ភ្នំពេញ៖ បន្ទាប់ពីបានពិភាក្សាយ៉ាងផុលផុសលើប្រធានបទទី១ -ស្ដីពី ប្រព័ន្ធគាំពារសង្គម ចាប់ពីព្រឹករហូតដល់ពេលរសៀល ថ្ងៃទី២ ខែមិថុនា ឆ្នាំ២០២៥ អង្គសមាជរដ្ឋសភា និងព្រឹទ្ធសភា បាន​គាំទ្រទាំងស្រុងនូវយុទ្ធសាស្រ្តដ៏ត្រឹមត្រូវរបស់រាជរដ្ឋាភិបាលក្នុងការអភិវឌ្ឍប្រព័ន្ធគាំពារសង្គម ដែលបានលើកកម្ពស់សុខុមាលភាព ជីវភាព ការអប់រំ និងសេវាសង្គមផ្សេងៗទៀតជូនប្រជាពលរដ្ឋដោយឈរលើស្មារតី “មិនបោះបង់ពលរដ្ឋណាម្នាក់” ។ អង្គប្រជុំសមាជរដ្ឋសភា និងព្រឹទ្ធសភា បានអនុម័តលើសេចក្តីសម្រេចស្ដីពីប្រព័ន្ធគាំពារសង្គមក្នុងសំឡេង១៨១សំឡេង លើ​១៨១​សំឡេង នៃចំនួនសមាជិកសមាជចូលរួមប្រជុំ។

ប្រព័ន្ធគាំពារសង្គម ជាប្រធានបទមួយក្នុងចំណោមប្រធានទចំនួនបីដែលសមាជរដ្ឋសភា និងព្រឹទ្ធសភាបានអនុម័តលើកយកមកប្រជុំពិភាក្សាតាមសំណើរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។

ក្នុងបទអន្តរាគមន៍នាសម័យប្រជុំសមាជរដ្ឋសភា និងព្រឹទ្ធសភា សម្តេចធិបតី ហ៊ុន ម៉ាណែត បានគូសបញ្ជាក់ថា ចាប់តាំងពីថ្ងៃរំដោះ៧មករា ឆ្នាំ១៩៧៩មក រដ្ឋាភិបាលបានទទួលខុសត្រូវស្តារជីវ​ភា​ពរស់នៅរបស់ប្រជាជន និងត្រូវការពារប្រទេសពីគ្រោះថ្នាក់នៃការវិលត្រលប់មកវិញនៃរបបប្រល័យពួជសាសន៍ផង សន្តិភាពពេញលេញដែលកើតចេញពីគោលនយោបាយឈ្នះឈ្នះរបស់សម្តេច​តេជោ ហ៊ុន សែន កាលពីឆ្នាំ១៩៩៨ ផង ។ ស្ថិរភាព និងការអភិវឌ្ឍក្រោមការដឹកនាំរបស់សម្តេចតេជោក្នុងរយៈពេល៤ទសវត្សរ៍មកនេះគឺជាលក្ខខណ្ឌចាំបាច់នៃការរីកចម្រើនដល់ប្រព័ន្ធគាំពារសង្គមបច្ចុប្បន្ននេះ។

រាជរដ្ឋាភិបាលនីតិកាលទី៧នៃរដ្ឋសភា បានបន្តអភិវឌ្ឍប្រព័ន្ធគាំពារសង្គមយ៉ាងស្វាហាប់ និងប្រកបដោយជំនឿជឿជាក់ក្នុងការដឹកនាំប្រទេសជាតិឆ្ពោះទៅកាន់គោលដៅឆ្នាំ២០៥០ ជាប្រទេសមានចំណូលកម្រិតខ្ពស់ ស្មើមុខ ស្មើមាត់ ជាមួយប្រទេសជឿនលឿនលើពិភពលលោក។ ប្រព័ន្ធគាំពារសង្គមត្រូវបានចាត់ជាអាទិភាពដូចមាននៅក្នុងយុទ្ធសាស្រ្តបញ្ចកោណដំណាក់កាលទី១៖ ការអភិវឌ្ឍមូលធនមនុស្ស ផ្នែកទី៤ ស្តីពីការពង្រឹងប្រព័ន្ធគាំពារសង្គម និងប្រព័ន្ធស្បៀងក្នុងគោលបំណងធានានិរន្តភាពនៃការអភិវឌ្ឍប្រព័ន្ធគាំពារសង្គមកម្ពុជា ដោយផ្តោតលើការកសាងភាពធន់ និងរក្សាភាពបត់បែនដើម្បីឆ្លើយតបនឹងការប្រែប្រួលអាកាសធាតុ គ្រោះអាសន្ន និងវិបត្តិនានា ក៏ដូចជាការវិឌ្ឍលើកត្តាសេដ្ឋកិច្ច កត្តាសង្គម និងកត្តាប្រជាសាស្រ្ត ជាទូទៅ សំដៅរួមចំណែកលើកកម្ពស់ សុខុមាលភាពសង្គម និងកំណើនសេដ្ឋកិច្ចប្រកបដោយចីរភាព និងបរិយាបន្ន។

