ភ្នំពេញ៖ ក្រៅពីទីផ្សារប្រទេសជប៉ុនដែលកំពុងមានការគាំទ្រយ៉ាងខ្លាំងនោះ គ្រាប់ស្វាយចន្ទី​កម្ពុជា​ចំនួន​១៤​តោន​ ដែលត្រូវបានកែច្នៃសម្រេច​ ១០០ភាគរយ ដោយក្រុមហ៊ុន អ៊ែមភល ​អាហ្រ្គោប្រដាក់ ( Ample Agro) តាមរយៈការគាំទ្របច្ចេកទេស​ និងវាយតម្លៃពីក្រុមហ៊ុនដៃគូ​សហភាពអឺរ៉ុប​ ត្រូវបាននាំចេញទៅកាន់ទីផ្សារប្រទេសអ៊ីតាលីជាលើកដំបូងនៅថ្ងៃទី៤​ ខែកញ្ញា​ ឆ្នាំ២០២៥​ បន្ទាប់ពីក្រុមហ៊ុន MIRARTH Agri Tech ដែលមានមូលដ្ឋាននៅក្នុងខេត្តកំពង់ធំ ធ្លាប់បានប្រកាសធ្វើការនាំចេញគ្រាប់ស្វាយចន្ទីកែច្នៃរួចទៅសហគមន៍អឺរ៉ុបចំនួន ២៥០តោន ដោយតាមការប៉ាន់ស្មានតម្លៃប្រមាណជាង ២០០លានដុល្លារអាម៉េរិក។

ក្រសួងកសិកម្ម​ រុក្ខាប្រមាញ់​ និងនេសាទ​ បានចាត់ទុកថា​ ការនាំចេញគ្រាប់ស្វាយចន្ទីកម្ពុជាលើកដំបូងទៅកាន់ប្រទេសអ៊ីតាលី គឺជាជំហានដ៏សំខាន់សម្រាប់ដំណាំស្វាយចន្ទី ដែល​ជាដំណាំយុទ្ធសាស្ត្រ ហើយឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលក្នុងការជំរុញការនាំចេញផលិតផលកែច្នៃ។ ជាមួយគ្នានេះ ការចូលទៅកាន់ទីផ្សារដែលមានតម្លៃខ្ពស់ដូចជាប្រទេសអ៊ីតាលី និងសហភាពអឺរ៉ុប មិនត្រឹមតែលើកកម្ពស់កេរ្តិ៍ឈ្មោះស្វាយចន្ទីកម្ពុជាប៉ុណ្ណោះទេ ប៉ុន្តែថែមទាំងធានានូវការបន្ថែមតម្លៃកាន់តែច្រើនសម្រាប់សេដ្ឋកិច្ចជាតិផងដែរ។

ស្ថានទូតអង់គ្លេសប្រចាំកម្ពុជា កាលពីពេលកន្លងទៅថ្មីៗនេះធ្លាប់បានលើកឡើងថា៖ គ្រាប់ស្វាយចន្ទីកម្ពុជាស្ថិតក្នុងចំណោមគ្រាប់ធញ្ញជាតិល្អបំផុតនៅលើពិភពលោក ហើយអង់គ្លេសក៏មានមោទនភាពដែលបានគាំទ្រក្រុមហ៊ុន Ample Agro ក្នុងការចែករំលែករសជាតិដ៏អស្ចារ្យនៃគ្រាប់ស្វាយចន្ទីកម្ពុជាទៅកាន់ពិភពលោក។

លោក Dominic Williams ឯកអគ្គរាជទូតវិសាមញ្ញ និងពេញសមត្ថភាពនៃចក្រភពអង់គ្លេសប្រចាំកម្ពុជា បានមានប្រសាសន៍ថា៖

«ការនាំចេញគ្រាប់ស្វាយចន្ទីកម្ពុជាគុណភាពខ្ពស់ទៅកាន់អឺរ៉ុប ជាព្រឹត្តិការណ៍ដ៏សំខាន់មួយដែលអាចធ្វើទៅបានតាម​រយៈ​ការតភ្ជាប់ដែលបង្កើតឡើងដោយកម្មវិធីដៃគូពាណិជ្ជកម្ម។ យើងទន្ទឹងរង់ចាំមើលផលិតផលកម្ពុជាជាច្រើនទៀតមាននៅលើធ្នើផ្សារទំនើបរបស់ចក្រភពអង់គ្លេសក្នុងពេលឆាប់ៗនេះ ហើយដើម្បីពង្រឹងទំនាក់ទំនងរវាងប្រទេសទាំងពីរឱ្យកាន់តែស៊ីជម្រៅតាមរយៈពាណិជ្ជកម្ម ការច្នៃប្រឌិត និងភាពជោគជ័យរួមគ្នា»។

ទាក់ទងនឹងវិស័យស្វាយចន្ទីនេះ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានលើកឡើងថា៖

«ការនាំចេញគ្រាប់ស្វាយចន្ទីកែច្នៃទៅកាន់សហភាពអឺរ៉ុប មិនត្រឹមជាភាពជោគជ័យសម្រាប់តែក្រុមហ៊ុនទេ ប៉ុន្តែគឺជាដំណាក់កាលដ៏សំខាន់ក្នុងដំណើរបេសកកម្មរបស់កម្ពុជាក្នុងការនាំយកទំនិញផលិតផលកម្ពុជា “Product of Cambodia” ទៅកាន់ទីផ្សារអន្តរជាតិ»។

