សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា ធនាគារកណ្តាលអាមេរិកបានកាត់បន្ថយការព្យាករណ៍របស់ខ្លួនលើកំណើនសេដ្ឋកិច្ច ហើយថែមទាំងបានព្រមានថា ពន្ធគយរបស់ប្រធានាធិបតី Donald Trump ប្រាកដជាជំរុញឱ្យតម្លៃទំនិញកើនឡើង និងប៉ះពាល់ដល់ជីវភាពរបស់ប្រជាជន។
កាលពីថ្ងៃពុធ សប្ដាហ៍នេះ ធនាគារកណ្តាលអាម៉េរិក (Fed) បានចេញផ្សាយការព្យាករណ៍របស់ខ្លួនសម្រាប់សេដ្ឋកិច្ចប្រទេស ខណៈពេលដែលការរក្សាអត្រាការប្រាក់មិនមានភាពផ្លាស់ប្តូរ ដោយសារចង់ឃើញដំណើរការនៃគោលនយោបាយសេតវិមាន។ ធនាគារកណ្តាលអាម៉េរិកបានសម្រេចចិត្តរក្សាអត្រាការប្រាក់គោលរបស់ខ្លួន ៤,៣ ភាគរយចាប់តាំងពីខែធ្នូ។ ប្រធានធនាគារកណ្តាលអាម៉េរិក Jerome Powell បានលើកឡើងថា ទោះបីជាមានការធ្លាក់ចុះយ៉ាងខ្លាំង និងភាពមិនច្បាស់លាស់ខ្ពស់ក៏ដោយ ប៉ុន្តែសេដ្ឋកិច្ចនៅតែមានសុខភាពល្អ។ យ៉ាងណាមិញ លោកបានព្រមានថា ពន្ធគយដែលដាក់លើការនាំចូលទំនងជាធ្វើឱ្យមានកំណើនសេដ្ឋកិច្ចយឺត និងរារាំងដល់កិច្ចខិតខំប្រឹងប្រែងរបស់ធនាគារក្នុងការរក្សាស្ថិរភាពតម្លៃ។
មិនត្រឹមតែប៉ុណ្ណោះ ភាពមិនច្បាស់លាស់នៃគោលនយោបាយពន្ធគយបន្ថែមសម្ពាធទៅលើបញ្ហា Fed កំពុងប្រឈមក្នុងរយៈពេលបីឆ្នាំចុងក្រោយនេះ ដើម្បីព្យាយាមរក្សាតម្លៃឱ្យមានស្ថិរភាព និងជៀសវាងការធ្លាក់ចុះនៃសេដ្ឋកិច្ច។ លើសពីនេះ អ្នកបង្កើតគោលនយោបាយព្យាករណ៍ថា អតិផរណានឹងអាចកើនឡើង ២,៧ ភាគរយនៅចុងឆ្នាំនេះ កើនឡើងពី ២,៥ ភាគរយដែលបានព្យាករណ៍កាលពីខែធ្នូ។ បន្ថែមពីនេះ កំណើនសេដ្ឋកិច្ចអាម៉េរិកមានអត្រាត្រឹមតែ ១,៧ ប៉ុណ្ណោះនៅឆ្នាំនេះ ដែលធ្លាក់ចុះពី ២,១ ភាគរយពីការព្យាករណ៍លើកមុន។ យ៉ាងណាក៏ដោយ ទោះបីជាធនាគារកណ្តាលអាម៉េរិករក្សាអត្រាការប្រាក់មិនផ្លាស់ប្តូរក៏ដោយ ប៉ុន្តែមានព្យាករណ៍ថា ធនាគារអាចនឹងកាត់បន្ថយអត្រាការប្រាក់នៅចុងឆ្នាំនេះ។ ធនាគារកណ្តាលក៏បានបន្ថែមដែរថា ខ្លួននឹងពន្យឺតការលក់ទ្រព្យសកម្មដូចជា បំណុលរបស់រដ្ឋាភិបាល ដើម្បីផ្តល់នូវការគាំទ្របន្ថែមទៀតសម្រាប់សេដ្ឋកិច្ច។
គួរកត់សម្គាល់ថា ចាប់តាំងពីចូលកាន់តំណែងក្នុងខែមករាមក ការប្រកាសពីពន្ធថ្មីៗរបស់ Donald Trump មានភាពមិនច្បាស់លាស់ ខណៈពេលដែលមានការអំពាវនាវឱ្យមានការកាត់បន្ថយពន្ធធំៗ បទប្បញ្ញត្តិ និងការចំណាយរបស់រដ្ឋាភិបាល។ Trump ទទួលស្គាល់ថា គោលនយោបាយពន្ធគយរបស់លោក ទំនងអាចបង្កការរំខានតិចតួច ប៉ុន្តែវានឹងនាំទៅរកកំណើនរយៈពេលវែង។ យ៉ាងណាមិញ អ្នកសេដ្ឋកិច្ចបានព្រមានជាយូរមកហើយថា គោលនយោបាយមួយចំនួនអាចបណ្តាលឱ្យតម្លៃទីនិញឡើងថ្លៃ និងបង្កើនភាពមិនច្បាស់លាស់សម្រាប់អាជីវកម្ម។ ជាក់ស្តែងថ្មីៗនេះ ការលក់ចេញភាគហ៊ុននៅក្នុងទីផ្សារបានកើនឡើងខ្ពស់ ខណៈដែលតម្លៃភាគហ៊ុនធ្លាក់ចុះយ៉ាងគំហុក៕
Account
Security
Favourite Content