតាមរយៈការវិនិយោគលើវិស័យសុខាភិបាល កសិកម្ម និងផលិតផលគ្រឿងសំអាង ដែលអាចផ្ដល់ឱកាសការងារដលប្រជាជនកម្ពុជាបានកាន់តែច្រើន ។
លោក បានមានប្រសាសន៍ឱ្យដឹងថា ដំបូងឡើយក្រុមហ៊ុនរបស់លោកមានបុគ្គលិកតែ៥នាក់ប៉ុណ្ណោះ ប៉ុន្តែដោយមានការគាំទ្រពីប្រជាជនទូទៅ ជាពិសេស រាជរដ្ឋាភិបាលកម្ពុជា បច្ចុប្បន្នក្រុមហ៊ុនមានភាពរីកចម្រើនជាឱ្យកត់សម្គាល់ ដែលអាចបង្កើតឱកាសការងារសម្រាប់បុគ្គលិកជិត ១០០នាក់ នៅកម្ពុជា ។
លោកអគ្គនាយកក្រុមហ៊ុនមួយនេះ ក៏បានបញ្ជាក់ថា ក្រុមហ៊ុន Samsung Pharm មានសាខានៅប្រទេសវៀតណាម និងមីយ៉ាន់ម៉ា ហើយសម្រាប់កម្ពុជា ក្រុមហ៊ុនបានដំណើរការរយៈពេលជិតមួយឆ្នាំហើយ និងមានគម្រោងក្នុងការផ្ដល់ការងារដល់ប្រជាជនកម្ពុជាបានកាន់តែច្រើនថែមទៀត។ ចំពោះផែនការនាពេលខាងមុខ លោកនឹងពង្រីកទីផ្សារឱ្យបានកាន់តែធំ និងនាំចូលនូវផលិតផលល្អៗមកកម្ពុជា ជាពិសេសគម្រោងបង្កើតរោងចក្រនៅកម្ពុជាផ្ទាល់តែម្ដង ដើម្បីផលិត និងចែកចាយផលិតផលបន្ទះពិនិត្យសុខភាពបែបទំនើប។
ជាការឆ្លើយតប ឯកឧត្តមឧបនាយករដ្ឋមន្ត្រី សាយ សំអាល់ បានសាទរទៅនឹងកិច្ចដំណើរការ និងភាពរីកចម្រើនរបស់ក្រុមហ៊ុន ហើយសង្ឃឹមថាក្រុមហ៊ុន Samsung Pharm នឹងរីកលូតលាស់ទៅមុខទៀតក្នុងដំណើរការវិនិយោគនៅកម្ពុជា។
ឯកឧត្តមបានទាញចំណាប់អារម្មណ៍ដល់ប្រតិភូក្រុមហ៊ុន Samsung Pharm ថា ក្រសួងប្រៃសណីយ៍ និងទូរគមនាគមន៍ កំពុងរៀបចំនូវសួនឌីជីថលមួយ ហើយអ្វីដែលជាបច្ចេកទេសទាក់ទិននឹងការពិនិត្យសុខភាពដូចអ្វីដែលក្រុមហ៊ុនបានលើកឡើងនោះក៏ជាចំណែកមួយដែលក្រសួងប្រៃសណីយ៍ និងទូរគមនាគមន៍កំពុងតែគិតគូរលើចំណុចនេះដែរ។
ដោយឡែកផ្នែកសុខាភិបាល ឯកឧត្តម បានបន្តថាកម្ពុជាកំពុងតែគិតគូរលើយុទ្ធសាស្ត្រថ្មីដើម្បីជំរុញឱ្យវិស័យនេះកាន់តែប្រសើរឡើង ខណៈដែលបច្ចុប្បន្ន ប្រជាជនកម្ពុជាកាន់តែគិតគូរ និងយកចិត្តទុកដាក់ខ្ពស់លើបញ្ហាសុខភាពច្រើនជាងមុន ដូច្នេះប្រសិនបើក្រុមហ៊ុន Samsung Pharm អាចរៀបចំជាគ្លីនិក១នៅក្នុងប្រទេសកម្ពុជា ហើយបើកឱ្យប្រជាជនកម្ពុជាបានចូលពិនិត្យពិគ្រោះយោបល់ផ្នែកថែទាំសុខភាពនោះ ឯកឧត្តមឧបនាយករដ្ឋមន្ត្រីយល់ឃើញថាជាការល្អប្រសើរ និងអាចដំណើរការទៅមុខបានល្អ៕
Account
Security
Favourite Content