ឯកឧត្តម បានមានប្រសាសន៍ថា ៖ ក្រសួងពាណិជ្ជកម្ម តាមរយៈក្រុមការងារជំរុញការនាំចេញបានដាក់ចេញនូវបេសកកម្មដ៏សំខាន់ក្នុងការនាំយក និងណែនាំទំនិញសក្តានុពលរបស់កម្ពុជាទៅកាន់ទីផ្សារពិភពលោក។ ក្រុមការងារជំរុញការនាំចេញនេះបានទទួលគោលការណ៍ក្នុងការជួយដល់អ្នកនាំចេញរបស់កម្ពុជា ដើម្បីដោះស្រាយបញ្ហាប្រឈមនានាក្នុងការនាំចេញ ក៏ដូចជាជួយផ្សារភ្ជាប់រវាងអ្នកទិញបរទេសជាមួយនឹងអ្នកនាំចេញកម្ពុជា សំដៅសម្រេចបានជាកិច្ចសន្យាទិញ-លក់តែម្តង។ ក្រសួងក៏បានរៀបចំ មជ្ឈមណ្ឌលសេវានាំចេញ ដើម្បីជួយផ្តល់ការប្រឹក្សាយោបល់ និងបណ្តុះបណ្តាលដល់អ្នកនាំចេញ ឬអ្នកមានបំណងនាំចេញក្នុងការស្វែងយល់បន្ថែមអំពីលក្ខខណ្ឌតម្រូវ ព័ត៌មានទីផ្សារ និងនិន្នាការជុំវិញសកលោក ដើម្បីជួយជំរុញដល់ការនាំចេញផងដែរ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានលើកឡើងថា ការនាំចេញគ្រាប់ស្វាយចន្ទីលើកដំបូងទៅកាន់អឺរ៉ុបនេះជារឿងល្អ និងជាសញ្ញាវិជ្ជមានមួយ។ នៅអឺរ៉ុបតម្រូវការភូតគាមអនាម័យគឺខ្ពស់ ដូច្នេះ ការនាំចេញស្វាយចន្ទីទៅសហភាពអឺរ៉ុបនេះ បានបញ្ជាក់ពីស្តង់ដារម្ហូបអាហារកម្ពុជាអាចទទួលយកបាននៅលើទីផ្សាអន្តរជាតិ។

សូមបញ្ជាក់ដែរថា ក្រៅពីបណ្តាប្រទេសមួយចំនួននៅក្នុងសហភាពអឺរ៉ុប វត្តមានគ្រាប់ស្វាយចន្ទីកែច្នៃ១០០%របស់កម្ពុជា ក៏កំពុងចរាចរណៅក្នុងប្រទេសជប៉ុនយ៉ាងទូលាយ ដែលត្រឹមតែនៅក្នុងកន្លែងលក់ទំនិញ Family Mart មានសាខារហូតដល់ជាង ១៦ ៣២០ទីតាំង ក៏ដាក់តាំងលក់គ្រាប់ចន្ទីកម្ពុជាផងដែរ។

យោងតាមក្រសួងកសិកម្ម រុក្ខាប្រមាញ់ និងនេសាទ កម្ពុជាមានផ្ទៃដីប្រមូលផលស្វាយចន្ទីសរុបចំនួនជាង ៥៨ ម៉ឺនហិកតា ក្នុងនោះ​ខេត្ត​ចំនួន ១០ របស់កម្ពុជា មានផ្ទៃដី​ដាំដុះ​ស្វាយ​​​​​ចន្ទីច្រើនជាងគេរួមាន ខេត្តកំពង់​ធំ ចំ​នួន ១៤៧ ៧០៣​ហិកតា, ខេត្តក្រចេះ ១០២ ៥២០ ហិកតា, ខេត្តរតនគិរីចំនួន ៩៧ ២៥៨ ហិកតា, ខេត្តកំពង់ចាម ៤៦ ៥៨២ ហិកតា, ស្ទឹងត្រែង ៤៤ ២៥០ ហិកតា, ខេត្ត​ត្បូងឃ្មុំ ៣៦ ៤០៣ ហិកតា, ខេត្តសៀមរាប ៣៥ ៩១៤ ហិកតា, ខេត្តព្រះវិហារ ២៨ ៩៦៥ ហិកតា, ឧត្តរមានជ័យ ១៣ ៨១៨ ហិកតា និងមណ្ឌលគិរី ៩ ៨៥៨ ហិកតា។

ចំណែកក្រសួងពាណិជ្ជកម្មបានឱ្យដឹងថា៖ នៅឆមាសទី១ ឆ្នាំ២០២៥ កម្ពុជារកចំណូលបានជាង ៧៥៣ លានដុល្លារ ពីការនាំ​ចេញ​គ្រាប់​ស្វាយ​ចន្ទីជិត ៦០ ម៉ឺន​តោន កើនឡើង ៥៦,៦៧ ភាគរយ ធៀបនឹង​រយៈ​ពេលដូចគ្នា កាលពីឆ្នាំ ២០២៤ ដែលមានទឹកប្រាក់ ៤៨០ លានដុល្លារ។ ប្រទេសវៀតណាមជាទីផ្សារស្វាយចន្ទីធំជាងគេរបស់កម្ពុជា។

ដោយឡែក យោងតាមរបាយការណ៍សមាគមស្វាយចន្ទីកម្ពុជា នៅឆ្នាំ២០២៤ កម្ពុជា​សម្រេច​​បានការ​ប្រមូលទិន្នផលគ្រាប់​ស្វាយ​ចន្ទី​ចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើន​ឡើង ២១% គិត​ជា​ទឹក​ប្រាក់​​ ១ ពាន់ ១៥០ លាន​ដុល្លារ កើន ២៦,១៥%។ ក្នុងនោះ​នាំចេញ​ទៅវៀត​ណាមចំនួន ៧៩ ម៉ឺន ៥ ពាន់​តោន៕