ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បានលើកឡើងថា រដ្ឋសភានីតិកាលទី៧ បាន និងកំពុងជំរុញដល់ការកសាងភាពជាដៃគូរវាងផ្នែកសាធារណៈនិងឯកជនក្នុងការលើកកម្ពស់សេវាបង្ការ ព្យាបាល និងថែទំាសុខភាព ឈរលើគោលការណ៍ផលប្រយោជន៍សុខភាពសាធារណៈ និងធុរកិច្ច ដោយផ្តោតលើការផ្តល់សេវាសុខាភិបាល ការអភិវឌ្ឍសមត្ថភាព ធនធានមនុស្ស សុខាភិបាល និងការប្រើប្រាស់បច្ចេលវិទ្យាសុខាភិបាលឌីជីថលជាដើម។ បន្ថែមពីនេះ រដ្ឋសភាក៏បានកំពុងជំរុញការស្រឡាញ់សុខភាព ការអនុវត្តទម្លាប់ល្អ នាំមកនូវសុខភាព ក្រោមទិសស្លោកថា «ពលរដ្ឋមានសុខភាពល្អ កម្ពុជាបវររុងរឿង»។

សម្តេចប្រធានរដ្ឋសភា បានមានប្រសាសន៍បែបនេះនៅក្នុងឱកាសអញ្ជើញបើកសិក្ខាសាលា ស្ដីពី «ការឈ្វេងយល់ពីក្របខ័ណ្ឌយុទ្ធសាស្ត្រកម្ពុជា ២០២៤-២០៣០: ពន្លឿនការអនុវត្ដកម្មវិធីសកម្មភាពនៃសន្និសីទអន្តរជាតិស្ដីពី ប្រជាជន និងអភិវឌ្ឍន៍ (ICPD) នៅវិមានរដ្ឋសភា នាព្រឹកថ្ងៃទី១២ ខែឧសភា ឆ្នាំ២០២៥។

សម្តេចរដ្ឋសភាធិបតី ឃួន សុដារី បានគូសបញ្ជាក់ថា ៖

«សិក្ខាសាលាថ្ងៃនេះ ជាព្រឹត្តិការណ៍ដ៏សំខាន់មួយទៀត និងសមស្របបំផុតសម្រាប់សមាជិកសមាជិកាព្រឹទ្ធសភា រដ្ឋសភា និងភាគីពាក់ព័ន្ធបានស្វែងយល់ពីវឌ្ឍនភាព សមិទ្ធផល និងបញ្ហាប្រឈមនានា ជាពិសេសឱកាសក្នុងការជជែកពិភាក្សា និងផ្លាស់ប្តូរយោបល់ ទស្សនៈ សំដៅរួមគ្នាស្វែងរកនូវវិធីសាស្រ្ត និងដំណោះស្រាយសមស្របក្នុងការដោះស្រាយបញ្ហាប្រឈមដែលនៅសេសសល់ក្នុងការអនុវត្តផែនការសកម្មភាពនៃសន្និអន្តរជាតិស្តីពីប្រជជននិងអភិវឌ្ឍន៍​(ICPD)​ក្នុង​រយៈពេល៣០ឆ្នាំកន្លងមកនេះក៏ដូចជាឈានទៅម្រេចបានគោលដៅអភិវឌ្ឍន៍ប្រកបដោយចីរភាព នៅឆ្នាំ២០២៣០ដែលមាន ដូចជា ការសម្រេចពុំមានភាពក្រីក្រ គ្រោះស្រេក​ឃ្លានស្មើសូន្យ សុខភាពនិងសុខុមាលភាពមាំមួន ការអប់រំប្រកបដោយគុណភាព សមភាពយេនឌ័រ ការងារសមរម្យ និងកំណើនសេដ្ឋកិច្ច និងភាពជាដៃគូដើម្បីសម្រេចគោលដៅអភិវឌ្ឍន៍ដោយចីរភាពជាដើម»។

