សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជាបានរៀបចំវេទិការវេចខ្ចប់ និងពិព័រណ៍បច្ចេកវិទ្យាអាហារ ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ ចាប់ពីថ្ងៃទី ២៨ ដល់ថ្ងៃទី៣០ ខែកញ្ញា ឆ្នាំ២០២៦ ។ វេទិកា និងពិព័រណ៍មួយនេះ នឹងជួយឱ្យផលិតផលរបស់សហគ្រិនកម្ពុជា កាន់តែមានភាពទាក់ទាញ សោភណ្ឌភាព និងស្តង់ដារ សម្រាប់ការប្រកួតប្រជែងជាមួយផលិតផលបរទេស។
នៅក្នុងឱកាសបើកវេទិកាវេចខ្ចប់ និងពិព័រណ៍បច្ចេកវិទ្យាអាហារកម្ពុជា កាលពីព្រឹកថ្ងៃទី២៨ កញ្ញា ២០២៦ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា ការពង្រឹងសមត្ថភាពផ្នែកវេចខ្ចប់នាពេលនេះ គឺស្របពេលដែលឧស្សាហកម្មកែច្នៃអាហារ និងផលិតកម្មក្នុងស្រុកកំពុងមានភាពរីកចម្រើន និងមានការគាំទ្រពីប្រជាពលរដ្ឋកម្ពុជា ។
ឯកឧត្តម បន្តថា៖ « ការវេចខ្ចប់ គឺជាតំណភ្ជាប់បន្ទាប់ពីខ្សែច្រវាក់ផលិតកម្ម ហើយការអភិវឌ្ឍវិស័យនេះ ពិតជាមានសារសំខាន់ណាស់ ដែលមិនត្រឹមតែសម្រាប់ការកែលម្អផលិតផលនីមួយៗប៉ុណ្ណោះទេ តែថែមទាំងសម្រាប់ពង្រឹងខ្សែច្រវាក់ផ្គត់ផ្គង់ក្នុងស្រុក និងបង្កើនតម្លៃបន្ថែមសម្រាប់សេដ្ឋកិច្ចកម្ពុជាផងដែរ ។ ប្រព័ន្ធអេកូឡូស៊ីវេចខ្ចប់ ដែលមានភាពប្រកួតប្រជែង ត្រូវការអ្នកផ្គត់ផ្គង់ក្នងុស្រុកកាន់តែរឹងមាំ សេវាបច្ចេកទេស សមត្ថភាពស្រាវជ្រាវ និងធ្វើតេស្ត ព្រមទាំងទំនាក់ទំនងកាន់តែជិតស្និទ្ធរវាងអ្នកផលិតសំបកវេចខ្ចប់ និងឧស្សាហកម្មដែលប្រើប្រាស់សំបកវេចខ្ចប់ »។
លោក Gerard Leeuwnburgh អគ្គនាយកប្រចាំប្រទេសម៉ាឡេស៊ី និងកម្ពុជា នៃក្រុមហ៊ុន Informa Markets បានមានប្រសាសន៍ថា ពិព័រណ៍បច្ចេកវិទ្យាអាហារកម្ពុជា២០២៦ និងវេទិកាវេចខ្ចប់នេះ នឹងក្លាយជាវេទិកាដ៏សំខាន់មួយសម្រាប់គំនិតអាជីវកម្មធំៗ ដំណោះស្រាយឆ្លាតវៃ និងកិច្ចសហការជាសកល ។
លោកនិយាយថា ៖« យើងសូមលើកទឹកចិត្តអ្នកចូលរួមឱ្យស្វែងយល់បង្កើតទំនាក់ទំង និងទទួលការបំផុសគំនិត ខណៈដែលពួកយើងរួមគ្នាកសាងឧស្សាហកម្មផលិត និងកែច្នៃអាហារដែលកាន់តែមានចីរភាព នវានុវត្តន៍និងប្រាក់ចំណេញ » ។
លោក អូន ម៉េងហ៊ាង ក្រុមការងាររៀបចំពិព័រណ៍ មកពីអគ្គនាយកដ្ឋានសហគ្រាសធុនតូច និងមធ្យម និងសិប្បកម្ម នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា នៅក្នុងរយៈពេល៣ថ្ងៃនេះ ក្រុមហ៊ុនរបស់អគ្គនាយកដ្ឋាន សហគ្រាសធុនតូច និងមធ្យម និងសិប្បកម្ម រង់ចាំផ្ដល់ដំណោះស្រាយសម្រាប់ម្ចាស់សហគ្រាសទាំងឡាយ ដែលត្រូវការឱ្យក្រុមការងារផ្ដល់យោបល់ទៅលើរចនាសំបកវេចខ្ចប់ផលិតផល ។
លោកបន្តថា នៅក្នុងសហគ្រាសមួយ ទោះបីជាម្ចាស់សហគ្រាសនោះផលិតបាននូវផលិតផលដែលមានគុណភាពល្អប៉ុណ្ណាក៏ដោយ ប៉ុន្តែបើសិនជាការវេចខ្ចប់មិនមានអនាម័យ មិនមានភាពទាក់ទាញ ក៏នឹងមិនធ្វើឱ្យផលិតផលទាក់ទាញអតិថិជននៅលើទីផ្សារបានដែរ ។ ដូច្នេះ ការវេចខ្ចប់បានល្អ មានអនាម័យ គឺជាជោគជ័យមួយរបស់ម្ចាស់សហគ្រាសក្នុងការវាយលុកផលិតផលរបស់ខ្លួននៅលើទីផ្សារ ហើយតាមរយៈវេទិកាដែលរៀបចំឡើងដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅពេលនេះ នឹងជួយឱ្យសហគ្រិនអាចពង្រីកទីផ្សារផលិតផលរបស់ខ្លួនបានកាន់តែខ្លាំង ៕
Account
Security
Favourite Content