ភ្នំពេញ ៖ ផ្អែកលើទិន្នន័យ ៦ ខែ និងនិន្នាការសូចនាករសំខាន់ៗ សេដ្ឋកិច្ចកម្ពុជាត្រូវបានប៉ាន់ស្មានថាអាចនឹងសម្រេចបានកំណើន ៦% ក្នុងឆ្នាំ២០២៤ ដោយមានវិស័យខ្លះបានងើបឡើងវិញ វិស័យខ្លះមានកំណើនយឺត និងវិស័យខ្លះបន្តកំណើនទាប ខណៈដែលភាពមិនប្រាកដប្រជានៃលក្ខខណ្ឌសេដ្ឋកិច្ចសកលលោកបន្តនៅខ្ពស់ ហើយស្លាកស្នាមនៃវិបត្តិកូវីដ-១៩ នៅបន្តបង្កផលប៉ះពាល់អវិជ្ជមាន។ នេះបើយោងតាមរបាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ​២០២៤។

ឈរលើមូលដ្ឋាននេះ ស្ថានភាពកំណើនតាមវិស័យសំខាន់ៗ ត្រូវបានព្យាករដូចតទៅ ៖ វិស័យឧស្សាហកម្ម ត្រូវបានវាយតម្លៃថានឹងមានកំណើនក្នុងរង្វង់ ៧,៩% ដោយសារការងើបសន្សឹមៗនៃអនុវិស័យកាត់ដេរ គួបផ្សំនឹងការរក្សាបាននូវចលនការរឹងមាំនៃអនុវិស័យកម្មន្តសាលមិនមែនកាត់ដេរ ខណៈដែលអនុវិស័យសំណង់នៅបន្តមានកំណើនទាប។ វិស័យសេវាកម្មបន្តរក្សាបានកំណើនល្អក្នុងរង្វង់ ៥,៨% ដោយសារការបន្តនិន្នាការកើនឡើងនៃអនុវិស័យបដិសណ្ឋារកិច្ច និងសេវាកម្មម្ហូបអាហារ គួបផ្សំនឹងសេវាកម្មគាំទ្រផ្សេងទៀត ដូចជា អនុវិស័យ លក់ដុំ-រាយ និងអនុវិស័យដឹកជញ្ជូនជាដើម ក្នុងខណៈដែលអនុវិស័យអចលនទ្រព្យនៅបន្តមានកំណើនទាប។ វិស័យកសិកម្ម ត្រូវបានប៉ាន់ស្មានថានឹងរក្សាបាននូវកំណើនក្នុងរង្វង់ ០,៧% ដែលទ្រទ្រង់ដោយ កំណើនល្អនៃអនុវិស័យដំណាំ និងការងើបវិញនៃអនុវិស័យនេសាទ ខណៈអនុវិស័យចិញ្ចឹមសត្វជួបបញ្ហាប្រឈម មួយចំនួន ធ្វើឱ្យប៉ះពាល់ដល់ផលិតកម្មក្នុងស្រុក ដែលតម្រូវឱ្យរាជរដ្ឋាភិបាលដាក់ចេញនូវវិធានការពង្រឹង ការគ្រប់គ្រងការនាំចូលសាច់បង្កក សំដៅដោះស្រាយផលប៉ះពាល់អវិជ្ជមាននេះ។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានថ្លែងប្រាប់ AMS Economy ថា សម្រាប់ក្របខណ្ឌម៉ាក្រូសេដ្ឋកិច្ច ប្រទសកម្ពុជានៅតែមានដំណើរការសេដ្ឋកិច្ចល្អ ដោយសារមានគាំទ្រចម្បងពីវិស័យពាណិជ្ជកម្មទាំងក្របខណ្ឌអន្តរជាតិ និងក្នុងតំបន់អាស៊ាន ដែលជំរុញឱ្យមានការវិនិយោគជាច្រើនកាន់កម្ពុជា។

