ភ្នំពេញ៖ ផ្លូវជាតិលេខ៥១ គឺជាផ្លូវខ្សែក្រវាត់ភ្នំពេញមួយ ដែលដើរតួនាទីយ៉ាងសំខាន់ក្នុងការលើកកម្ពស់វិស័យដឹកជញ្ជូន និងឧស្សាហកម្ម ព្រមទាំងជាតំបន់ទីប្រជុំជន អំណោយផលសម្រាប់គម្រោងអភិវឌ្ឍន៍វិស័យអចលនទ្រព្យ និងបានចូលរួមបង្កើតមុខរបរ និងបង្កើនប្រាក់ចំណូលសម្រាប់ប្រជាពលរដ្ឋដែលរស់តាមបណ្តោយផ្លូវមួយខ្សែនេះ។

ផ្លូវជាតិលេខ៥១ ក៏ជាខ្សែផ្លូវយុទ្ធសាស្រ្តតភ្ជាប់ជាមួយផ្លូវអាស៊ានហាយវ៉េ លេខ១ (AH-1) នៃរបៀងសេដ្ឋកិច្ចខាងត្បូង ឆ្ពោះទៅច្រកព្រំដែនកម្ពុជា-ថៃ (ប៉ោយប៉ែត) និងផ្លូវអាស៊ានហាយវ៉េលេខ១១ (AH-11) ឆ្ពោះទៅកំពង់ផែសមុទ្រទឹកជ្រៅ ខេត្តព្រះសីហនុ ហើយអាចតភ្ជាប់តាមរយៈផ្លូវជាតិលេខ៤១ ផ្លូវជាតិលេខ៣ និងផ្លូវជាតិលេខ៣៣ ទៅកាន់ខេត្តកំពត និងខេត្តកែប ដែលជាខេត្តគោលដៅទេសចរណ៍ធម្មជាតិ និងតំបន់ឆ្នេរដ៏ស្រស់ត្រកាលរបស់កម្ពុជា។

ផ្លូវជាតិលេខ​៥១ ដែលតភ្ជាប់ពីផ្លូវជាតិលេខ​៤ ទៅ​ផ្លូវជាតិលេខ​៥ កាត់តាមខេត្តកំពង់ស្ពឺ និ​ងកណ្ដាល បានក្លាយជា​ផ្លូវយុទ្ធសាស្ត្រ​ដឹកជញ្ជូនទំនិញដ៏សំខាន់មួយ​សម្រាប់​ការនាំចេញ និងនាំចូល​ប្រទេស ហើយផ្លូវនេះដែរ ក៏មាន​អំណោយផល​សម្រាប់គម្រោងអភិវឌ្ឍន៍វិស័យ​អចលនទ្រព្យ​ដ៏មានសក្ដានុពល​ រួម​ចំណែក​បង្កើន​មុខ​របរ​ អាជីវកម្ម ក៏ដូចជាប្រាក់ចំណូល​សម្រាប់ប្រជាពលរដ្ឋ​ក្នុង​តំបន់​ផងដែរ ។

ជាការ​កត់សម្គាល់ ចាប់តាំងពីផ្លូវ​ជាតិលេខ​៥១ បានសាងសង់រួចរាល់​ឃើញថា ​មានគម្រោងអភិវឌ្ឍន៍​ក្នុងវិស័យសំណង់ និងអច​ល​នទ្រព្យ​តូចធំជាច្រើន ជាពិសេសនៅ​តាមបណ្ដោយផ្លូវនេះតែម្ដង ដូចជា​គម្រោង​អភិ​វឌ្ឍន៍ឧស្សាហកម្ម រោងចក្រ សហគ្រាស និង​តំបន់​សេដ្ឋកិច្ច​ មានភាពទាក់ទាញខ្លាំងជាង​គេ ​បន្ទាប់មកមានគម្រោង​អភិវឌ្ឍន៍ដីឡូត៍ និងលំនៅឋាន​តម្លៃ​សមរម្យ​ ដោយមានក្រុមហ៊ុន​អភិវឌ្ឍន៍ក្នុងស្រុកជាច្រើន​បាន​បោះទុនវិនិយោគសម្រាប់​ផ្គត់ផ្គង់លើទីផ្សារ ។

អ្នកជំនាញក្នុងវិស័យអចលនទ្រព្យ​ជាច្រើន​បាន​សម្លឹង​មើលឃើញពីសក្ដានុពល​នៃផ្លូវជាតិដ៏សំខាន់នេះហើយបាន​ផ្ដល់ជាទស្សន​ទាន​សម្រាប់វិនិយោគិនទាំងក្នុង និងក្រៅ​ប្រទេស​ អាចពិចារណា​ក្នុងការដាក់ទុន​វិនិ​យោគ​​នៅតាមបណ្ដោយផ្លូវជាតិលេខ​៥១ ដោយលើកឡើងថា ផ្លូវនេះ ជាផ្លូវដែលអាច​តភ្ជាប់ទៅកាន់តំបន់ព្រំដែនកម្ពុជា​ ទៅកាន់កំពង់ផែទឹកជ្រៅខេត្តព្រះសីហនុ ទៅកាន់​កំពង់ផែ​ខេត្តកំពត និង​តំបន់សក្ដានុពលជាច្រើនទៀត​ក្នុងប្រទេសកម្ពុជា ។

តាមរយៈការ​បង្កើតក្រុង​ឧដុង្គម៉ែជ័យ ​ក្នុង​ខេត្តកំពង់ស្ពឺ​ ក៏នឹងធ្វើឱ្យសក្ដានុពល​នៃវិស័យអចលនទ្រព្យ​​នៅតាមបណ្ដោយផ្លូវជាតិលេខ​៥១នេះ​មានសន្ទុះមួយកម្រិតផងដែរ ហើយនៅពេលអនាគត​ រំពឹងថា​ការ​វិនិយោគលើ​លំនៅឋាន​ ឧស្សាហកម្ម​ សហគ្រាស​នានា នឹង​មានកំណើន​បន្ថែមទៀត ។​

សូមជម្រាបជូនថាផ្លូវជាតិលេខ៥១ មានប្រវែង ៣៧,៩៥ គីឡូម៉ែត្រ ចាប់ពីផ្លូវបំបែកឧដុង្គ (ផ្លូវជាតិលេខ៥) ដល់ថ្នល់ទទឹង (ផ្លូវជាតិលេខ៤) បានបើកការដ្ឋានសាងសង់កាលពីថ្ងៃទី១៤ ខែមីនា ឆ្នាំ២០១៧ និងបានសម្ពោធឱ្យប្រើប្រាស់ជាផ្លូវការ កាលពីថ្ងៃទី២៥ ខែមីនា ឆ្នាំ២០២០៕