បរទេស ៖ កាលពីឆ្នាំទៅ ក្រុមហ៊ុនអ្នកជំនាញប្រឹក្សាសេដ្ឋកិច្ចដ៏ធំរបស់សហរដ្ឋអាមេរិក Brattle Group បានធ្វើការព្យាករណ៍ទៅលើករណីបណ្តឹងសំណងមួយរបស់ចក្រភពអង់គ្លេសថានឹងមានការទាមទារសំណងក្នុងទំហំសរុបដល៉ទៅ១៨ទ្រីលានផោន ឬប្រមាណជា២៤ទ្រីលានដុល្លារពីប្រទេសដើមបណ្តឹងយ៉ាងហោចណាស់១៤ប្រទេសដែលមានប្រភពមកពីតំបន់ការ៉ាប៊ីន។

សំណុំរឿងក្តីដែលបន្សល់ទុកតាំងតែពីអតីតកាលពាក់ព័ន្ធទៅនឹងការជួញដូរ និងធ្វើការរត់ពន្ធទាសករពីសំណាក់ចក្រភពអង់គ្លេសទៅលើបណ្តាប្រទេសដែលខ្លួនបានធ្វើអាណានិគមនបានក្លាយទៅជាបញ្ហាគួរឲ្យឈឺក្បាលមួយផ្សេងទៀតសម្រាប់រដ្ឋាភិបាលទីក្រុងឡុងបច្ចុប្បន្នក្នុងការដោះស្រាយ ពីព្រោះថាមានចំនួននៃពលរដ្ឋក្នុងវណ្ណៈទាសករជាច្រើនលាននាក់ដែលបានទទួលរងគ្រោះ។

មកទល់នឹងដើមខែតុលាកន្លងមកនេះ កាសែតអង់គ្លេស The Daily Mail បានអះអាងថា ក្រុមប្រទេសការ៉ាប៊ីនទាំងនោះនឹងធ្វើការទាមទារសំណងយ៉ាងហោចណាស់២០០ពាន់លានផោន ឬត្រូវជា២៦១ពាន់លានដុល្លារពីរដ្ឋាភិបាលអង់គ្លេសនៅក្នុងកិច្ចប្រជុំកំពូលមួយនៅក្នុងប្រទេសដែនកោះ Samoa ។

សមាគមប្រជាជាតិនៃក្រុមប្រទេស Commonwealth នៅមុនពេលកិច្ចប្រជុំកាលពីថ្ងៃទី២៥ និងទី២៦ ខែតុលា នៅក្នុងប្រទេសកូនកោះ Samoa បានដាក់ពាក្យស្នើសុំឲ្យកិច្ចពិភាក្សាជាមួយនឹងប្រទេសអង់គ្លេសផងដែរជុំវិញបញ្ហារឿងក្តីទាមទារសំណងនៃការជួញដូរទាសករនេះ។

គេសង្កេតឃើញថា ទាំងរដ្ឋាភិបាលអង់គ្លេស និងនាយករដ្ឋមន្ត្រីអង់គ្លេស លោក Keir Starmer បានព្យាយាមយ់ាងខ្លាំងក្នុងការលុបចោលកិច្ចពិភាក្សានេះឲ្យចេញពីរបៀបវាៈ ប៉ុន្តែមិនបានទទួលជោគជ័យន៉ោះឡើយ។ Commonthwealth ភាគច្រើនសុទ្ធតែជាប្រទេសដែលធ្លាប់ស្ថិតនៅក្រោមអាណានិគមរបស់អង់គ្លេស ឬមានន័យថាសុទ្ធតែជាជនរងគ្រោះនៅក្នុងករណីបណ្តឹងទាមទារសំណងនេះផងដែរ។

សម្រាប់អង់គ្លេសវិញ ចំពោះករណីបណ្តឹងជាច្រើនដងនេះគឺពុំទាន់បានធ្វើការសម្រេចចិត្តណាមួយពាក់ព័ន្ធទៅនឹងទំហំសំណង ឬសូម្បីតែការសុំទោសជាផ្លូវការណាមួយនៅឡើយ។ លុះមកដល់អាណត្តិថ្មីនេះដូចគ្នា លោកនាយករដ្ឋមន្ត្រី Starmer ធ្លាប់បានបដិសេធរួចមកហើយចំពោះសំណងទាំងអស់ ហើយបញ្ជាក់ថានឹងមិនពិចារណាទាំងសំណង ឬការសុំទោសណាមួយឡើយចំពោះករណីអំពើឃោរឃៅដែលអូសបន្លាយ ៣សតវត្សរ៍មកហើយនេះដែរ។

ដោយមិនអាចជៀសរួចអំពីការថ្លែងការណ៍ចំពោះករណីពាក្យបណ្តឹងនេះ លោក Starmer នៅឯកិច្ចប្រជុំកំពូលនេះបានសារភាពថា សកម្មភាពជួញដូរទាសករ និងវណ្ណៈទាសករនោះគឺជារឿងដែរគួរឲ្យស្អប់ខ្ពើម ប៉ុន្តែទោះជាយ៉ាងណាក្តី មេដឹកនាំរូបនេះនៅតែបដិសេធមិនមានបំណង ឬពិចារណាទៅលើសំណងអ្វីនោះដែរ។

លោកពោលថា ៖

«ខ្ញុំបានត្រៀមខ្លួនរួចមកហើយមុនមកដល់ទីនេះសម្រាប់កិច្ចប្រជុំរយៈពេល២ថ្ងៃ។ យើងនឹងមិនមានប្រធានបទណាដែលពាក់ព័ន្ធអំពីលុយកាក់ត្រូវបានធ្វើឡើងឡើយនៅក្នុងរបៀបវារៈដែលគួរតែត្រូវបានផ្តោតតែទៅលើភាពធន់ និងបញ្ហាបរិស្ថានប៉ុណ្ណោះ»។

យ់ាងណាក្តី កាលពីក្នុងខែសីហាកន្លងមក ចៅក្រមតំណាងឲ្យអង្គការសហប្រជាជាតិ លោក Patrick Robinson បានលើកឡើងថា អង់គ្លេសមិនគួរប្រកែកឡើយចំពោះករណីបណ្តឹងទាមទារដ៏ធំមួយនេះហើយអះអាងថា ចំនួនដែលបានគណនាដោយក្រុមហ៊ុន Brattle Group គឺមានទំហំតិចជាងទំហំដែលរងការខូចខាតជាក់ស្តែងដោយសកម្មភាពជួញដូរទាសករទាំងនោះទៅទៀត៕