ភ្នំពេញ ៖ បន្ទាប់ពីទទួលបានជោគជ័យ​ដ៏ត្រចះត្រចង់លើការតាំងពិព័រណ៍ផលិតផលក្នុងស្រុក​កាលពី​អំឡុង​ខែកញ្ញា​ ឆ្នាំ២០២៥ កន្លងទៅនេះ សមាគមសម្ព័ន្ធសហគ្រាសធុន​តូច និងមធ្យមកម្ពុជា ​គ្រោងនឹង​រៀបចំព្រឹត្តិការណ៍នេះម្ដង​ទៀតនៅ​ថ្ងៃទី​០៥ ដល់ថ្ងៃទី០៧ ខែវិច្ឆិកា ឆ្នាំ២០២៥ខាងមុខនេះ ។​

នៅក្នុង​សន្និសីទសារព័ត៌មាន​កាលពីព្រឹកថ្ងៃទី​៣១ ខែតុលា ឆ្នាំ ២០២៥  លោកឧកញ៉ា តែ តាំង​ប៉​ ប្រធានសមាគម​សម្ព័ន្ធ​សហគ្រាស​ធុនតូច និងមធ្យម​កម្ពុជា ​បានមានប្រសាសន៍ថា ក្នុងព្រឹត្តិការណ៍​ពិព័រណ៍ផលិតផលខ្មែរ​លើកទី​១ កាលពីថ្ងៃទី​១១-១៣ ខែកញ្ញា ឆ្នាំ២០២៥ ឃើញថា ​មានប្រជាពលរដ្ឋ​កម្ពុជា​ជាច្រើន​ចូលរួមគាំទ្រ និងទិញផលិតផល​ខ្មែរ​ ហើយអ្នកចូលរួមដាក់តាំងបង្ហាញ និងលក់​ផលិតផលខ្មែរក៏បានបង្ហាញពីភាព​រីករាយ​ដែល​មានអ្នកគាំទ្រ​ផលិតផលរបស់ពួកគាត់ច្រើនមិននឹកស្មានដល់ ។​

លោកឧកញ៉ា​បន្តថា ​៖

«ខ្ញុំពិត​ជាមិននឹក​ស្មាន​ និង​មានការ​ភ្ញាក់ផ្អើល​ជាខ្លាំង​ក្រោយឃើញកំណើពលរដ្ឋខ្មែរ​ងាកមកគាំទ្រ​លើផលិតផល​ខ្មែរយ៉ាង​ច្រើន​សន្ធឹកសន្ធាប់ ជាក់ស្ដែង ​ក្នុងព្រឹត្តិការណ៍តាំងពិព័រណ៍ផលិតផល​ខ្មែរ​លើកទី​១ នៅក្នុងសាលពិព័រណ៍​ស្ទើរតែរក​កន្លែង​ដើរ​ពុំបាន ពីព្រោះតែមនុស្ស​ច្រើន​ពេក កកកុញស្វែងរកផលិតផល​ខ្មែរ​សម្រាប់ប្រើប្រាស់ប្រចាំថ្ងៃ ។ ដោយឃើញ​ពីកំណើន​នៃអ្នកគាំទ្រ​ផលិតផលខ្មែរ​ច្រើនយ៉ា​ងដូច្នេះ​ សមាគម​សម្ព័ន្ធសហគ្រាស​ធុន​តូច និងមធ្យមកម្ពុជា សម្រេច​រៀបចំព្រឹត្តិការណ៍នេះជាលើកទី២ ជាពិសេស​នោះគឺ​ចំថ្ងៃឈប់សម្រាក​នៃព្រះរាជពិធីបុណ្យអុំទូក បណ្ដែ​ត​​​ប្រទីព​ សំពះព្រះខែ និងអក​អំបុក តែម្ដង »។​

លោកឧកញ៉ា​បន្ថែមថា ការគាំទ្ររបស់ពលរដ្ឋខ្មែរ​នា​ពេលនេះ គឺកើតឡើង​ក្រោយពេល​ពលរដ្ឋ​ស្ទើរទូទាំងប្រទេស​ពហិការឈប់​ប្រើប្រាស់ទំនិញថៃ ហើយងាកមកទិញទំនិញខ្មែរ​វិញ ធ្វើ​ឱ្យ​ទំនិញខ្មែរ​លក់​ដាច់ខ្លាំង និងមានការគាំទ្រ​ខ្លាំង ។ យ៉ាងណាក៏ដោយ បើទោះបីជាផលិតផលខ្មែរ​មានការគាំទ្រ​ខ្លាំងពីពលរដ្ឋ​ក្ដី ក៏​លោក​ប្ដេជ្ញាថានឹង​ចូលរួម​ទប់ស្កាត់មិនឱ្យ​ទំនិញក្នុងស្រុកលក់ដំឡើង​ថ្លៃ​ ឬបន្ថយគុណភាពនោះទេ ផ្ទុយទៅវិញ ​មានតែពង្រឹង​គុណភាពបន្ថែម និង​រក្សា​តម្លៃដដែល​ ។

