បរទេស៖ យោងតាមប្រភពព័ត៌មានពី Euro News បានរាយការណ៍ថា រុស្ស៊ីកំពុងស្ថិតក្នុងស្ថានភាពលំបាកដោយសារខ្វះកម្លាំងមនុស្សដើម្បីការពារព្រំដែន និងបន្តការប្រយុទ្ធនៅតំបន់ Donbas ខណៈដែលកម្លាំងពលកម្មនៅក្នុងសេដ្ឋកិច្ចសម្រាប់ពលរដ្ឋស៊ីវិលក៏មានការខ្វះខាតដូចគ្នាផងដែរ។

មុនពេលអ៊ុយក្រែនចាប់ផ្តើមប្រតិបត្តិការដ៏គួរឱ្យភ្ញាក់ផ្អើលរបស់ខ្លួននៅក្នុងតំបន់ Kursk នៃប្រទេសរុស្ស៊ី របាយការណ៍សេដ្ឋកិច្ចជាច្រើនរបស់រុស្ស៊ីបានបង្ហាញអំពីការកើនឡើងនៃប្រាក់ឈ្នួលដ៏ច្រើនសម្រាប់ទាហានជួរមុខ។ នៅក្នុងសង្គ្រាមនេះ រុស្ស៊ីអនុវត្តគំរូចម្រុះនៃការចល័ត និងការជួលទាហាន ដោយភាពខុសប្លែកគ្នាគឺ ការជួលកងទ័ពជួរមុខជាអ្នកទទួលយកតួនាទីនេះដោយស្ម័គ្រចិត្ដ ខណៈពេលដែលផ្នែកចល័តត្រូវបានដាក់ឲ្យចូលបំពេញកាតព្វកិច្ចផ្សេងៗ។ ចាប់ពីឆ្នាំ២០២៣ មក រដ្ឋាភិបាលរុស្ស៊ីបានចំណាយប្រាក់ឱ្យអ្នកចូលរួមក្នុងសង្គ្រាមនៅអ៊ុយក្រែន ទាហានរងរបួស និងសាច់ញាតិរបស់អ្នកស្លាប់នូវចំនួនទឹកប្រាក់ប្រហែល ៣៣,១២ ពាន់លានដុល្លារ ដែលស្មើនឹង ១,៥ ភាគរយនៃ GDP របស់ប្រទេស។

តំបន់ Krasnodar គឺជាអង្គភាពរដ្ឋបាលឈានមុខគេមួយរបស់រុស្ស៊ី ដែលផ្តល់ប្រាក់បៀវត្សរ៍ដល់ទាហានជួរមុខប្រហែល ១៧ ៦០០ ដុល្លារ។ លើសពីនេះ ទីក្រុង St Petersburg បានផ្តល់ប្រាក់បៀវត្សរ៍ប្រហែល ១២ ០០០ ដុល្លារសម្រាប់អ្នកជ្រើសរើសថ្មី ។ យ៉ាងណាមិញ លោក Alexander Clarkson សាស្ត្រាចារ្យនៅ King’s College London បានលើកឡើងថា មូលហេតុដែលរុស្ស៊ីបន្តដំឡើងប្រាក់សឈ្នួល ឬ ប្រាក់រង្វាន់ ដោយសារប្រទេសនេះកំពុងខ្សត់អ្នកស្ម័គ្រចិត្តដែលមានឆន្ទៈ។ បន្ថែមពីនេះ ការ​ផ្គត់ផ្គង់​កម្លាំង​ពលកម្ម​ក្នុងវិស័យការងាររបស់រុស្ស៊ីកំពុងខ្វះខាតផងដែរ។

