សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
តូក្យូ ៖ ក្នុងពីធីជួបសំណេះសំណាលជាមួយប្រជាពលរដ្ឋខ្មែរនៅប្រទេសជប៉ុន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានថ្លែងថា ការងាររបស់រាជរដ្ឋាភិបាល អាទិភាពធំគឺបង្កើនការងារនៅក្នុងស្រុក តាមរយៈកិច្ចខិតខំដើររកអ្នកមកវិនិយោគនៅកម្ពុជា ហើយរាជរដ្ឋាភិបាល ក៏ស្វែហរកឱកាសសម្រាប់ការងារធ្វើជូនពលករខ្មែរនៅក្រៅប្រទេស ដែលនៅឆ្នាំ២០២៤ ខាងមុខ គ្រោងនឹងបង្កើនចំនួនពលករធ្វើការនៅជប៉ុនដល់ ៨ ពាន់នាក់ទៀត។
សម្តេចធិបតី ហ៊ុន ម៉ាណែត បានលើកឡើងថា ៖
«ការបង្កើតការងាររបស់យើង អាទិភាពធំគឺការងារនៅក្នុងស្រុក ខំបង្កើតការងារដែលខ្ញុំដើររកអ្នកវិនិយោគ គឺយកក្រុមហ៊ុនពីខាងក្រៅ ដើម្បីភ្ជាប់ឱកាសទៅក្នុងប្រទេស ដោយហៅជប៉ុនទៅមើលសក្តានុពលនៅកម្ពុជា យកបច្ចេកវិទ្យាទៅបណ្តុះបណ្តាលកូនខ្មែរ អាចធ្វើជាវិស្វករ ប្រកបដោយជំនាញ។ បច្ចុប្បន្ន យើងកំពុងតែចរចា ឆ្នាំក្រោយអាចពង្រីកបន្ថែមទៀតមកជប៉ុន ដែលអាចបានខ្ទង់ ៨ ពាន់នាក់បន្ថែមទៀត ហើយអ្វីដែលរាជរដ្ឋាភិបាលបានធ្វើ មិនខុសពីប្រទេសផ្សេងៗទៀតទេ គឺការបង្កើតជម្រើស ហើយនៅប្រទេសជប៉ុនមកដល់ម៉ោងនេះ យើងមានប្រជាពលរដ្ឋខ្មែរជិត ៣ ម៉ឺននាក់ ដែលភាគច្រើនជាកម្មសិក្សាការី សិស្ស-និស្សិត និងបងប្អូនខ្មែរយើងរស់នៅទីនេះផងដែរ»។
សម្តេចធិបតី ក៏បានលើកឡើងផងដែរថា ជាមោទនភាពរបស់កម្ពុជា និងមោទនភាពរបស់កូនខ្មែរ ដែលម្ចាស់ក្រុមហ៊ុន មានកម្មសិក្សាការីកម្ពុជាធ្វើការជាមួយ និងបានសរសើរថាប្រជាជនខ្មែរស្លូតត្រង់ ស្មោះត្រង់ និងឧស្សាហ៍ព្យាយាម ។
សម្តេចធិបតី ហ៊ុន ម៉ាណែត បានបញ្ជាក់ថា៖
«មូលហេតុដែលនឹងបញ្ជូនកម្មសិក្សាការី ៨ ពាន់នាក់ថែមទៀតនៅឆ្នាំក្រោយនេះ គឺមិនមែនជាកត្តាចៃដន្យទេ តែដោយសារតែអំពើល្អ និងការខិតខំរបស់បងប្អូន ទើបផ្តល់ឱកាសឱ្យបងប្អូនយើងផ្សេងៗទៀតបានមកនេះ គឺជាគុណបុណ្យធំធេងណាស់។ បើបងប្អូនពលករ ឬកម្មសិក្សាការីយើងមកទីនេះដើម្បីបង្ករឿង គេនឹងមិនឱ្យបន្ថែមទៀតទេ» ។
សម្តេចធិបតី ក៏បានឱ្យប្រជាពលរដ្ឋជឿទុកចិត្តលើរាជរដ្ឋាភិបាលអាណត្តិទី៧ ដែលលោកនឹងនៅតែបន្តដឹកនាំតាមចក្ខុវិស័យដែលអតីតនាយករដ្ឋមន្ត្រី សម្ដេចតេជោ ហ៊ុន សែន បានកសាងប្រទេស ៤០ ឆ្នាំ ជាមួយនឹងថ្នាក់ដឹកនាំជំនាន់មុនៗ ដែលនេះជាការពាក់ព័ន្ធទៅនឹងជ្រុងមួយនៃគោលនយោបាយសេដ្ឋកិច្ចកម្ពុជា គឺបង្កើតការងារ ទាំងបរិមាណ និងគុណភាពការងារគ្រប់វិស័យដែលត្រូវជំរុញគ្រប់ទីកន្លែងនៅក្នុងប្រទេស បូកជាមួយនឹងជម្រើសការងារនៅក្រៅប្រទេសផងដែរ ជាពិសេសការប្តេជ្ញាចិត្តធ្វើយ៉ាងណាឱ្យផលដែលបានត្រូវទៅឱ្យដល់ប្រជាពលរដ្ឋបានគ្រប់ទិសទី មិនមែនប្រមូលផ្តុំក្នុងដៃអ្នកណាមួយនោះទេ គឺត្រូវទៅឱ្យដល់ដៃប្រជាពលរដ្ឋ ជាពិសេសប្រជាពលរដ្ឋដែលមានជីវភាពក្រីក្រ។
Account
Security
Favourite Content