សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ប្រធានាធិបតីអាម៉េរិក លោក Donald Trump បានចុះហត្ថលេខាលើបទបញ្ជាមួយកាលពីថ្ងៃព្រហស្បតិ៍សប្ដាហ៍នេះ ដើម្បីដំឡើងពន្ធលើប្រទេសទាំងឡាយណាដែលផ្តល់ប្រេងដល់គុយបា ក្នុងគោលបំណងផ្តួលរំលំរដ្ឋាភិបាលកុម្មុយនិស្ត នេះបើយោងតាមសេចក្ដីរាយការណ៍ពី The Guardian ។
បទបញ្ជាដ៏ម៉ឺងម៉ាត់របស់លោក Trump នឹងបង្កើតឱ្យមានគណៈកម្មការមួយសម្រាប់វាយតម្លៃពីកម្រិតដំឡើងពន្ធលើប្រទេសណាដែលលក់ប្រេងឱ្យគុយបា ប៉ុន្តែសេតវិមានមិនទាន់បានបញ្ជាក់ពីអត្រាពន្ធជាក់លាក់ ឬ ប្រទេសណាខ្លះដែលអាចត្រូវបានកំណត់គោលដៅនោះទេ។ យ៉ាងណាមិញ នៅក្នុងសេចក្តីថ្លែងការណ៍របស់សេតវិមានបានលើកឡើងថា ទំនាក់ទំនងរបស់គុយបាជាមួយរុស្ស៊ី ក្រុមហាម៉ាស់ និង ក្រុមហេសបូឡា បានបង្កើតជាការគំរាមកំហែងមិនធម្មតាចំពោះសន្តិសុខជាតិ និងគោលនយោបាយការបរទេសរបស់អាម៉េរិក ដែលទាមទារឱ្យមានការឆ្លើយតបជាបន្ទាន់ដើម្បីការពារពលរដ្ឋ និងផលប្រយោជន៍របស់ខ្លួន។
មិនត្រឹមតែប៉ុណ្ណោះ លោក Trump បានប៉ះទង្គិចជាមួយប្រធានាធិបតីម៉ិចស៊ិក លោកស្រី Claudia Sheinbaum អស់រយៈពេលជាច្រើនសប្តាហ៍មកហើយជុំវិញបញ្ហាការផ្គត់ផ្គង់ប្រេង និងអត្រាពន្ធនេះ ដោយលោកស្រី Sheinbaum បានជំរុញឲ្យក្រុមហ៊ុនប្រេងរដ្ឋរបស់ម៉ិចស៊ិក Pemex បន្តបំពេញកាតព្វកិច្ចតាមកិច្ចសន្យាជាមួយទីក្រុង Havana ដើម្បីផ្គត់ផ្គង់ប្រេងបន្តទៀតក្រោមហេតុផលមនុស្សធម៌។
គួរឲ្យបញ្ជាក់ដែរថា គុយបា គឺជាប្រទេសមួយនៅលើដែនកោះការាបៀន ដែលពឹងផ្អែកលើការនាំចូល និងមានប្រជាជនប្រហែល ៨ លាននាក់ស្ថិតនៅក្រោមការគ្រប់គ្រងបែបរបបកុម្មុយនិស្តអស់រយៈពេល ៦ទសវត្សរ៍មកហើយ។ ដោយឡែក ប្រទេសវ៉េណេស៊ុយអេឡា គឺជាអ្នកផ្គត់ផ្គង់ប្រេងដ៏សំខាន់មួយរបស់គុយបា ដោយផ្តល់ ៧ ម៉ឺនបារ៉ែលក្នុងមួយថ្ងៃ ខណៈដែលម៉ិចស៊ិកផ្គត់ផ្គង់ ២ ម៉ឺនបារ៉ែលក្នុងមួយថ្ងៃ។ បន្ទាប់ពីកងកម្លាំងអាម៉េរិកចាប់ខ្លួនមេដឹកនាំមេដឹកនាំប្រទេសវេណេស៊ុយអេឡា លោក Nicolás Maduro គុយបាកំពុងប្រឈមមុខនឹងសម្ពាធសេដ្ឋកិច្ចដ៏ធំ ដោយសារបាត់បង់សិទ្ធិទទួលបានប្រេងពីវេណេស៊ុយអេឡា ដែលជាអ្នកផ្គត់ផ្គង់ដ៏សំខាន់របស់ខ្លួន។ ទន្ទឹមនឹងនេះ គុយបា បានរៀបចំបែងចែកការប្រើប្រាស់ប្រេងសាំង និងកំណត់ការផ្ដាច់ចរន្តអគ្គិសនីប្រចាំថ្ងៃ ដោយសារការផ្គត់ផ្គង់ប្រេងមានកម្រិត។
យោងតាមរបាយការណ៍ពី Financial Times បានឱ្យដឹងថា ស្តុកប្រេងរបស់គុយបាពេលនេះអាចប្រើប្រាស់គ្រប់គ្រាន់ត្រឹមតែ ១៥ ទៅ ២០ ថ្ងៃប៉ុណ្ណោះ។ លើសពីនេះ អត្រាភ្ញៀវទេសចរបានធ្លាក់ចុះដល់កម្រិតទាបបំផុត ដោយសារភាពចលាចលផ្នែកសេដ្ឋកិច្ច និងការគំរាមកំហែងរបស់អាម៉េរិក៕
Account
Security
Favourite Content