ទោះយ៉ាងក៏ដោយ លោកបណ្ឌិត ហុង វណ្ណៈ លើកឡើងថា បច្ចុប្បន្ន តម្លៃទំនិញបើប្រាស់លើទីផ្សារនៅមានតម្លៃថ្លៃ ដែលធ្វើឱ្យប្រជាពលរដ្ឋមានចំណូលថេរ ពិបាកក្នុងការចំណាយ។ លោកបណ្ឌិតបានថ្លែងថា ដើម្បីឱ្យសេដ្ឋកិច្ចរបស់ប្រទេសកម្ពុជាអាចប្រកួតប្រជែងប្រទេសជិតខាង និងបរទេសបាន លុះត្រាកម្ពុជាមានថ្លៃដើមផលិតទាប ដែលរួមមានប្រព័ន្ធដឹកជញ្ជូន ថ្លៃអគ្គិសនី និងជីដើម។

បើទោះបីជាសេដ្ឋកិច្ចពិភពលោកបានបន្តកើនឡើងជាមួយបញ្ហាប្រឈម និងភាពមិនប្រាកដប្រជាខ្ពស់ ជាពិសេសបញ្ហាភូមិសាស្ត្រនយោបាយ សេដ្ឋកិច្ចកម្ពុជា ត្រូវបានព្យាករថាមានអត្រា ៦% សម្រាប់ឆ្នាំ២០២៤ ដោយគាំទ្រជាចម្បងដោយកំណើនវិស័យកាត់ដេរ និងទេសចរណ៍។ នេះបើយោងតាមការព្យាការណ៍នៅក្នុងរបាយការណ៍ប្រចាំឆមាសទី១ និងទិសដៅការងារឆមាសទី២ ឆ្នាំ២០២៤ របស់ធនាគារជាតិនៃកម្ពុជា។

នៅឆមាសទី១ ឆ្នាំ២០២៤ សេដ្ឋកិច្ចពិភពលោកបានបន្តកើនឡើងជាមួយបញ្ហាប្រឈម និងភាពមិនប្រាកដប្រជាខ្ពស់ ជាពិសេសបញ្ហាភូមិសាស្ត្រនយោបាយ។ សង្គ្រាមរុស្ស៊ី-អ៊ុយក្រែន និងស៊ីស្រាអែល-ក្រុមហាម៉ាសនៅមជ្ឈិមបូព៌ានៅតែបន្តអូសបន្លាយ ដែលបានប៉ះពាល់ដល់អាយុជីវិតនិងជីវភាពរស់នៅរបស់ប្រជាជនជាច្រើនលាននាក់ ព្រមទាំងធ្វើឱ្យទំនាក់ទំនងការទូត និងសេដ្ឋកិច្ចរវាងបណ្តាប្រទេសធំៗមួយចំនួនមានភាពល្អក់កករកាន់តែខ្លាំង។

ភាពតានតឹងភូមិសាស្ត្រនយោបាយទាំងនេះគឺជាឧបសគ្គដល់សន្ទុះការវិនិយោគនិងពាណិជ្ជកម្ម ព្រមទាំងបង្កើនភាពមិនច្បាស់លាស់លើការកើនឡើងនៃអតិផរណា។ ក្នុងស្ថានភាពនេះ បើទោះជាអតិផរណាបានថយចុះជាបន្តបន្ទាប់ក៏ដោយ ក៏បណ្តាធនាគារកណ្តាលធំៗមួយចំនួន ជាពិសេស ធនាគារកណ្តាលអាមេរិកមិនទាន់កាត់បន្ថយអត្រាការប្រាក់គោលរបស់ខ្លួននៅឡើយទេ។ បញ្ជាភូមិសាស្ត្រនយោបាយ ភាពមិនប្រាកដប្រជា និងបញ្ហាដែលបានកើតឡើងនៅក្នុងស្រុក បានធ្វើឱ្យតំបន់នានាលើពិភពលោកទទួលបានកំណើនក្នុងល្បឿនខុសៗគ្នា៕