សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ បច្ចុប្បន្ន ចិន គឺជាអ្នកក្តោបក្តាប់ទីផ្សាររថយន្តអគ្គិសនីនាំមុខគេរបស់ពិភពលោកតាមរយៈការរួមចំណែកដល់ទៅ៦០ភាគរយនៃការនាំចេញរថយន្តអគ្គិសនីទៅកាន់ទីផ្សារសកល និងផ្គត់ផ្គង់អាគុយរថយន្តអគ្គិសនីប្រមាណជា៧៧ភាគរយ ខណៈដែលចំណូលបានមកពីការនាំចេញទាំង២នេះមានប្រមាណជា ១៣៩ពាន់លានដុល្លាររួចទៅហើយគិតត្រឹមឆ្នាំ២០២៣។
ជាមួយគ្នានេះ ដើម្បីធានាតំណែងនេះបានយូរអង្វែង ចិន ត្រូវការធនធានរ៉ែយ៉ាងច្រើននៅក្នុងផលិតកម្មផលិតទ្រង់ទ្រាយធំបន្ថែមទៀត ដូច្នេះ ការស្វែងរកដៃគូផ្គត់ផ្គង់គឺជារឿងចាំបាច់បំផុតសម្រាប់ពេលវេលានេះ។ ជាក់ស្តែងនៅសប្តាហ៍នេះ ប្រទេសចិនទើបតែបានប្រកាសថានឹងអាចទាញយកធនធានរ៉ែលីចូមប្រមាណជាង៥០ម៉ឺនតោនក្នុងមួយឆ្នាំចេញពីទីតាំងដ៏សំខាន់មួយរបស់ខ្លួនដែលស្ថិតនៅក្នុងប្រទេសម៉ាលី ទ្វីបអាហ្វ្រិក។ លីចូម ជាធនធានរ៉ែសំខាន់បំផុតដែលយកមកប្រើប្រាស់នៅក្នុងផលិតកម្មផលិតអាគុយរបស់រថយន្តអគ្គិសនី។
យ៉ាងណាក្តី នេះគ្រាន់តែជាផែនការដំណាក់កាលទី១ប៉ុណ្ណោះរបស់ក្រុមហ៊ុនចិន Ganfeng Lithium ដែលមានមូលដ្ឋាននៅក្នុងប្រទេសម៉ាលី ហើយជឿជាក់ថា នឹងអាចបង្កើនការទាញយករ៉ែលីចូមនេះបន្ថែមទៀតនៅក្នុងចំនួនទ្វេដង ពោលគឺដល់ទៅ ១លានតោនក្នុងមួយឆ្នាំនៅក្នុងដំណាក់កាលទី២។
គួររំលឹកឡើងវិញថា កាលពីខែឧសភា កន្លងទៅនេះ ក្រុមហ៊ុនចិននេះបានចុះកិច្ចព្រមព្រៀងក្នុងតម្លៃប្រមាណជាង ៣៤០លានដុល្លារបន្ថែមទៀតក្នុងការបង្កើនភាគហ៊ុនរបស់ខ្លួននៅក្នុងគម្រោងទាញយកលីចូមនៅក្នុងប្រទេសម៉ាលី។ មិនត្រឹមតែប៉ុណ្ណោះ Ganfeng បានបញ្ជូនអ្នកជំនាញពីសកលវិទ្យា Nanjing University ជាច្រើននាក់ដើម្បីអាចកែច្នៃវិធីសាស្ត្រក្នុងការទាញយករ៉ែលីចូមឲ្យបានកាន់តែងាយស្រួល និងច្រើនឡើងទៀត សូម្បីតែចេញពីទឹកសមុទ្រ និងទឹកបឹងនានានៅក្នុងប្រទេសម៉ាលីផងដែរ។
អ្វីដែលគេបានដឹងបន្ថែមទៀតនៅពេលនេះគឺថា ក្រុមហ៊ុនចិនដែលជាក្រុមហ៊ុនអ្នកផលិតលីចូមធំជាងគេបំផុតរបស់ចិននេះនឹងអាចចំណាយលុយមួយចំនួនធំទៀតក្នុងការទិញយកភាគហ៊ុនទាំងអស់តែម្តងពីក្រុមហ៊ុនដែលគ្រប់គ្រងលើគម្រោងនៅម៉ាលី គឺក្រុមហ៊ុនអូស្ត្រាលី Leo Lithium ខណៈដែលបច្ចុប្បន្នគេបានក្តោបក្តាប់ភាគហ៊ុនប្រមាណជា៤០ភាគរយរួចទៅហើយ។
គួរឲ្យដឹងដែរថា គម្រោងទាញយករ៉ែលីចូមដ៏ធំបំផុតរបស់ប្រទេសម៉ាលីត្រូវបានគេស្គាល់ថា Goulamina Project មានទីតាំងស្ថិតនៅចំងាយប្រមាណជា១៥០គីឡូម៉ែត្រពីរដ្ឋធានីនៃប្រទេសម៉ាលី Bamako ហើយក៏ជាទីតាំងដែលមានរ៉ែលីចូមច្រើនបំផុតរបស់ពិភពលោក៕
Account
Security
Favourite Content