សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងគោលបំណងចូលរួមដោះស្រាយបញ្ហាសំរាមនៅក្នុងរាជធានីភ្នំពេញ ក្រុមហ៊ុនបរទេសចំនួន២ បានបង្ហាញពីចំណាប់អារម្មណ៍វិនិយោគលើការកែច្នៃសំរាមទៅជាថាមពលស្អាត និងកែច្នៃកាកសំណល់ទៅជាអគ្គិសនីលក់ជូនអ្នកប្រើប្រាស់ក្នុងតម្លៃសមរម្យទៀតផង។
ក្នុងជំនួបជាមួយ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) កាលពីថ្ងៃទី០៣ ខែមិនា ឆ្នាំ២០២៥ លោក Thomas CHAUVEAU នាយកគ្រប់គ្រងផ្នែកប្រតិបត្តិការថាមពល និងអាជីវកម្មថ្មី និងជាប្រតិភូតំណាងក្រុមហ៊ុន Vinci Construction , ក្រុមហ៊ុន Sage Engineering បានធ្វើបទបង្ហាញអំពីរបាយការណ៍នៃការសិក្សាសមិទ្ធិលទ្ធភាពគម្រោង “សួនកែច្នៃកាកសំណល់នៅរាជធានីភ្នំពេញ ការជ្រើសរើសបច្ចេកវិទ្យាសម្រាប់ប្រព្រឹត្តិកម្មសំណល់រឹងក្នុងទីក្រុង និងការផលិតថាមពល ដែលត្រូវបានសហការសិក្សាដោយអ្នកជំនាញមកពីក្រុមហ៊ុន Vinci Construction និងក្រុមហ៊ុន Sage Engineering តែម្តង។
តាមរយៈបទបង្ហាញនេះ លោក Thomas CHAUVEAU បានលើកឡើងមានជាអាទិ៍ នូវទិន្នន័យពាក់ព័ន្ធដែលប្រមូលបាន, បច្ចុប្បន្នភាពនៃការសិក្សាគម្រោង និងបច្ចេកវិទ្យាពាក់ព័ន្ធនានាសម្រាប់ការធ្វើប្រព្រឹត្តិកម្មសំណល់រឹង និងបំប្លែងជាថាមពលសម្រាប់ប្រើប្រាស់បន្ត ដោយក្រុមហ៊ុនទាំង២ បានសហការសិក្សាគម្រោងនេះឡើងក្នុងបំណង (១)បង្កើតថាមពលស្អាត និងតម្លៃសមរម្យ ដោយបំប្លែងកាកសំណល់ទៅជាអគ្គិសនី, (២)បង្កើនអាយុកាលនៃទីលានចាក់សំរាម, (៣)លើកកម្ពស់សុខភាព និងសុខុមាលភាពរបស់ប្រជាពលរដ្ឋ, (៤)លើកកម្ពស់វិស័យឧស្សាហកម្ម នវានុវត្តន៍ និងហេដ្ឋារចនាសម្ព័ន្ធពាក់ព័ន្ធ តាមរយៈការសាងសង់រោងចក្រកែច្នៃកាកសំណល់រឹងជាមួយនឹងបច្ចេកវិទ្យាចុងក្រោយ និង(៥)ពង្រឹងការគ្រប់គ្រងថ្លៃដើមក្នុងការកែច្នៃកាកសំណល់ក្នុងទីក្រុង។
គួរបញ្ជាក់ថា សំរាមនៅក្នុងទីក្រុងភ្នំពេញនាឆ្នាំ២០២៤ មានការកើនឡើង៣ដង ធៀបនឹងឆ្នាំ២០០៩ ។ នៅក្នុងឆ្នាំ២០០៩ បរិមាណសំរាមមានប្រមាណជាង ១,០០០តោនក្នុងមួយថ្ងែ រហូតមកទល់ឆ្នាំ២០២៤កន្លងទៅនេះ បរិមាណសំរាមមានប្រមាណ ៣ ៥០០តោនក្នុងមួយថ្ងៃ ដោយសារកំណើនប្រជាពលរដ្ឋចូលមករស់នៅក្នុងរាជធានីភ្នំពេញកាន់តែច្រើនឡើងៗ ជាមួយនឹងកំណើនសេដ្ឋកិច្ច ។
លោក នួន សំណាវុធ នាយកទីចាត់ការគ្រប់គ្រងបរិស្ថាន និងកាកសំណល់សាលារាជធានីភ្នំពេញ មិនអាចសុំអត្ថាធិប្បាយបាននោះទេ ដោយលោកមានប្រសាសន៍ថា រាល់សំនួរតម្រូវឱ្យអ្នកសារព័ត៌មានផ្ញើលិខិតទៅសាលាក្រុងជាមុនសិន។
យ៉ាងណាក៍ដោយ អ្នកឃ្លាំមើលសង្គមបានសាទរសម្រាប់ក្រុមហ៊ុនទាំងឡាយណាដែលមានបំណងកែច្នៃសំរាមនៅក្រុងភ្នំពេញទៅជាថាមពលស្អាត និងកែច្នៃសំណល់រឹងទៅជាអគ្គិសនី ដែលជាផ្នែកដ៏សំខាន់ក្នុងការលើកកំពស់សោភ័ណ្ឌភាព និងបរិស្ថាននៅក្នុងក្រុងភ្នំពេញ ៕ ដោយ ៖ វិន ឈុនហ៊ាត
Account
Security
Favourite Content