បរទេស៖ យោងតាមប្រភពព័ត៌មានពី VN Express បានរាយការណ៍ថា ដោយសារតែជម្លោះព្រំដែនរវាងប្រទេសថៃ ជាមួយបណ្តាប្រទេសជិតខាង រួមមានកម្ពុជា មីយ៉ាន់ម៉ា និងឡាវ បានកាត់បន្ថយអត្រាស្នាក់នៅរបស់ទេសចរបរទេសនៅតាមសណ្ឋាគារនានាក្នុងប្រទេសថៃជាបន្តបន្ទាប់ ខណៈដែលវៀតណាមកំពុងពន្លឿនគោលនយោបាយទេសចរណ៍របស់ខ្លួនដើម្បីទាក់ទាញភ្ញៀវទេសចរឲ្យបានកាន់តែច្រើន។

លោក Bill Heinecke ប្រធានក្រុមហ៊ុនបដិសណ្ឋារកិច្ច និងភោជនីយដ្ឋាន Minor International បានលើកឡើងថា ចាប់តាំងពីការប៉ះទង្គិចគ្នាជាមួយកម្ពុជាលើបញ្ហាព្រំដែនចាប់តាំងពីខែកក្កដា ឆ្នាំ២០២៥ សណ្ឋាគារ Minor ក្នុងប្រទេសថៃបានមើលឃើញថាចំនួនភ្ញៀវទេសចរបរទេសតិចជាងមុន ហើយការកក់បន្ទប់ទុកជាមុនក៏មានការធ្លាក់ចុះដូចគ្នា ប៉ុន្តែផ្ទុយ​ទៅ​វិញ សណ្ឋាគារ​នៅប្រទេស​វៀតណាម បែរជាកំពុងទទួលបាន​អត្រា​ស្នាក់នៅរបស់ភ្ញៀវទេសចរ​ខ្ពស់បើប្រៀបធៀបទៅនឹងឆ្នាំកន្លងទៅ។

យោងតាមក្រសួងទេសចរណ៍ថៃបានឱ្យដឹងថា ថៃទទួលបានភ្ញៀវទេសចរបរទេសជាង ២១ លាននាក់ គិតចាប់ពីខែមករា ដល់ខែសីហា មានការធ្លាក់ចុះ ៧,‌៤% ធៀបនឹងរយៈពេលដូចគ្នាកាលពីឆ្នាំមុន។ ទន្ទឹមនឹងនេះ វៀតណាមទទួលភ្ញៀវបរទេសចំនួន ១២,២ លាននាក់ក្នុងរយៈពេល ៧ ខែដំបូងនៃឆ្នាំនេះ ដែលកើនឡើង ២៣% ធៀបនឹងឆ្នាំមុន ខណៈដែលរដ្ឋាភិបាល​វៀតណាម​កំពុង​ជំរុញ​ជំរុញ​វិស័យ​ទេសចរណ៍​តាម​រយៈ​កំណែទម្រង់​ទិដ្ឋាការ​ទ្រង់ទ្រាយ​ធំដោយលើកលែងតម្រូវការទិដ្ឋាការពីប្រទេសចំនួន ១២ បន្ថែមទៀតរួមមាន បែលហ្ស៊ិក ប៊ុលហ្គារី ក្រូអាត ឆេក ហុងគ្រី លុចសំបួ ហូឡង់ ប៉ូឡូញ រូម៉ានី ស្លូវ៉ាគី ស្លូវេនី និងស្វីស​ ដោយភ្ញៀវបរទេសមកពីប្រទេសទាំងនេះអាចស្នាក់នៅវៀតណាមរហូតដល់ ៤៥ ថ្ងៃ។ កំណែទម្រង់នេះពង្រីកបញ្ជីរបស់វៀតណាមសម្រាប់លើកលែងទិដ្ឋាការពីបរទេសចំនួនសរុប ៣៩ ប្រទេស។ មិនត្រឹមតែប៉ុណ្ណោះ វិស័យ​សណ្ឋាគារ​របស់​​វៀតណាម​ក៏​មាន​ការ​កើនឡើង​ខ្លាំង​ផង​ដែរ​។ ប្រទេសវៀតណាម ក្នុងរយៈពេល ៥ខែដំបូងនៃឆ្នាំនេះ អត្រាស្នាក់នៅសណ្ឋាគាររបស់ភ្ញៀវទេសចរកើនឡើង ១៣,២% ធៀបនឹងរយៈពេលដូចគ្នាកាលពីឆ្នាំ២០២៤ ជាពិសេសកំណើននៃភ្ញៀវទេសចរចិន។

លោក Damien Pfirsch ប្រធានផ្នែកពាណិជ្ជកម្មនៅ Agoda បានផ្តល់យោបល់ថា ថៃគួរតែវិនិយោគបន្ថែមទៀតលើហេដ្ឋារចនាសម្ព័ន្ធដែលតភ្ជាប់ភ្ញៀវទេសចរទៅកាន់កន្លែងកម្សាន្តលំដាប់ទីពីរ ដោយផ្តល់នូវបទពិសោធន៍ថ្មីៗលើសពីទីក្រុងបាងកក និងភូកេត ខណៈដែលអ្នកធ្វើដំណើរភាគរច្រើនបានទៅលេងប្រទេសថៃច្រើនដងរួចមកហើយ។ មិនត្រឹមតែប៉ុណ្ណោះ លោក Thanet Supornsahasrungsi ប្រធានសមាគមនៃសហព័ន្ធទេសចរណ៍ឈុនបុរី​ ព្រមានថា វិស័យទេសចរណ៍របស់វៀតណាមអាចវ៉ាដាច់ប្រទេសថៃក្នុងរយៈពេល ២ ទៅ ៣ឆ្នាំខាងមុខ។ លោកបានចង្អុលបង្ហាញថា លក្ខណៈពិសេសរបស់វៀតណាមគឺតម្លៃនៃការរស់នៅទាប រមណីយដ្ឋាន និងកន្លែងកម្សាន្តថ្មីៗ ដែលមានតម្លៃប្រកួតប្រជែង ជាពិសេស កញ្ចប់សណ្ឋាគារដែលរួមបញ្ចូលសេវាកម្មទាំងអស់ មានតម្លៃទាបជាងជិតពាក់កណ្តាលនៃតម្លៃក្នុងប្រទេសថៃ៕