បើនិយាយពីស្រាក្រហម ភាគច្រើនគេតែងតែនឹកគិតដល់ប្រភេទស្រាក្រហមដែលចម្រាញ់ចេញពីផ្លែទំពាំងបាយជូរនាំចូលពីបរទេស ឬចម្រាញ់ចេញពីផ្លែព្រីងដែលជាផលិតផលក្នុងស្រុក ដោយឡែកបច្ចុប្បន្ននេះ ក្រោមគំនិតច្នៃប្រឌិតជាមួយរូបមន្តបន្ទុំវត្ថុធាតុដើមជាច្រើនមុខដែលភាគច្រើនជាកសិផលកម្រក្នុងស្រុកនោះ ស្រាក្រហមថ្មីមួយប្រភេទទៀតបានបង្ហាញបង្ហាញវត្តមាននៅលើទីផ្សារ ជាមួយនឹងការទទួលបានចំណាប់អារម្មណ៍ខ្ពស់នៅលើទីផ្សារក្នុងស្រុក និងលក់បានក្នុងតម្លៃថ្លៃគួរសម។

កំផែង ជាយីហោស្រាក្រហមខ្មែរបុរាណមួយប្រភេទដែលផលិតចេញពីការចម្រាញ់កសិផលកម្រក្នុងស្រុកមួយចំនួនរួមផ្សំគ្នាក្រោមរូបមន្តបន្តពីដូនតារបស់ខ្លួន ដែលមានរសជាតិឈ្ងុយឆ្ងាញ់ប្លែកពីស្រាក្រហមទូទៅ និងមានគុណប្រយោជន៍ដល់សុខភាពអ្នកទទួលទានក្នុងកម្រិតត្រឹមត្រូវ។

លោក ថេង កំផែង ម្ចាស់សិប្បកម្ម កំផែង ស្រាក្រហម មានទីតាំងនៅខេត្តប៉ៃលិនបានប្រាប់ AMS ឱ្យដឹងថា ៖

«រូបមន្តស្រារបស់យើង ជារូបមន្តបន្តពីដូនតារបស់ខ្ញុំតាំងពីយូរណាស់មកហើយ ប៉ុន្តែយើងខ្ញុំទើបចាប់ផ្ដើមធ្វើអាជីវកម្មប្រមាណ ២ឆ្នាំនេះប៉ុណ្ណោះ។ កំផែង ស្រាក្រហម ដែលភាសាបរទេសសរសេរថា the Khmer culture wine នេះអាចនិយាយបានថា វាជាមរតកគ្រួសារ ហើយវាមានគុណសម្បត្តិច្រើនសម្រាប់អ្នកទទួលទាន(ទទួលទានតាមកម្រិតត្រឹមត្រូវ) ព្រោះវាជាស្រាក្រហមខ្មែរបុរាណដែលផ្សំចេញពីរុក្ខជាតិកម្រជាច្រើនមុខ»។

លោកបន្ថែមថា៖

«ស្រារបស់យើងផលិតពីវត្ថុធាតុដើមក្នុងស្រុកទាំងស្រុង រួមមាន អង្ករដំណើបខ្មៅ ពន្លៃខ្មៅ រមៀតខ្មៅ និងខ្ជាយខ្មៅ ដែលសុទ្ធសឹងជាឱសថខ្មែរបុរាណ។ ជាធម្មតាយើងទិញកសិផលពីកសិករដែលអាចទុកចិត្តបាន ធ្វើយ៉ាងណាយកតែរបស់ល្អៗ គ្មានសារធាតុគីមីដែលអាចបង្កឱ្យមានផលប៉ះពាល់ដល់សុខភាព ហើយក៏ជាផ្នែកមួយជួយដល់ជីវភាពអ្នកដាំផងដែរ»។

លោកថា ដោយសារការផលិតចេញពីវត្ថុធាតុដើមល្អៗបែបនេះហើយ ទើប កំផែង ស្រាក្រហម មានលក្ខណៈពិសេស អាចជួយប៉ូវកម្លាំង បណ្ដេញជាតិពុលចេញពីរាងកាយ ជួយទៅលើផ្នែកសម្រស់ ពោលគឺជួយឱ្យអ្នកទទួលទានមានសុខភាពប្រសើរឡើងតាមរយៈការទទួលទានក្នុងកម្រិតមួយសមស្រប។ មួយវិញទៀត ផលិតផលនេះមានកម្រិតមេតាណុលទាបបំផុត ស្ទើរតែគ្មាន ដែលមិនបង្កឱ្យមានអាការៈពុលដល់អ្នកទទួលទាននោះឡើយ។

ចំពោះផលិតផលរបស់កំផែងមួយក្នុងចំណោមនោះ មានឈ្មោះថា កំផែង ពេជ្រក្រហម ដែលមានចំណុះ ៧៥០ មីលីលីត្រ និងមានតម្លៃ ១៦ម៉ឺនរៀលផងដែរ។ ត្បិតវាមានតម្លៃខ្ពស់ តែម្ចាស់អាជីវកម្មខាងលើបញ្ជាក់ថា មានការគាំទ្រខ្លាំងនៅលើទីផ្សារ ជាពិសេសពីសំណាក់មនុស្សពេញវ័យ ក៏ដូចជាអ្នកស្រឡាញ់សុខភាព និងចូលចិត្តទទួលទានភេសជ្ជៈរូបមន្តបុរាណខ្មែរផ្ទាល់តែម្ដង។

ពាក់ព័ន្ធនឹងការផលិត លោក កំផែង បានរៀបរាប់ថា ៖

«បរិមាណដែលយើងផលិតគឺនៅមានកម្រិត និងមិនទាន់គ្រប់តម្រូវការទីផ្សារនៅឡើយទេ ព្រោះស្រារបស់យើងផលិតដោយប្រើរូបមន្តពិសេសពីដូនតា ខុសប្លែកពីគេ ដោយត្រូវចំណាយពេលផ្អាប់ ១ឆ្នាំពេញ ទើបអាចប្រើបាន។ ដោយឡែក វត្ថុធាតុដើម ១តោន បន្ទាប់ពីលាងសម្អាត និងដាក់ចំហុយ ហើយ គេអាចទទួលបានស្រាប្រមាណ ២៥០-២៨០លីត្រ ដោយមួយខែយើងអាចផលិតបានប្រមាណ ៥០ដបប៉ុណ្ណោះ»។

យ៉ាងណាក៏ដោយ បើទោះបីជាមានផលិតផលល្អ និងមានការគាំទ្រក៏ពិតមែន ប៉ុន្តែសិប្បកម្មខាងលើក៏នៅតែមានបញ្ហាប្រឈម ដូចជាការផលិតនៅមានកម្រិត មិនទាន់អាចផ្គត់ផ្គង់ទីផ្សារបានគ្រប់គ្រាន់នៅឡើយ ហើយអ្វីដែលសំខាន់ចំពោះមុខ គឺខ្វះដើមទុនក្នុងការពង្រីកផលិតកម្ម។ នៅថ្ងៃអនាគត លោក កំផែង ចង់បង្កើនការផលិត និងពង្រីកការផ្សព្វផ្សាយឱ្យកាន់តែទូលាយ ដើម្បីទទួលបានចំណែកទីផ្សារកាន់តែច្រើន ដែលក្រៅពីពង្រីកសង្វាក់ផលិតកម្ម ថែមទាំងអាចបង្កើតការងារជូនពលរដ្ឋក្នុងតំបន់ និងអាចចូលរួមកាត់បន្ថយភាពក្រីក្របានមួយចំណែកផងដែរ៕