លោកឧកញ៉ា​​បានបញ្ជាក់ថា​ សម្រាប់ព្រឹត្តិការណ៍រយៈពេល​៣ថ្ងៃខាងមុខនេះ មាន​សហគ្រាស​ក្នុងស្រុក​រហូតដល់​២៧០​សហគ្រាស និង​បង្ហាញផលិតផល​ខ្មែរ​ប្រមាណ ៣០០​មុខ នៅ​មជ្ឈមណ្ឌល​ពិព័រណ៍​កោះពេជ្រ រាជធានីភ្នំពេញ ។ ទន្ទឹមនឹង​នេះ លោក​ឧកញ៉ា​ក៏បាន​អំពាវនាវ​ឱ្យពលរដ្ឋដែលចូលរួម​ក្នុងព្រឹត្តិ​ការណ៍ ទិញ​ទំនិញខ្មែរ ពិនិត្យ​ និងទិញ​ទំនិញដែលមាន​ស្លាក​សញ្ញា ( ច ប ផ ) ពោល គឺជា​ផលិតផល​ដែល​បាន​ចុះបញ្ជី​​នៅក្នុងក្រសួង​ត្រឹមត្រូវ ( ចុះបញ្ជីផលិតផល ) ។ ធ្វើ​ដូចនេះ គឺជាការ​គាំទ្រ​ដល់សហគ្រាស​ដែលបានចុះបញ្ជី​ និងជំរុញឱ្យក្រុមហ៊ុន ​ឬសហគ្រាស​មិនទាន់ចុះបញ្ជី ត្រូវទៅ​ចុះបញ្ជី​ទាំងអស់គ្នា ។​

ម្ចាស់​សហគ្រាស​ផលិតជ្រញ់​ពីឈើ​ម៉ៃសាក់​ដែលគ្រោង​នឹង​ដាក់​តាំងបង្ហាញផលិតផល​នៅក្នុងព្រឹត្តិ​កា​រ​ណ៍​​ពិព័រណ៍​នោះដែរក៏បានបញ្ជាក់ថា ដើម្បី​ចូលរួម​ដល់ការ​លើកទឹកចិត្តពលរដ្ឋឱ្យ​ងាកមកប្រើផលិត​ផលខ្មែរ​កាន់​តែច្រើន លោកនឹងដាក់ផលិតផលបញ្ចុះ​តម្លៃពិសេស​នៅក្នុងព្រឹត្តិការណ៍នោះ ដូច្នេះ ​ពលរដ្ឋខ្មែរ​ដែលចូលរួម​ក្នុងពិព័រណ៍នឹងទទួលការ​សន្សំ​សំចៃបន្ថែម​ ហើយបើតាមដឹង​ក៏មានក្រុមហ៊ុន​ និង​សហគ្រាស​ផ្សេង​ទៀតលក់​បញ្ចុះតម្លៃដូចគ្នាដែរ ។

គួរ​រម្លឹកថា ចាប់តាំងពីមានជម្លោះព្រំដែន​រវាងកម្ពុជា​ និងថៃ ជាពិសេស​ការបិទព្រំដែន​ជា​ឯកតោភាគីពីសំណាក់ភាគីថៃ និងឈានដល់ការ​ផ្ទុះប្រដាប់អាវុធ​ដាក់គ្នានៅព្រំដែន ពលរដ្ឋខ្មែរស្ទើរតែទូទាំង​ប្រទេស​បាន​ធ្វើពហិការឈប់ប្រើប្រាស់ផលិតផល​នាំចូលពីប្រទេស​ថៃ ហើយងាកមករកផលិតផល​ពីប្រទេស​ផ្សេង​ជំនួ​សវិញ ជាពិសេស​ផលិតផលក្នុងស្រុក ហើយក៏បានធ្វើឱ្យផលិតផល​ក្នុងស្រុក​មានតម្រូវការខ្លាំងជាងមុន ៕