សាវម៉ាវ ជាផ្លែឈើមួយប្រភេទដែលគេនិយមទទួលទាន ដោយសារតែរសជាតិផ្អែមឆ្ងាញ់ និងសម្បូរជាតិទឹក ជាពិសេសផ្លែសាវម៉ាវនៅតំបន់អូរសោមតែម្ដង ខណៈដែលបច្ចុប្បន្ននេះជារដូវកាលប្រមូលផលយ៉ាងមមាញឹក។

បើតាម លោក យន់ សារិន ជាអាជីវករលក់កសិផលធម្មជាតិ «មោលីកសិផលខ្មែរ» នៅក្នុងខេត្តពោធិ៍សាត់ បានប្រាប់ឱ្យដឹងថា ៖ ចាប់តាំងពីដើមខែមិថុនារហូតមកដល់ពេលបច្ចុប្បន្ននេះ ជារដូវកាលប្រមូលផ្លែសាវម៉ាវស្ទើរទូទាំងប្រទេស។ ដោយឡែក សម្រាប់សាវម៉ាវដែលខ្ញុំទទួលយកមកលក់ គឺជាប្រភេទសាវម៉ាវនៅតំបន់អូរសោម ព្រោះសាវម៉ាវនៅតំបន់នេះមានរសជាតិឆ្ងាញ់ខុសពីសាវម៉ាវនៅតំបន់ទូទៅ។ វាមានសាច់ស្ងួត ស្រួយ មានរសជាតិផ្អែម និងសម្បកស្ដើង។

លោកបញ្ជាក់ថា ៖

«សម្រាប់រដូវនេះ ដំណាំសាវម៉ាវកំពុងឱ្យផលល្អ ហើយសាវម៉ាវអូរសោមរបស់យើងមានរសជាតិផ្អែមឆ្ងាញ់ សាច់ស្រួយល្អ ត្បិតមានផ្លែរាងតូចបន្តិចមែន តែយើងលក់ឱ្យអតិថិជននូវផ្លែឈើស្រស់ៗ កាច់មកថ្មីៗ មានសុវត្ថិភាព មិនភ័យខ្លាចប៉ះពាល់ដល់សុខភាពអ្នកទទួលទាន»។

លោកបន្ថែមថា សាវម៉ាវអូរសោម ឬអ្នកក្នុងតំបន់និយមហៅថា ជាពូជសាវម៉ាវកំប៉ុង ព្រោះវាមានផ្លែតូចៗ សាច់ស្រួយ និងផ្អែមឆ្ងាញ់ ហើយលោកកំពុងតែសាកល្បងពីទីផ្សារ និងផ្សព្វផ្សាយលក់នៅឆ្នាំនេះប៉ុណ្ណោះ ប៉ុន្តែមើលឃើញថាមានការគាំទ្រគួរសម ជាពិសេសការលក់បោះដុំទៅតាមបណ្ដាលម៉ាត ឬផ្សារកសិផលនានា។ ជាមួយគ្នានេះ លោករំពឹងថា ដៃគូសហការរបស់លោកនឹងគាំទ្រច្រើនចំពោះប្រភេទសាវម៉ាវអូរសោមនេះ ដោយសារតែលោកមានគោលការណ៍ច្បាស់លាស់គឺផ្គត់ផ្គង់កសិផលធម្មជាតិ ចេញពីទឹកដីស្រុកវាលវែង ខេត្តពោធិ៍សាត់ ដែលមានទាំងរសជាតិ គុណភាព និងសុវត្ថិភាព​ ខណៈការដាំដុះស្របតាមបច្ចេកទេស និងគ្មានសារធាតុគីមីនោះទេ។

លោកបន្តថា ៖

«ចំពោះតម្លៃវិញ យើងបោះដុំក្នុងតម្លៃ ៥០០០រៀលក្នុងមួយគីឡូក្រាម ដោយយើងទើបតែប្រមូលបានពីរជើងប៉ុណ្ណោះប្រមាណ ២០០គីឡូក្រាមពីកសិករពីរគ្រួសារ ប៉ុន្តែយើងទទួលបានមតិយោបល់ល្អៗច្រើនពីខាងផ្សារដែលជាដៃគូរ ជាពិសេសទាក់ទងនឹងរសជាតិផ្អែមឆ្ងាញ់ និងសាច់ស្រួយរបស់សាវម៉ាវប្រភេទនេះ»។

យ៉ាងណាក៏ដោយ ថ្វីត្បិតថាជាឆ្នាំដំបូងដែលខាង មោលីកសិផលខ្មែរ សិក្សា និងផ្សព្វផ្សាយពីប្រភេទសាវម៉ាវអូរសោមនេះក៏ពិតមែន តែលោក សារិន ក៏មានគម្រោងក្នុងការសិក្សាពីទីផ្សារ និងចុះពិភាក្សាបច្ចេកទេសរបស់ម្ចាស់ចំការបន្ថែមទៀត ដើម្បីទទួលបាននូវផ្លែឈើដែលមានគុណភាព ស្របតាមគោលការណ៍របស់ហាង ដៃគូ និងជួយលើកស្ទួយជីវភាពកសិករបានកាន់តែច្រើន៕