សម្តេចប្រធានរដ្ឋសភា បានថ្លែងការសរសើរចំពោះការប្តេជ្ញាចិត្តរបស់រាជរដ្ឋាភិបាលអាណត្តិទី ៧ នៃរដ្ឋសភា ក្រោមការដឹកនាំរបស់សម្តេចបវរធិបតី ហ៊ុន ម៉ាណែត តាមរយៈយុទ្ធសាស្ត្របញ្ចកោណដំណាក់កាលទី ១ ដែលបានកំណត់ យកមនុស្ស ជាអាទិភាពចំបង ក្នុងចំណោមអាទិភាពគន្លឹះទាំង ៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា»។ រាជរដ្ឋាភិបាលបានបង្កើនថវិកាជាបន្តបន្ទាប់រៀងរាល់ឆ្នាំ ដោយបានកើនដល់ ៥៥០ លានដុល្លារសហរដ្ឋ អាមេរិក ដើម្បីជំរុញការគ្របដណ្តប់សុខភាពជាសាកល ឱ្យបានទូលំ ទូលាយទូទាំងរាជធានីខេត្ត ដែលបានបន្តចក្ខុវិស័យវែងឆ្ងាយ របស់សម្តេចតេជោ ហ៊ុន សែន អតីតនាយករដ្ឋមន្រ្តី ដែលបានកសាងសមិទ្ធផលជាច្រើនតាមរយៈនៃការអនុវត្តប្រកបដោយប្រសិទ្ធភាព នូវគោលនយោបាយអន្តរវិស័យ តាំងពីយុទ្ធសាស្ត្រត្រីកោណ យុទ្ធសាស្ត្រចតុកោណទាំង៤ដំណាក់កាល ផែនការយុទ្ធសាស្ត្រជាតិគ្រប់ដំណាក់កាល ក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា គោលនយោបាយជាតិ ស្តីពីការអប់រំ គោល នយោបាយជាតិ ស្តីពីការអភិវឌ្ឍយុវជនកម្ពុជា គោលនយោបាយជាតិ ប្រជាជន គោលនយោបាយជាតិស្តីពីមនុស្សវ័យចាស់ ផែនការនារីរតនៈ និងផែនការយុទ្ធសាស្ត្រវិស័យសុខាភិបាល ជាដើមនោះ។

ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានគណៈកម្មាធិការពិសេសតាមដានការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជននិងអភិវឌ្ឍន៍ បានគូសបញ្ជាក់ថា នៅឆ្នាំ២០២៤ រាជរដ្ឋាភិបាលបានដាក់ចេញនូវ ក្របខ័ណ្ឌយុទ្ធសាស្ត្រកម្ពុជា ឆ្នាំ២០២៤-២០៣០ ដើម្បីអនុវត្តកម្មវិធីសកម្មភាពសន្និសីទអន្តរជាតិស្តីពីប្រជាជននិងអភិវឌ្ឍន៍។ ការសម្រេចបាននូវសូន្យបី (Three Zeros)៖ (១). បញ្ចប់តម្រូវការដែលមិនបានឆ្លើយតបអំពីព័ត៌មាននិងសេវាផែនការគ្រួសារ, (២). បញ្ចប់មរណភាពមាតាដែលអាចបង្ការបាន និង (៣). បញ្ចប់អំពើហិង្សាទាក់ទងនឹងយេនឌ័រ និងផ្លូវភេទនិងការអនុវត្តប្រកបដោយគ្រោះថ្នាក់នានា រួមទាំងការលុបបំបាត់គ្រប់ទម្រង់នៃការរើសអើងចំពោះស្ត្រី និងក្មេងស្រី គឺជាគោលដៅចុងក្រោយក្នុងការឆ្លើយតបទៅនឹងការប្តេជ្ញាចិត្តរបស់កម្ពុជា នៅសន្និសីទទីក្រុងណៃរ៉ូប៊ី។

ឯករដ្ឋមន្រ្តីបានលើកឡើងថា ក្របខ័ណ្ឌយុទ្ធសាស្ត្រកម្ពុជា បានឆ្លុះបញ្ចាំងពីមហិច្ឆតារួមរបស់យើង ក្នុងការវិនិយោគលើយុវជន ការការពារសិទ្ធិនិងសុខភាពស្ត្រី និងក្មេងស្រី ការទាញយកភាគលាភ ប្រជាសាស្ត្រ ការឆ្លើយតបទៅនឹងតថភាព នៃការឈានទៅរកវ័យចាស់ និងការពង្រឹងប្រព័ន្ធ សន្តិសុខសង្គមដែលលើកកម្ពស់សមធម៌ និងឱកាសសម្រាប់ទាំងអស់គ្នា៕