លោក Edward Hunter Christie អតីតមន្ត្រីអង្គការណាតូ និងជាអ្នកស្រាវជ្រាវជាន់ខ្ពស់នៃ FIIA លើកឡើងថា ប្រទេសប្រឈមនឹងហានិភ័យនៃកង្វះខាតកម្លាំងពលកម្មនៅក្នុងសេដ្ឋកិច្ច ក្នុងករណីដកកម្លាំងពលកម្មចេញតាមរយៈការធ្វើទាហាន ឬ ផ្តល់ប្រាក់បៀវត្សរ៍ខ្ពស់ដើម្បីទាក់ទាញកម្លាំងពលកម្ម។ ជាលទ្ធផល ប្រាក់បៀវត្សរ៍អាចនឹងត្រូវកើនឡើងក្នុងវិស័យមួយចំនួននៅក្នុងសេដ្ឋកិច្ចផងដែរ ហើយវានឹងជំរុញតម្លៃរស់នៅថ្លៃ និងអត្រាអតិផរណាខ្ពស់នៅក្នុងប្រទេស។ មិនត្រឹមតែប៉ុណ្ណោះ អតិផរណាគួបផ្សំនឹងកង្វះកម្លាំងពលកម្មកាន់តែធ្ងន់ធ្ងរ បង្កើតបានបញ្ហាធ្ងន់ធ្ងរលើសេដ្ឋកិច្ចរុស្ស៊ី។ ទន្ទឹមនឹងនេះ​ អាជីវកម្មតែមួយគត់ដែលអាចរីកចម្រើនក្នុងបរិយាកាសនេះគឺ អ្នកផ្គត់ផ្គង់សម្រាប់សង្គ្រាម។ ផលវិបាកដែលជៀសមិនរួចគឺសេដ្ឋកិច្ចសម្រាប់ពលរដ្ឋស៊ីវិលនឹងធ្លាក់ចុះ ខណៈពេលដែលឧស្សាហកម្មយោធាកើនឡើង។ ជាលទ្ធផល អតិផរណាក៏នឹងធ្វើឱ្យប្រាក់ចំណូលរបស់ប្រជាជនធ្លាក់ចុះផងដែរ។

បញ្ហារបស់រុស្ស៊ីពាក់ព័ន្ធនឹងកម្លាំងពលកម្មបានកើតឡើងចាប់តាំងពីមានសង្គ្រាមជាមួយនឹងអ៊ុយក្រែន ដោយសារតែរលកនៃការធ្វើចំណាកស្រុកដ៏ធំជាមួយនឹងកម្លាំងពលកម្មដែលមានលក្ខណៈសម្បត្តិគ្រប់គ្រាន់ និងក្មេងជាងវ័យ។

យោងតាមប្រភពដដែល ចំនួនជនអន្តោប្រវេសន៍មកពីរុស្ស៊ីចាប់តាំងពីឆ្នាំ ២០២២ ត្រូវបានប៉ាន់ប្រមាណថាមានប្រហែលពី ៥ សែនទៅ ១ លាននាក់ ដែលភាគច្រើននៅក្មេង ទទួលបានការអប់រំល្អ និងធ្វើការនៅក្នុងឧស្សាហកម្មសំខាន់ៗ។ ផ្អែកទៅលើបញ្ហាប្រឈមនឹងគ្រោះថ្នាក់ដូចជា ការរាតត្បាត និងស្លាប់បាត់បង់ជីវិតទាក់ទងនឹងសង្រ្គាមចាប់ពីឆ្នាំ ២០២០ ដល់ ២០២៣ កម្លាំងពលកម្មរុស្ស៊ីបានបាត់បង់មនុស្សប្រហែល ២,៨ លាននាក់។ ទន្ទឹមនឹងនេះ ចំនួនប្រជាជនវ័យចំណាស់ក៏ជាបញ្ហាសម្រាប់កម្លាំងពលកម្មរុស្ស៊ីផងដែរ។ យោងតាមទិន្នន័យចុងក្រោយបំផុតពី Rosstat ចំនួននប្រាក់សោធននិវត្តន៍នៅក្នុងប្រទេសរុស្ស៊ីមានហែល ៤១ លាននាក់ក្នុងឆ្នាំ ២០២៤៕