ភ្នំពេញ ៖ ផ្សារ​មូលបត្រកម្ពុជា និងធនាគារអេស៊ីលីដា ភីអិលស៊ី​ បាន​ប្រកាស​ជាផ្លូវការចុះបញ្ជីលក់​សញ្ញាបណ្ណ​បន្ទាប់​បន្សំរបស់ធនាគារ​អេស៊ីលីដាជាលើកទី២ ​ក្នុងទំហំទឹក​ប្រាក់​ប្រមាណ៤០០ពាន់​លានរៀល ឬស្មើនឹង​ប្រមាណ ១០០លានដុល្លារអាម៉េរិក ។

​ពិធីចុះបញ្ជីលក់​សញ្ញា​បណ្ណ​បន្ទាប់​បន្សំជាផ្លូវការ​នេះ ធ្វើឡើង​នៅព្រឹកថ្ងៃទី ០៨ ខែតុលា​ ២០២៥ ក្រោមអធិប​តីភា​ពឯកឧត្តម ហ៊ាន សាហ៊ីប រដ្ឋលេខាធិការ​ក្រសួង​សេដ្ឋកិច្ច និងហិរញ្ញវត្ថុ​ និងជា​ប្រធានក្រុមប្រឹក្សា​នៃផ្សារ​មូ​ល​​បត្រ​កម្ពុជា ព្រមទាំងមានការអញ្ជើញចូលរួមពី ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអ​គ្គ​នា​យកនៃនិយ័តករមូលបត្រកម្ពុជា ឯកឧត្តម ហុង សុហួរ ប្រ​តិភូរាជរដ្ឋាភិបាលទទួលបន្ទុកជាអគ្គនាយកនៃផ្សា​រមូលបត្រកម្ពុជា លោក អែម កំណាន់ អគ្គនាយករងត្រួតពិនិត្យ ធនាគារជាតិ នៃ កម្ពុជា បណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី ​។

នៅក្នុង​ឱកាសនោះ​លោក​បណ្ឌិត អ៊ិន ចាន់​នី ប្រធាននាយកប្រតិបត្តិធនាគារ​អេស៊ីលីដា ភីអិល​ស៊ី បានមានប្រសាសន៍ថា ការបោះផ្សាយ​សញ្ញា​បណ្ណបន្ទាប់​បន្សំនេះ នឹ​ងផ្ដល់ឱ្យ​វិនិយោគិន​ និងអតិថិជន​របស់ធនាគារនូវ​ជម្រើស​វិនិយោគមួយ​បន្ថែមទៀត​ជាមួយ​ធនាគារ​អេស៊ីលីដា ។ សញ្ញា​បណ្ណ​បន្ទាប់​បន្សំ​​នេះ គឺជា​ឧបករណ៍​ហិរញ្ញវត្ថុ​ទូទៅ ដែលធនាគារ​ជុំវិញពិភពលោក ព្រមទាំង​ធនាគារអេស៊ីលីដា​ បាននិងកំពុងប្រើប្រាស់ ព្រមទាំង​បានចូលរួម​ចំណែក​ក្នុងការ​ពង្រឹង និងពង្រីក​វិសាល​ភាពព្រមទាំង​ការ​បង្កើន​សក្ដានុពល​អាជីវកម្មរបស់ធនាគារ​ឱ្យកាន់តែរីក​ចម្រើន​ប្រកបដោយចីរភាព​ និង​ប្រ​សិទ្ធ​ភាពប្រកបដោយទំនុកចិត្ត​ពីអតិថិជន​និងសាធារណជន ។

ឯកឧត្តម​បណ្ឌិតសភាចារ្យ ហ៊ាន សាហ៊ីប រដ្ឋលេខាធិការ​នៃក្រសួង​សេដ្ឋកិច្ច​និងហិរញ្ញវត្ថុ​បានមានប្រ​សាស​ន៍​ថា​ វិស័យមូលបត្រកម្ពុជា​បានទាក់ទាញ​និងលើកទឹកចិត្ត​ដល់​បណ្ដា​ក្រុមហ៊ុនសក្ដានុពលកាន់តែច្រើន​​​​ឱ្យ​មកចុះបញ្ជីនៅបោះផ្សាយ​លក់ភាគហ៊ុន និងសញ្ញាបណ្ណ​ក្នុងផ្សារ​មូលបត្រ​កម្ពុជា ដែលញ៉ាំង​ឱ្យវិស័យ​នេះ រីកលូតលាស់​ជាបន្ត​បន្ទាប់ រួមចំណែកអភិវឌ្ឍន៍សង្គម​ សេដ្ឋកិច្ចកម្ពុជា​តាមរយៈការ​គាំទ្រ​លើ​ក​ស្ទួយ​សហគ្រាស​ក្នុងស្រុក ធុរកិច្ច​ថ្មី និងសហគ្រិនភាព ព្រមទាំងពង្រឹង​សមត្ថភាពប្រកួត​ប្រជែង​ ក្នុងបរិការណ៍ដែលមានការ​រំលោភបំពាន​បូរណភាពទឹកដីរបស់កម្ពុជាពីសំណាក់​ប្រទេស​ថៃ។

