សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ យោងតាមរបាយការណ៍វឌ្ឍនភាពឆមាសទី១នៃឆ្នាំ២០២៥ របស់ក្រសួងសាធារណការ និងដឹកជញ្ជូន បានឱ្យដឹងថា កម្ពុជាត្រូវការការវិនិយោគទុនសរុបចំនួន ៣.២៥ ពាន់លានដុល្លារ ដើម្បីពង្រឹងបណ្តាញដឹកជញ្ជូនតាមទន្លេ និងប្រព័ន្ធភស្តុភារកម្មតាមផ្លូវទឹក ដែលគម្រោងដឹកជញ្ជូនតាមដងទន្លេមានចំនួន២៣ គ្រោងនឹងដាក់ឱ្យដំណើរការក្រោមផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ២០២៣-២០៣៣ (CITLS 2023-2033)។
ក្នុងរបាយការណ៍ដដែលនេះបានឱ្យដឹងថា នៅក្នុងឆមាសទី១ នៃឆ្នាំ២០២៥ ក្រសួងសម្រេចបាននូវចំណុចសំខាន់ៗ ជាមួយនឹងការរៀបចំច្បាប់ស្តីពីការដឹកជញ្ជូនតាមផ្លូវទឹក ដែលត្រូវបានអនុម័តជាផ្លូវការនៅក្នុងខែមីនា ឆ្នាំ២០២៤។ ច្បាប់នេះត្រូវបានបង្កើតឡើងដើម្បីគ្រប់គ្រង និងអភិវឌ្ឍកំពង់ផែ ដើម្បីលើកកម្ពស់វិស័យដឹកជញ្ជូនតាមផ្លូវទឹក និងជំរុញសម្រួលដល់ការលើកកម្ពស់ពាណិជ្ជកម្ម។
ក្រោមក្របខ័ណ្ឌ CITLS រដ្ឋាភិបាលបានគូសបញ្ជាក់គម្រោងរយៈពេលខ្លី និងមធ្យមចំនួន ១៦ (២០២៣- ២០២៧) ដែលមានតម្លៃ ២.៥៦ ពាន់លានដុល្លារ និងគម្រោងរយៈពេលវែងចំនួន៩ (២០២៨-២០៣៣) មានតម្លៃ៦៩០ លានដុល្លារ។ គួរកត់សម្គាល់ថា គម្រោងរយៈពេលខ្លី និងមធ្យមចំនួនពីរនឹងបន្តរហូតដល់ឆ្នាំ២០៣៣។ រាជរដ្ឋាភិបាល ក៏បានផ្តួចផ្តើមគម្រោងការអភិវឌ្ឍព្រែកជីកហ្វូណនតេជោទី១ ជាប្រវត្តិសាស្ត្រកម្ពុជា ដែលនឹងឆ្លងកាត់ខេត្តកណ្តាល តាកែវ កំពត និងកែប។ គួរជម្រាបដែរថា គម្រោងរយៈពេលខ្លី និងមធ្យមចំនួន៦ បានចាប់ផ្តើមរួចហើយ ខណៈដែលគម្រោងចំនួន១០នៅតែត្រូវបានផ្អាក ដោយសារកង្វះថវិកា ខណៈដែលរាជរដ្ឋាភិបាលកំពុងស្វែងរកដៃគូអភិវឌ្ឍន៍យ៉ាងសកម្មដើម្បីជំរុញគម្រោងឱ្យឆ្ពោះទៅមុខ។
ក្រសួងសាធារណការ និងដឹកជញ្ជូន បានលើកឡើងពីការអនុវត្តគម្រោងចំនួន២៣ ក្នុងវិស័យដឹកជញ្ជូន និងភស្តុភារកម្មតាមដងទន្លេ នឹងនាំមកនូវអត្ថប្រយោជន៍ជាច្រើនដល់សេដ្ឋកិច្ចកម្ពុជា។ ការកែលម្អប្រព័ន្ធដឹកជញ្ជូនតាមដងទន្លេ និងតាមផ្លូវទឹកមានសារៈសំខាន់ក្នុងការជួយដល់កំណើនសេដ្ឋកិច្ចកម្ពុជា សម្រួលដល់ចលនាទំនិញ និងធ្វើឱ្យកម្ពុជាក្លាយជាមជ្ឈមណ្ឌលពាណិជ្ជកម្មក្នុងតំបន់ដែលមានការប្រកួតប្រជែងជាងមុន។
