ភ្នំពេញ ៖ រាជរដ្ឋាភិបាលកម្ពុជា​បានកំណត់យក​តំបន់ឆ្នេរ​ជា​គោលដៅនៃការអភិវឌ្ឍ ក្នុងនោះ ខេត្តកែប ដែលស្ថិតនៅជាប់តំបន់​ឆ្នេរ​នៃព្រះរាជាណាចក្រកម្ពុជា​ផងដែរ​នោះ ត្រូវ​បាន​យកចិត្តទុកដាក់និង​អភិ​វ​ឌ្ឍន៍​ពីសំណាក់​រាជរដ្ឋាភិបាល ។ ជាក់ស្ដែង ក្នុងរយៈពេលចុងក្រោយនេះ បន្ថែមពីលើការចូលរួមអភិវឌ្ឍន៍វិស័យឯកជនទៅលើការបង្កើតជាតំបន់កម្សាន្ត មណ្ឌលពាណិជ្ជកម្មខា្នតមធ្យម រាជរដ្ឋាភិបាលក៏បានខិតខំ និងចំណាយទុកជាច្រើនដើម្បីបង្កើត និងអភិវឌ្ឍន៍ហេដ្ឋារចនាសម្ព័ន្ធថ្មីៗជាបន្តបន្ទាប់ ដែលកាន់តែធ្វើឱ្យខេត្តដ៏តូចច្រឡឹងមួយនេះកាន់តែ​មានសក្ដានុពល។

​បច្ចុប្បន្ននេះ គម្រោងអភិវឌ្ឍន៍ពីវិស័យឯកជន និងវិស័យរដ្ឋជាច្រើន​នៅក្នុង​ខេត្តកែប បាន និងកំពុង​លេចចេញជារូបរាងជា​បណ្ដើរ​ៗ​ហើយ ដូចជា ​ឆ្នេរ​តេជោសន្តិភាពកែប ផ្លូ​វ​តាមបណ្ដោយឆ្នេរ​អង្កោល​ ផ្លូវ​តភ្ជាប់ទៅកាន់​ខេត្តកំពត និង​គម្រោង​ធំៗ​ជា​ច្រើន​ទៀត ដែលរដ្ឋាភិបាល​កំពុង​ត្រៀមខ្លួន​ក្នុងការអភិវឌ្ឍន៍ឱ្យបានចប់សព្វគ្រប់ក្នុងពេលដ៏ខ្លី​ ។​​

ឯកឧត្តម ឈឿន​ ប៊ុណ្ណារ័ត្ន រដ្ឋលេខាធិការ និងជាប្រធានអនុគណៈកម្មការធនធានមនុស្ស ក្រសួង​រៀបចំដែនដី​ នគរូបនីយកម្ម​ និងសំណង់ បានមា​ន​ប្រ​សាសន៍ថា​ កែប ​គឺជាខេត្តដ៏​តូច​ច្រឡឹង​មួយ ឬអាច​និយាយបានថា​ ដូចជា​​កូនក្រមុំ​ដ៏​ស្រស់​ស្អា​ត​​មួយ ដូច្នេះហើយ ​ត្រូវតែខិតខំ​ថែរក្សា​កូនក្រមុំ​ និង​ត្រូវលាបក្រែម ថែមម្សៅ ដើម្បីឱ្យ​កាន់តែទាក់ទាញ​បន្ថែមទៀត។​

ឯកឧត្តម​បន្ថែមថា ៖

«កែប ​មិនមែនមានត្រឹមតែតំបន់ទេសចរណ៍ឆ្នេរនោះទេ ប៉ុន្តែកែប​នៅមានសក្ដានុពល​ជាច្រើន​ទៅលើ​វិស័យ​​ទេសចរណ៍ ដូចជា​ ទីកន្លែង​កម្សាន្ត​នៅ​តាមប្រ៉ប​មាត់ឆ្នេរ ទីកន្លែង​កម្សាន្ត​ធនធានធម្មជាតិព្រៃភ្នំ​ និងបណ្ដុំ​កោះជាច្រើន​នៅក្នុង​សមុទ្រ​នាខេត្តកែបជាច្រើនទីកន្លែងទៀត»។​

ឯកឧត្តម​បន្ថែម​ទៀតថា ដើម្បី​ទាក់ទាញភ្ញៀវទេសចរ​ជាតិ និងអន្តរជាតិ​ រាជរដ្ឋាភិបាលក៏បាន​អភិវឌ្ឍន៍​ផ្លូវ​ជិះ​កង់​នៅតាមបណ្ដោយផ្លូវ​ឆ្នេរ​អង្កោល​ ដើម្បីឱ្យទេសចរ​អាចជិះកង់​​មើលទេសភាពដ៏ស្រស់​ស្អា​ត​នៅតាមឆ្នេរ​អង្កោល ជាពិសេស​ព្រៃកោង​កាង​ដ៏​ខៀវ​ស្រងាត់​ ។ ក្រៅពីនេះដែរ នៅពេលខាង​មុខ ខេត្តកែប នឹង​មានកំពង់​ផែ​​នៃគម្រោងព្រែកជីកហ្វូណនតេជោ​ ដែល​នឹង​អាចទាក់ទាញទេសចរតាមផ្លូវទឹក​ជិះកម្សាន្ត​តាមព្រែក​ជីកពី​ភ្នំពេញ​ទៅ​ដល់សមុទ្រ​ខេត្ត​កែប ។

ដោយឡែក ភ្នាក់ងារ​អចលនទ្រព្យ​​ប្រចាំខេត្ត​កែប បានលើកឡើង​ពីសក្ដានុពល​​នៅក្នុង​ខេត្ត​មួយនេះដោយរំពឹងថា ​ឆាប់ៗនេះហាង​ឆេងដីធ្លី​នៅក្នុង​ខេត្តកែប​នឹង​កាន់តែ​មានទីផ្សារ និងការទិញ-លក់​ខ្លាំងជាងមុខ ខណៈកន្លងមក​ខេត្តកែប ក៏ទទួល​បាន​ការចាប់អារម្មណ៍​ខ្លាំងពីបណ្ដាវិនិយោគិន​ ទាំងក្នុង និងក្រៅប្រទេស​ផងដែរ បន្តស្វែងរក​ទិញ​ដីធ្លី​ត្រៀមអភិវឌ្ឍន៍​នៅពេលគម្រោងនានា​ចាប់ផ្ដើម​លេច​រូប​រាង ។

លោក សុខ គែន​ ភ្នាក់ងារ​ទិញ-លក់អចលនវត្ថុ​មួយរូប​ប្រចាំខេត្តកំពត និងកែប បានឱ្យដឹងថា ៖

«បច្ចុប្បន្ន​នេះ សកម្មភាពទិញ​លក់​មិនសូវ​មានច្រើន​​ក៏ពិតមែន ប៉ុន្តែតាមរយៈគម្រោង​វិនិយោគ​នានារបស់រាជរដ្ឋាភិបាល​នៅក្នុង​ខេត្តកែប នឹងអាច​ធ្វើឱ្យមានការចាប់អារម្មណ៍​ពីអ្នកវិនិយោគទៅកាន់​ខេត្តកែប​បន្ថែមទៀត ស្របនឹង​តម្លៃដីធ្លីនៅក្នុង​ខេត្តនេះ​ក៏នៅមានកម្រិតទាបដែលជាឱកាស​ល្អសម្រាប់អ្នកវិនិយោគ»។