ឯកឧត្តម​ ស៊ូ សុជាតិ ប្រតិភូរាជរដ្ឋាភិបាល​កម្ពុជា​ទទួល​បន្ទុក​អគ្គ​នាយកនៃនិយ័តករមូល​បត្រ​កម្ពុជា បានមានប្រសាសន៍ថា​ ធនាគារអេស៊ីលីដា គឺជាធនាគារពាណិជ្ជ​ដែល​មានបណ្ដាញ​ប្រតិបត្តិការធំទូលាយ​នៅទូទាំង​ប្រទេស​កម្ពុជា​ដែលធ្លាប់​បានចុះបញ្ជី​លក់មូល​បត្រ​​កម្មសិទ្ធិជា​សាធារណៈ នៅក្នុង​ផ្សារ​មូល​បត្រ​កម្ពុជា ហើយក៏ជា​ធនាគារ​​តែមួយគត់ដែរ ដែល​បាននិងកំពុងចុះបញ្ជីលក់​ភាគហ៊ុនជា​សាធារណៈនៅក្នុងផ្សារ​មូលប​ត្រ​កម្ពុជា ។​

ឯកឧត្តម​បន្តថា ផ្សារ​មូលបត្រ​ និងវិស័យ​ធនាគារ​គឺជាអ្វីមួយដែលនឹង​បំពេញ និង​ជួយ​បំពេញគ្នា​ទៅវិញទៅមក​។ កាលណា​យើងធ្វើការ​ជាមួយ​ អ្វីដែលយើង​ទទួលបាន​នោះគឺទំនុកចិត្តពីវិនិយោគិនទាំង​ក្នុងនិង​ក្រៅប្រទេស ដោយ​ដៃគូ​នឹង​ចាប់ផ្ដើម​ចាប់អារម្មណ៍និងមានការវិនិយោគ​កាន់តែច្រើន​ ។​ជាក់ស្ដែង​ក្នុង​រយៈពេលមិនដល់មួយឆ្នាំផង ធនាគារ​អេស៊ីលីដា បានប្រមូលទុនក្នុងស្រុក​បានរហូតដល់ជាង​២០០លានដុល្លារអាមេរិក ហើយក៏សង្ឃឹមថា នៅឆ្នាំក្រោយៗ នឹងអាចប្រមូល​ទុនក្នុងស្រុកបានច្រើន​បន្ថែមទៀត ។

ឯកឧត្តម ហុង សុហួរ ប្រតិភូរាជរដ្ឋាភិបាល ទទួល​បន្ទុក​ជា​អគ្គនាយក​ផ្សារ​មូលបត្រ​កម្ពុជា​ ក៏បានមានប្រសាសន៍ផងដែរថា ទឹកប្រាក់ចំនួន​២០០លានដុល្លារ​ដែល​បានកៀរគរ​ក្នុងរយៈពេល​ប្រមាណ​១ឆ្នាំនេះ មានន័យថា​យើងកំពុងតែធ្វើដំណើរទៅរក​ការ​ប្រែក្លាយផ្សារមូលបត្រទៅជា​ប្រភពទុនមិនចេះរីង​ស្ងួត ហើយ​រំពឹងថា​នៅពេលអនាគត​ វិស័យនេះនឹងអាចជួយ​គាំទ្រ​ដល់​ម្ចាស់អាជីវកម្មក្នុងស្រុកបានរាប់ពាន់​លានដុល្លារអាម៉េរិក ។

ឯកឧត្តមបន្តថា​វិស័យ​ធនាគារ និង​វិស័យមូលបត្រ​គឺជាសរសៃឈាម ដែលត្រូវការ​គ្នាទៅវិញទៅមក ហើយបើសិនជាវិស័យទាំងពីរ ដំណើរល្អព្រមគ្នាទាំងពីរ​ នោះនឹងធ្វើឱ្យសេដ្ឋកិច្ចកម្ពុជា​កាន់តែមានកំណើនខ្ពស់​ ។​

គួរ​រម្លឹកថាកាលពី​ចុងខែកុម្ភៈ ឆ្នាំ២០២៥​កន្លងទៅ ធនាគារ​អេស៊ីលីដា ភីអិលស៊ី​ ក៏បានចុះបញ្ជីលក់​សញ្ញា​បណ្ណ​បន្ទាប់​បន្សំ​នៅក្នុងផ្សារ​មូលបត្រកម្ពុជា​ក្នុងទំហំទឹកប្រាក់​ប្រមាណ ៨៦​លានដុល្លារអាមេរិក ដូច្នេះសរុបទាំង​ពីរលើក​នេះ អេស៊ីលីដា បាន​ចុះបញ្ជីលក់​សញ្ញា​បណ្ណនេះ នៅក្នុងផ្សារ​មូលបត្រ​ប្រមាណជិត​២០០លានដុល្លារអាម៉េរិក ៕