យោងតាមឯកឧត្តម ផន រីម អ្នកនាំពាក្យរបស់ក្រសួងសាធារណការ និងដឹកជញ្ជូន បានឱ្យដឹងថា គម្រោងដឹកជញ្ជូនតាមដងទន្លេចំនួន ២៣ ដែលទាមទារការវិនិយោគសរុបចំនួន ៣.២៥១ ពាន់លានដុល្លារ នឹងត្រូវដាក់ឱ្យដំណើរការ ដើម្បីពង្រឹងប្រព័ន្ធភ័ស្តុភារកម្មរបស់កម្ពុជា កាត់បន្ថយថ្លៃដឹកជញ្ជូន និងទាក់ទាញការវិនិយោគកាន់តែច្រើនចូលមកក្នុងប្រទេស។
ឯកឧត្តម ផន រឹម បានបញ្ជាក់ថា៖« ការអភិវឌ្ឍន៍ប្រព័ន្ធអន្តរកម្មរួមមួយ នឹងតភ្ជាប់ផ្លូវទឹកជាមួយបណ្តាញផ្លូវដែក និងផ្លូវថ្នល់ ដើម្បីផ្លាស់ទីទំនិញពីកន្លែងផលិតទៅកាន់ទីផ្សារ និងកំពង់ផែក្នុងរយៈពេលខ្លី។ គម្រោងទាំងនេះត្រូវបានគេរំពឹងថា នឹងផ្តល់អត្ថប្រយោជន៍សេដ្ឋកិច្ចរយៈពេលវែង និងដោះស្រាយឧបសគ្គមួយចំនួនដែលអ្នកនាំចេញ អ្នកនាំចូល និងអាជីវកម្មក្នុងស្រុកតែងប្រឈម។
ឯកឧត្តមបានបញ្ជាក់ថា ក្រោយពេលអនុវត្តកម្មវិធីនៃគម្រោងទាំងនេះ មិនត្រឹមតែកាត់បន្ថយការចំណាយ និងពេលវេលាលើការដឹកជញ្ជូនប៉ុណ្ណោះទេ ប៉ុន្តែថែមទាំងបង្កើនប្រសិទ្ធភាពផងដែរ។ ទន្ទឹមនឹងនោះ ក្រសួងកំពុងរៀបចំច្បាប់ និងបទប្បញ្ញត្តិចាំបាច់នានា ដើម្បីគ្រប់គ្រងការវិនិយោគ និងធានាបាននូវការដឹកជញ្ជូនដោយរលូន។ អាទិភាពនឹងត្រូវបានផ្តល់ទៅឱ្យគម្រោងយុទ្ធសាស្ត្រ ដូចជាការអភិវឌ្ឍន៍ផ្លូវទឹកសំខាន់ៗ ការសាងសង់កំពង់ផែស្វយ័ត និងការបង្កើតមជ្ឈមណ្ឌលដឹកជញ្ជូន។
សូមជ្រាបថា ប្រព័ន្ធទន្លេគឺជាទ្រព្យសម្បត្តិដ៏សំខាន់បំផុតមួយរបស់កម្ពុជា។ តាមរយៈការធ្វើឱ្យប្រសើរឡើងនូវបណ្តាញភស្តុភាកម្មទាំងនេះ នឹងអាចកាត់បន្ថយការចំណាយ បើកឱកាសពាណិជ្ជកម្មថ្មី និងរួមចំណែកដល់កំណើនប្រកបដោយចីរភាព ខណៈហិរញ្ញប្បទាននៅតែជាចំណុចសំខាន់ដែលរដ្ឋាភិបាលគ្រោងនឹងប្រើប្រាស់ផ្នែកមួយនៃថវិការដ្ឋសម្រាប់គម្រោងអាទិភាព ហើយនឹងបន្តស្វែងរកកម្ចីសម្បទានពីដៃគូអភិវឌ្ឍន៍ រួមមានធនាគារពិភពលោក ធនាគារអភិវឌ្ឍន៍អាស៊ី និងទីភ្នាក់ងារអភិវឌ្ឍន៍បារាំងជាដើម៕
Account
Security
Favourite Content