បរទេស ៖ តាមរបាយការណ៍ពីនាយកដ្ឋានពាណិជ្ជកម្មសហរដ្ឋអាមេរិក ដែលបានផ្សព្វផ្សាយដោយរ៉យទ័របង្ហាញថា​ តម្លៃទំនិញប្រចាំឆ្នាំបានឡើងដល់ ៥,៤ ភាគរយ ដែលកើនឡើងពី ៥,៣ នៅក្នុងខែធ្នូ។ ទន្ទឹមនឹងនេះដែរ ធនាគារកណ្តាល Federal Reserve បានប៉ាន់ប្រមាណសន្ទស្សន៍តម្លៃនៃការចំណាយផ្ទាល់ខ្លួន និងអតិផរណាបានកើនឡើង ៥,៤​ ភាគរយបើប្រៀបធៀបទៅនឹងឆ្នាំមុន។ អត្រាអតិផរណាដែលមិនរាប់បញ្ចូលតម្លៃអាហារ និងថាមពល បានកើនឡើង ៤,៧ ភាគរយ។

មន្ត្រីម្នាក់នៅធនាគារកណ្តាលអាមេរិកបានលើកឡើងថា អតិផរណានឹងនៅកម្រិតខ្ពស់ក្នុងរយៈពេលយូរ ហើយមិនងាយនឹងធ្លាក់ចុះក្នុងរយៈពេលខ្លីនោះទេ។ កម្លាំងអតិផរណាដែលប៉ះពាល់ដល់សេដ្ឋកិច្ចសហរដ្ឋអាមេរិកនាពេលបច្ចុប្បន្ននេះ គឺបណ្តាលមកពីបញ្ហាជាច្រើនបញ្ចូលគ្នាដ៏ស្មុគស្មាញរវាងបញ្ហា​រយៈពេលខ្លី និងបញ្ហារយៈពេលយូរអង្វែង។ លើសពីនេះ អតុល្យភាពដែលកំពុងកើតឡើងរវាងការផ្គត់ផ្គង់ និងតម្រូវការកម្លាំងពលកម្ម រួមជាមួយនឹងថ្លៃពលកម្មក្នុងវិស័យសេវាកម្ម គឺបានត្រឹមតែធ្វើឲ្យអតិផរណាខ្ពស់នោះអាចធ្លាក់ចុះយឺតៗតែប៉ុណ្ណោះ។

ស្របពេលជាមួយគ្នានេះ ក្រុមហ៊ុនគ្រប់គ្រងការវិនិយោគ និងសេវាកម្មហិរញ្ញវត្ថុដ៏ធំរបស់អាមេរិក Morgan Stanley បានព្រមានថា ភាគហ៊ុនរបស់អាមេរិកមិនមានភាពច្បាស់លាស់​ និងអាចធ្លាក់ចុះ ២៦ ភាគរយក្នុងរយៈពេលប៉ុន្មានខែខាងមុខទៀត។ អ្នកយុទ្ធសាស្រ្តភាគហ៊ុនកំពូលម្នាក់របស់អាមេរិក លោក Mike Wilson បាននិយាយថា កម្រិតនៃតម្លៃភាគហ៊ុនបច្ចុប្បន្នអាចប្រៀបធៀបទៅនឹង “តំបន់មរណៈ ឬ death zone” ដែលជាពាក្យមួយសំដៅទៅនឹងការឡើងភ្នំមានកម្ពស់ខ្ពស់ពេក ដែលធ្វើឲ្យអ្នកឡើងភ្នំមិនមានអុកស៊ីសែនគ្រប់គ្រាន់ដើម្បីដកដង្ហើម។

ការប្រៀបធៀបនេះបង្ហាញពីកម្រិតដែលតម្លៃភាគហ៊ុនបានកើនឡើងខ្លាំងកាលពីដើមឆ្នាំនេះ ប៉ុន្តែភាគហ៊ុនទាំងនោះនឹងងាយធ្លាក់ចុះខ្លាំងដូចគ្នា ជាក់ស្តែងភាគហ៊ុនដ៏ល្បីរបស់អាមេរិក S&P 500 អាចនឹងធ្លាក់ចុះប្រហែល ២៦ ភាគរយពីកម្រិតបច្ចុប្បន្ន។ ការព្យាករណ៍ដ៏អាក្រក់នេះបានកើតឡើង ខណៈដែលអ្នកវិភាគជាច្រើនបានយល់ឃើញថា ឆ្នាំនេះគឺជាឆ្នាំដ៏អាក្រក់បំផុតសម្រាប់ទីផ្សារភាគហ៊ុនចាប់តាំងពីវិបត្តិហិរញ្ញវត្ថុឆ្នាំ ២០០៨ ។ កាលពីឆ្នាំ២០២២​ កន្លងទៅនេះ សន្ទស្សន៍ភាគហ៊ុនទាំង៣ បានធ្លាក់ចុះ ដោយភាគហ៊ុន Dow Jones Industrial Average បានធ្លាក់ចុះ ៨,៨ ភាគរយ ភាគហ៊ុន S&P 500 បានធ្លាក់ចុះ ១៩,៤ ភាគរយ និងភាគហ៊ុន Nasdaq Composite បានធ្លាក់ចុះ ៣៣,១ ភាគរយ។

ស្របពេលនេះ​ដែរ អ្នកយុទ្ធសាស្រ្តជាច្រើនបានព្រមានម្តងហើយម្តងទៀតថា ទីផ្សារភាគហ៊ុននឹងមិនស្ថិតស្ថិរទេ ខណៈដែលកម្រិតអតិផរណាមិនងាយនឹងធ្លាក់ចុះ រួមផ្សំទាំងការដំឡើងអត្រាការប្រាក់របស់ធនាគារកណ្តាលអាមេរិកដើម្បីទប់ទល់អតិផរណា៕