សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៣០ ខែតុលា ឆ្នាំ២០២៥ បានអញ្ជើញជួបសំណេះសំណាលជាមួយប្រជាកសិករ ជាសមាជិកនៃសហគមន៍កសិកម្មទំនើបស្រូវប្រព័ន្ធធារាសាស្ត្រកង្ហត នៅស្រុកសង្កែ ដែលត្រៀមចាប់ផ្ដើមផលិតកម្មស្រូវស្រងែតាមកិច្ចសន្យាក្នុងតម្លៃ៩៥០រៀល ក្នុងមួយគីឡូក្រាម។
នៅក្នុងឱកាសចុះសំណេះសំណាល និងសួរសុខទុក្ខបងប្អូនប្រជាកសិករស្ថិតនៅក្នុងភូមិសាស្ត្រខាងលើនេះ ឯកឧត្តមរដ្ឋមន្រ្តី បានលើកទឹកចិត្តដល់ពុកម៉ែបងប្អូនដែលមិនទាន់ចូលជាសហគមន៍កសិកម្មទំនើប គួរពិចារណាចូលរួមចងក្រង ដើម្បីធ្វើការស្ដារមកវិញ និងទទួលបានអត្ថប្រយោជន៍ជាច្រើន ជាពិសេស ការធានាទីផ្សារ តម្លៃសមរម្យតាមការចុះកិច្ចសន្យាទុកមុន ការកាត់បន្ថយថ្លៃដើមផលិតកម្ម ការទទួលកម្ចីជាមួយអត្រាការប្រាក់ទាប និងការផ្ដល់ជំនួយបច្ចេកទេស។
នៅក្នុងថ្ងៃជាមួយគ្នានេះ ឯកឧត្តមរដ្ឋមន្រ្តី ឌិត ទីណា ក៏បានអញ្ជើញបន្តជួបសំណេះសំណាលជាមួយសមាជិកសហគមន៍កសិកម្មទំនើបស្រូវ-អង្ករសុវត្ថិភាពនៅស្រុកឯកភ្នំ ដែលចាប់ផ្ដើមផលិតកម្មស្រូវស្រងែស្រាលតាមការចុះកិច្ចសន្យាទុកមុន និងកំពុងត្រៀមខ្លួនដើម្បីធ្វើពិពិធកម្មមួយផ្នែកទៅរកការធ្វើដំណាំក្នុងផ្ទះសំណាញ់ ដើម្បីបង្កើនចំណូលឱ្យមានភាពចម្រុះជូនសមាជិកសហគមន៍។ បន្ថែមពីនេះ ឯកឧត្តម បានបន្តអញ្ជើញជួបសំណេះសំណាលជាមួយសមាជិកសហគមន៍កសិកម្មទំនើបស្រូវរូងជ្រៃមានជ័យ ស្ថិតនៅស្រុកថ្មគោល ខេត្តបាត់ដំបង។
គួរបញ្ជាក់ថា គោលដៅសហគមន៍ចុងក្រោយនៃដំណើរបេសកកម្មថ្ងៃនេះ គឺសហគមន៍កសិកម្មទំនើបដំណាំស្រូវចំនួន៥ ដែលក្រសួងបានប្រឹងប្រែងជ្រោមជ្រែងចងក្រងនៅខេត្តបាត់ដំបង បានចុះកិច្ចសន្យាផលិតកម្មស្រូវស្រងែស្រាលជាមួយក្រុមហ៊ុន វីរៈ ប៊ុនថាំ ក្នុងតម្លៃ ៩៥០៛/គីឡូក្រាម លើផ្ទៃដីដាំដុះជិត ៦៥០០ ហិកតា។
ក្រសួងកសិកម្ម នឹងបន្តគាំទ្រការចងក្រងសហគមន៍កសិកម្មទំនើបដើម្បីសម្រួលឱ្យពុកម៉ែបងប្អូនប្រជាកសិករធ្វើការស្ដារមកវិញ ហើយទទួលអត្ថប្រយោជន៍នៃការធានាទីផ្សារ និងតម្លៃសមរម្យតាមការចុះកិច្ចសន្យាទុកមុន ការជួយកាត់បន្ថយចំណាយថ្លៃដើម ការទទួលទុនកម្ចីមានការប្រាក់ទាប និងការផ្ដល់ជំនួយបច្ចេកទេសផងដែរ៕ ប្រភព៖ ក្រសួងកសិកម្ម
Account
Security
Favourite Content