សម្តេចធិបតី បានគូសបញ្ជាក់ថា ក្នុងន័យនេះរាជរដ្ឋាភិបាលបានដាក់ចេញនូវកម្មវិធីនយោបាយអាទិភាពចំនួន៦ សម្រាប់ចាប់ផ្តើមអនុវត្តភ្លាមក្នុងឆ្នាំ២០២៣ ដោយកម្មវិធីគោលនយោបាយចំនួន៣ មានគោលបំណងបន្តអភិវឌ្ឍប្រព័ន្ធគំាពារសង្គម រួមមាន៖ ការពង្រីកសេវាថែទំាសុខភាព ឆ្ពោះទៅរកការគ្របដណ្ដប់សុខភាពជាសកល។ ការបណ្តុះបណ្តាលជំនាញវិជ្ជាជីវៈ និងបច្ចេកទេសជូនយុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទំាងប្រទេស និងការធ្វើស្ថាបនូនីយកម្ម កម្មវិធីជាតិជំនួយសង្គមសម្រាប់គ្រួសារក្រីក្រ ក្រុមយុវជនងាយរងគ្រោះនៅក្នុងគ្រួសារក្រីក្រ និងគ្រួសារងាយរងហានិភ័យនៅក្នុងគ្រាមានវិបត្តិសេដ្ឋកិច្ច និងគ្រាមានគ្រោះអាសន្ន។

គិតត្រឹមខែមេសា ឆ្នាំ២០២៥ កម្មវិធីជាតិជំនួយសង្គម បានក្របដណ្តប់លើពលរដ្ឋសរុបប្រមាណ ១,២លានគ្រួសារ មានប្រមាណ ៤,៨៤លាននាក់ ស្មើនឹង ២៨% នៃចំនួនពលរដ្ឋសរុប។ ក្នុងឆ្នាំ២០២៥នេះ រាជរដ្ឋាភិបាលបានវិភាជថវិកាប្រមាណ ២៥៧លានដុល្លារអាមេរិក សម្រាប់អនុវត្តកម្មវិធីចំនួន៩។ គិតត្រឹមខែមេសា ឆ្នាំ២០២៥ របបសន្តិសុខសង្គម បានក្របដណ្តប់លើពលរដ្ឋប្រមាណ ៣,១លាននាក់ ទាំងក្នុងវិស័យសាធារណៈ និងវិស័យឯកជន ហើយក្នុងឆ្នាំ២០២៥នេះ រាជរដ្ឋាភិបាលបានវិភាជថវិកាប្រមាណ ៤២៥លានដុល្លារអាមេរិកបន្ថែមលើថវិកាវិភាគទានដែលប្រមូលបានពីសមាជិក ប.ស.ស សម្រាប់អនុវត្តរបបសន្តិសុខសង្គមចំនួន ៣សំខាន់ៗ។ ចំណែកអន្តរាគមន៍ឆ្លើយបតទៅគ្រោះអាសន្ន ក្នុងខណៈដែលប្រទេសជាតិជួបគ្រោះអាសន្នដែលរួមមានការរីករាលដាលជំងឺកូវីដ ១៩ សម្ពាធអតិផរណា និងគ្រោះទឹកជំនន់ធ្ងន់ធ្ងរ រាជរដ្ឋាភិបាលបានគិតគូរ និងផ្តល់ការគាំពារដល់ពលរដ្ឋដើម្បីរក្សាលំនឹងជីវភាព កាត់បន្ថយការលំបាករបស់ប្រជាពលរដ្ឋប្រកបដោយប្រសិទ្ធភាព តាមរយៈការអន្តរាគមន៍ជំនួយសង្គមពិសេសដល់គ្រួសារក្រីក្រ និងគ្រួសារងាយរងហានិភ័យ ដោយបានចំណាយថវិកាជាតិសរុបប្រមាណ ១ ៤២២ លានដុល្លារអាមេរិក។ ផ្លែផ្កានៃកំណើនសេដ្ឋកិច្ច សុខសន្តិភាពពេញបរិបូរណ៍ និងស្ថិរភាពនយោបាយ ជាបុរេលក្ខខណ្ឌមិនអាចខ្វះបាន ដែលអនុញ្ញាតឱ្យរាជរដ្ឋាភិបាលដាក់ចេញនូវគោលនយោបាយ និងយុទ្ធសាស្ត្រ ក៏ដូចជាអនុវត្តការងារ កែទម្រង់សំខាន់ៗ ដើម្បីស្ដារ និងអភិវឌ្ឍប្រទេសជាតិ ដោយសម្រេចបាននូវលទ្ធផលគួរជាទីមោទកៈ ៕