បរទេស ៖ ក្នុងខ្សែភ្នែករបស់រដ្ឋាភិបាលអាម៉េរិកកន្លងមក ក្រុមហ៊ុនស្រាវជ្រាវអវកាស Blue Origin ដែលជាក្រុមហ៊ុនរបស់លោក Jeff Bezos ស្ថាបនិករបស់ Amazon បានត្រឹមស្ថិតនៅចំណាត់ថ្នាក់ទី៣ប៉ុណ្ណោះក្នុងក្របខណ្ឌដើម្បីទទួលបានកុងត្រាសំខាន់ៗផ្នែកឧស្សាហកម្មធ្វើដំណើរទៅកាន់ទីអវកាសដោយរដ្ឋាភិបាលអាម៉េរិក។

យ៉ាងណាក្តី ក្នុងឱកាសដ៏កម្រក្រោយហេតុការណ៍ផ្ទុះបញ្ហារកាំរកូសនៃទំនាក់ទំនងរវាងលោកប្រធានាធិបតីអាម៉េរិក លោក Donald Trump និងមហាសេដ្ឋីស្ថាបនិកក្រុមហ៊ុន Space X លោក Elon Musk ដែលជាក្រុមហ៊ុនធំជាងគេទទួលបានកុងត្រាច្រើនជាងគេពីសំណាក់រដ្ឋាភិបាលអាម៉េរិកសម្រាប់ការធ្វើដំណើរជាប្រចាំទៅកាន់ទីអវកាសនោះត្រូវបានគេមើលឃើញថា លោក Bezos បានឆក់យកពេលវេលានេះភ្លាមដោយសង្ឃឹមថានឹងអាចទទួលបានកុងត្រាមួយចំណែកធំមកឲ្យក្រុមហ៊ុន​ Blue Origin របស់ខ្លួនវិញ។

កាសែត Wall Street Journal បានរាយការណ៍កាលពីសប្តាហ៍កន្លងទៅថា មហាសេដ្ឋី លោក Bezos បានខិតខំក្នុងការបង្កើតទំនាក់ទំនងដោយផ្ទាល់ជាមួយនឹងលោកប្រធានាធីបតីអាម៉េរិក ដោយកាលពីខែមិថុនាកន្លងមកនេះ ជំនួបរវាងអ្នកទាំងពីរបានធ្វើឡើងចំនួន២ដងរួចទៅហើយ ។

ព័ត៌មានអំពីភាពមមាញឹកនៃជំនួបដែលគួរឲ្យភ្ញាក់ផ្អើលនេះបានធ្វើឡើងមិនដល់កន្លះខែផងក្រោយពេលដែលមានដំណឹងអំពីជម្លោះតាមបណ្តាញសង្គម និងសារព័ត៌មានរវាងមហាសេដ្ឋី លោក Musk និងលោកប្រធានាធិបតី Trump ជុំវិញការខ្វែងគំនិតទៅលើផែនការចំណាយថវិកាជាតិ និងផែនការយកពន្ធរបស់រដ្ឋាភិបាលអាម៉េរិក រួមជាមួយការចាកចេញរបស់លោក Musk ពីក្រសួងគ្រប់គ្រងប្រសិទ្ធភាពរដ្ឋាភិបាលអាម៉េរិក ហៅកាត់ថា DOGE ។

គួរឲ្យដឹងដែរថា កាលពីដើមឆ្នាំកន្លងមកនេះ ក្រុមហ៊ុន SpaceX ទទួលបាននូវកុងត្រាថ្មីពីកងកម្លាំងទ័ពអវកាសអាម៉េរិកឬ US Space Force ក្នុងទំហំទឹកប្រាក់ប្រមាណជា ៥,៩ពាន់លានដុល្លារក្នុងការរៀបចំការធ្វើដំណើរចំនួន២៨ជើងទៅកាន់ទីអវកាស។

គួរកត់សម្គាល់ថា សម្រាប់ក្រុមហ៊ុនទីអវកាសដែលទទួលបានកុងត្រាច្រើនជាងគេបន្ទាប់ពី SpaceX នោះ គឺក្រុមហ៊ុន United Launch Alliance ទទួលបានកុងត្រាតម្លៃ ៥,៣ពាន់លានដុល្លារក្នុងការដំំណើរការជើងហោះហើរចំនួន១៩ជើងទៅទីអវកាស។ ដោយឡែក ក្រុមហ៊ុន Blue Origin របស់លោក Bezos ទទួលបានត្រឹមតែ ២,៤ពាន់លានដុល្លារប៉ុណ្ណោះក្នុងការរៀបចំការហោះហើរដឹកជញ្ជូនទៅទីអវកាសចំនួន៧ជើង៕