សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ខណៈពេលដែលកម្ពុជាបិទការនាំចូលបន្លែ និងផ្លែឈើទាំងស្រុងពីប្រទេសថៃ សហគមន៍កសិកម្មបានប្រកាន់គោលជំហរមិនដំឡើងថ្លៃ «បន្លែ» ហើយថែមទាំងពង្រីកលទ្ធភាពក្នុងការបង្កបង្កើនផល ជំរុញការដាំដំណាំបន្ថែមដើម្បីផ្គត់ផ្គង់តម្រូវការទីផ្សារ។
លោក អ៊ុង អឿន ប្រធានសហគមន៍កសិកម្មទំនើប (បន្លែផ្ទះសំណាញ់ ត្រាំកក់) ដែលផ្តោតលើការដាំដំណាំបន្លែក្នុងផ្ទះសំណាញ់ ស្ថិតនៅស្រុកត្រាំកក់ ខេត្តតាកែវ បានប្រាប់ AMS ថា ក្រោយពេលដែលរាជរដ្ឋាភិបាលកម្ពុជាបានសម្រេចបិទការនាំចូលបន្លែពីប្រទេសថៃ សហគមន៍បានរៀបចំផែនការយុទ្ធសាស្ត្រក្នុងការដាំដុះនូវប្រភេទបន្លែដែលមានតម្រូវការខ្ពស់ ជាពិសេស ការបង្កើនលទ្ធភាពឱ្យបានច្រើនជាងមុនដើម្បីធានាដល់ការផ្គត់ផ្គង់ទីផ្សារ ប៉ុន្តែមិនមានគម្រោងដំឡើងថ្លៃនោះទេ។
ប្រធានសហគមន៍រូបនេះ បានលើកឡើងថា ៖
«បើសម្រាប់ខ្លួនខ្ញុំផ្ទាល់តែម្ដងយល់ថា ការបិទមិនឱ្យនាំចូលបន្លែពីប្រទេសថៃ វាជាឱកាសល្អសម្រាប់បងប្អូនប្រជាកសិករក្នុងស្រុក ដែលអាចមានចំណែកទីផ្សារជាងមុន មានឱកាសទទួលបានចំណូលច្រើនជាងមុន ប៉ុន្តែទោះជាយ៉ាងណា បងប្អូនប្រជាកសិករមិនត្រូវយកឱកាសនេះដំឡើងថ្លៃ ឬយកបន្លែដែលគ្មានគុណភាពទៅកាន់ទីផ្សារនោះ។ និយាយឱ្យចំតែម្ដង គឺត្រូវឱកាសនេះបង្កើនទំនុកចិត្តដល់បងប្អូនប្រជាពលរដ្ឋរបស់យើង»។
លោក អ៊ុង អឿន បានបន្ថែមថា ៖
«យើងសុទ្ធតែជាអ្នកដាំដំណាំ យើងនឹងយកបញ្ហាបិទព្រំដែននេះមកជួយបង្កើនការផលិត មួយជាពីរ ទ្វេឡើង ព្រោះប្រជាកសិកម្មទំនើបយើងខ្ញុំ ក៏ទើបនឹងបានទទួលផ្ទះសំណាញ់ចំនួន ១០០ ខ្នងបន្ថែមទៀតសម្រាប់បង្កើនលទ្ធភាពផលិតបន្លែសុវត្ថិភាពសម្រាប់ផ្គត់ផ្គង់ទីផ្សារក្នុងស្រុករបស់យើង ខណៈដែលបច្ចុប្បន្ននេះ អាចប្រមូលផលបន្លែបានចន្លោះពី ២ ទៅ ២,៥តោន ជាមធ្យមក្នុងមួយថ្ងៃ»។
ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងពិពិធកម្មកសិកម្មកម្ពុជាបានឱ្យដឹងថា ការផ្ដល់ផ្ទះសំណាញ់១០០ខ្នង ពីក្រុមការងាររដ្ឋាភិបាលចុះមូលដ្ឋានដល់កសិករជាសមាជិក និងសហគមន៍កសិកម្មទំនើបបន្លែផ្ទះសំណាញ់ត្រាំកក់នាពេលនេះ នឹងបន្ថែមភាពរឹងមាំមួយកម្រិតទៀតដល់ស្ថិរភាពនៃការផ្គត់ផ្គង់បន្លែពីកសហគមន៍ទៅកាន់ទីផ្សារក្នុងស្រុក និងបង្កើតសមត្ថភាពប្រកួតប្រជែងនៃផលិតកម្មបន្លែ។
ឯកឧត្តមបានបញ្ជាក់ថា៖ ជំហាននៃការអភិវឌ្ឍនេះនឹងក្លាយជាមូលដ្ឋានគ្រឹះដ៏សំខាន់ក្នុងការពង្រីកវិសាលភាពនៃប្រតិបត្តិការរបស់សហគមន៍កសិកម្មទំនើបនៅត្រាំកក់ ហើយថែមទាំងបានបម្រើផលប្រយោជន៍ដោយផ្ទាល់ និងប្រយោលដល់កសិករជាច្រើនពាន់គ្រួសារនៅក្នុងតំបន់ ហើយក៏អាចធានាបាននូវស្ថិរភាពលើការផ្គត់ផ្គង់ទីផ្សារផងដែរ៕
Account
Security
Favourite Content