សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទូរទស្សន៍ និងស្ថានីយវិទ្យុចិន មកពីខេត្តយូណាន បានសន្យានឹងជួយផ្សព្វផ្សាយសក្តានុពលទេសចរណ៍កម្ពុជាទៅដល់ប្រជាជនចិន ដែលតាមរយៈការផ្សព្វផ្សាយនេះរំពឹងថា ចំនួនទេសចរចិននឹងមកកម្ពុជាកាន់តែច្រើន។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នារសៀលថ្ងៃទី១៤ ខែសីហា ឆ្នាំ២០២៥ បានអនុញ្ញាតឱ្យលោកស្រី Zhang Jing ប្រធានផ្នែកប៉ុស្តិ៍អន្តរជាតិ Lancang Mekong នៃស្ថានីយវិទ្យុ និងទូរទស្សន៍ខេត្តយូណាន និងសហការីចូលជួបសម្តែងការគួរសម និងស្នើសុំគោរពរាយការណ៍ និងអនុសាសន៍ណែនាំលើការរៀបចំព្រឹត្តិការណ៍ទេសចរណ៍ជាលក្ខណៈអន្តរជាតិដ៏ធំនៅរាជធានីភ្នំពេញ និងខេត្តសៀមរាប ដើម្បីអបអរសាទរឆ្នាំទេសចរណ៍កម្ពុជា-ចិន ។
ក្នុងជំនួបនេះ ឯកឧត្តមរដ្ឋមន្រ្តី បានថ្លែងអំណរគុណ និងវាយតម្លៃខ្ពស់ចំពោះលោកស្រី Zhang Jing ដែលបានខិតខំប្រឹងប្រែងផលិតជាវីដេអូផ្សព្វផ្សាយគោលដៅទេសចរណ៍ និងទេសភាពស្រស់បំព្រងរបស់ប្រទេសកម្ពុជា អរិយធម៌បុរាណ វប្បធម៌ដ៏សំបូបែប ប្រជាជនប្រកបដោយស្នាមញញឹមរួសរាយរាក់ទាក់ទៅកាន់ប្រជាជនចិន ដើ់ម្បីទាក់ទាញភ្ញៀវទេសចរចិនមកទស្សនានៅប្រទេសកម្ពុជាឱ្យកាន់តែច្រើនឡើង។
ទន្ទឹមនឹងនេះដែរ ឯកឧត្តមរដ្ឋមន្រ្តី បានឯកភាព និងផ្តល់កិច្ចសហការលើគម្រោងអញ្ជើញអ្នកសារព័ត៌មាន និង influencers ល្បីៗរបស់ចិនមកប្រទេសកម្ពុជា ដើម្បីជ្រាបពីសភាពការណ៍នយោបាយ សន្តិសុខ សង្គមពិតជាក់ស្តែង និងសុខសន្តិភាពរបស់ប្រទេសកម្ពុជាដែលជាគោលដៅទេសចរណ៍ប្រកបដោយភាពកក់ក្តៅ ផ្តល់សុវត្ថិភាពជូនភ្ញៀវទេសចរគ្រប់រូប។
នៅឆ្នាំ២០២៤ កម្ពុជាទទួលទេសចរអន្តរជាតិចំនួន៦,៧ លាននាក់ និងទេសចរជាតិប្រមាណ ២២,៥២ លាននាក់ហើយចំណូលទេសចរណ៍អន្តរជាតិ ប្រមាណ ៣.៦៣៧ លានដុល្លាអាម៉េរិក កើនឡើង ១៨%។វិស័យទេសចរណ៍បានរួមចំណែកក្នុងផលិតផលក្នុងស្រុកសរុបប្រមាណ ៩,៤%។
សម្រាប់ឆមាសទី១ ឆ្នាំ២០២៥ នេះ កម្ពុជាទទួលបានទេសចរអន្តរជាតិប្រមាណ ៣លាន ៣៦ម៉ឺន នាក់ កើនឡើង ៦% ធៀបនឹងរយៈពេលដូចគ្នាឆ្នាំ២០២៤ ហើយទេសចរជាតិ ប្រមាណ ១៤លាន ៥៧ ម៉ឺននាក់ កើន ឡើង ៥០% ធៀបនឹងរយៈពេលដូចគ្នាឆ្នាំ២០២៤។
យោងតាមរបាយការណ៍របស់ក្រសួងទេសចរណ៍ ក្នុងឆ្នាំ២០២៤កន្លងទៅ មានទេសចរចិនជាង៨៤ម៉ឺននាក់ បានមកទស្សនានៅកម្ពុជា ចំនួននេះកើនឡើង៥៥% បើធៀបនឹងឆ្នាំ២០២៣ហើយនៅឆ្នាំ២០២៥នេះ រំពឹងថានឹងកើនឡើង៕
Account
Security
Favourite Content