សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ថៃបានអំពាវនាវឱ្យក្រុមហ៊ុនក្នុងស្រុកកាត់បន្ថយការនាំចេញពងមាន់រហូតដល់ ៥០ ភាគរយ បន្ទាប់ពីគ្រោះទឹកជំនន់សម្លាប់មាន់ពងអស់រាប់លានក្បាល ប៉ះពាល់ដល់ការផ្គត់ផ្គង់ពងមាន់យ៉ាងធ្ងន់ធ្ងរ ។
កាលពីថ្ងៃអង្គារ៍កន្លងទៅនេះ មន្ត្រីក្រសួងពាណិជ្ជកម្មថៃស្នើសុំឱ្យក្រុមហ៊ុននានាកាត់បន្ថយការនាំចេញពងមាន់ពី ៣០ ភាគរយទៅ ៥០ ភាគរយរហូតដល់ខែធ្នូ ឆ្នាំ២០២៦ ដោយសារគ្រោះទឹកជំនន់បានសម្លាប់មាន់អស់ជាច្រើនលានក្បាល ដែលបង្កផលប៉ះពាល់ដល់ការផ្គត់ផ្គង់យ៉ាងធ្ងន់ធ្ងរ។
លោក Jirawuth Suwanna-arj អគ្គនាយករងនៃនាយកដ្ឋានពាណិជ្ជកម្ម បានលើកឡើងថា មាន់ពងប្រមាណ ៣ លានក្បាលបានងាប់នៅតាមកសិដ្ឋានក្នុងខេត្តឆាត់ជើងសៅ។ បច្ចុប្បន្ន នាយកដ្ឋានពាណិជ្ជកម្មកំពុងចុះស្រង់ទិន្នន័យជាបន្ទាន់នៅតាមតំបន់មិនរងផលប៉ះពាល់ ដើម្បីប្រមូលទិញពងមាន់យកទៅចែកចាយជូនអាជីវករលក់រាយ ព្រមទាំងសហការជាមួយស្ថាប័នផ្សេងទៀតក្នុងការបន្តអាយុកាលរបស់មាន់ពងពី ៨០ សប្តាហ៍ ទៅ ៨៥ សប្តាហ៍ ដើម្បីរក្សាស្ថិរភាពនៃការផ្គត់ផ្គង់ពងមាន់។
នាយកដ្ឋានបានស្នើសុំឱ្យសមាគមអ្នកផលិតពងមាន់ និងកសិដ្ឋានធំៗរក្សាតម្លៃពងមាន់នៅត្រឹម ៤ បាត (ប្រហែល ០,១២ ដុល្លារ) ក្នុងមួយគ្រាប់។ លើសពីនេះ នាយកដ្ឋានក៏ស្នើឱ្យអ្នកប្រមូលទិញ ឬ ឈ្មួញកណ្តាលចុះទៅទិញពងមាន់ពីតំបន់ដែលមិនរងផលប៉ះពាល់ដោយទឹកជំនន់ និងបន្តចែកចាយជូនអាជីវករលក់រាយ ព្រមទាំងស្នើសុំឲ្យសហការគ្នារក្សាតម្លៃលក់ឱ្យនៅថេរ ដើម្បីជៀសវាងការឡើងថ្លៃពងមាន់នៅលើទីផ្សារ។ ក្រសួងកសិកម្មថៃ បានឲ្យដឹងថា ថៃបាននាំចេញពងមាន់ក្នុងទំហំទឹកប្រាក់ ១,៧ ពាន់លានបាត (ប្រហែល ៥០,៤៦ លានដុល្លារ) កាលពីឆ្នាំ២០២៥ ដែលភាគច្រើននាំចេញទៅកាន់ប្រទេសសិង្ហបុរីរហូតដល់ ៧៩ ភាគរយនៃទំហំនាំចេញសរុប និងទៅកាន់ហុងកុងចំនួន ៩ ភាគរយ។
យោងតាមទិន្នន័យពីក្រសួងមហាផ្ទៃថៃ បានឲ្យដឹងថា ចាប់តាំងពីថ្ងៃទី ១៦ ខែកញ្ញា មក គ្រោះទឹកជំនន់បានកើតឡើងនៅក្នុងខេត្តចំនួន ៥១ រួមទាំងទីក្រុងបាងកក និងបានសម្លាប់មនុស្សអស់ ៣១ នាក់។ ទីក្រុងបាងកកត្រូវបានប្រកាសជាតំបន់រងគ្រោះមហន្តរាយបន្ទាប់ពីមានភ្លៀងធ្លាក់ខ្លាំងរហូតដល់ ៣២០ មីលីម៉ែត្រក្នុងរយៈពេល ៣ ថ្ងៃ ដែលស្មើនឹងកម្រិតទឹកភ្លៀងសរុបប្រចាំខែកញ្ញាទាំងមូល។ ដោយឡែក ចាប់ពីថ្ងៃទី ៩ ដល់ថ្ងៃទី ១៣ ខែតុលា តំបន់ភាគខាងកើត និងភាគកណ្តាលនៃប្រទេសថៃ រួមទាំងក្រុងបាងកក និងតំបន់ជាយក្រុង ត្រូវបានព្យាករណ៍ថានឹងមានភ្លៀងធ្លាក់បន្ថែមទៀត ដោយកន្លែងខ្លះអាចមានភ្លៀងធ្លាក់ខ្លាំងធ្ងន់ធ្ងរ៕
Account
Security
Favourite Content