បរទេស៖ យោងតាមប្រភភព័ត៌មានពី DW បានរាយការណ៍ថា ធនាគារកណ្តាលអាម៉េរិក Federal Reserve បានបន្ទាបអត្រាការប្រាក់គោលរបស់ខ្លួនជាលើកដំបូងនៅក្នុងឆ្នាំ២០២៥ នេះ។

កាលពីថ្ងៃពុធក្នុងសប្ដាហ៍នេះ ធនាគារកណ្តាលអាម៉េរិក Fed បានកាត់បន្ថយអត្រាប្រាក់កម្ចីគោល ២៥ ពិន្ទុ ដែលមានអត្រាចន្លោះពី ៤% និង ៤,២៥% បន្ថយពីអត្រា ៤,២៥% និង ៤,៥០%។ មូលហេតុនៃការកាត់បន្ថយអត្រាការប្រាក់នេះ ដោយសារតែការកើនឡើងនៃហានិភ័យធ្លាក់ចុះអត្រាការងារ។ យ៉ាងណាក៏ដោយ ទោះបីជាអត្រាអតិផរណាខ្ពស់ជាងអត្រាគោលដៅ ២% ក៏ដោយ ប៉ុន្តែទិន្នន័យបង្ហាញថា ការជួលបុគ្គលិកបានថយចុះក្នុងរយៈពេលប៉ុន្មានខែចុងក្រោយនេះ ខណៈដែលអត្រាគ្មានការងារធ្វើបានកើនឡើង។ ដូច្នោះហើយ ធនាគារកណ្តាលអាម៉េរិកបានកាត់បន្ថយអត្រាការប្រាក់ជាដំណោះស្រាយដើម្បីជំរុញការជួលបុគ្គលិក និងបង្កើនការចំណាយរបស់អ្នកប្រើប្រាស់។

យ៉ាងណាមិញ អភិបាលថ្មីរបស់ធនាគារកណ្តាលអាម៉េរិក លោក Stephen Miran បានបោះឆ្នោតប្រឆាំងនឹងការសម្រេចចិត្តនេះ ដោយសារលោកចង់ឲ្យមានការកាត់បន្ថយ ៥០ ពិន្ទុ។ Miran បានស្បថចូលកាន់តំណែងនៅដើមសប្តាហ៍នេះ ប៉ុន្តែគណបក្សប្រជាធិបតេយ្យរិះគន់ថា លោកនឹងមិនអាចបែងចែកការសម្រេចចិត្តផ្នែកសេដ្ឋកិច្ចចេញពីសម្ពាធនយោបាយនោះទេ ដោយសារលោកគឺជាអតីតអ្នកប្រឹក្សាសេដ្ឋកិច្ចរបស់លោក Donald Trump។

គួរកត់សម្គាល់ថា ក្នុងរយៈពេលប៉ុន្មាខែកន្លងមកនេះ ប្រធានាធិបតីអាម៉េរិក លោក Donald Trump បានបញ្ចុះបញ្ចូលឲ្យប្រធានធនាគារកណ្តាល លោក Jerome Powell កាត់បន្ថយអត្រាការប្រាក់។ យ៉ាងណាមិញ លោក Powell បានបដិសេធក្នុងការកាត់បន្ថយអត្រាការប្រាក់ ដោយហេតុផលថា អត្រាពន្ធរបស់ Trump អាចប៉ះពាល់ដល់សេដ្ឋកិច្ច និងជំរុញឱ្យមានអត្រាអតិផរណា។ កាលពីថ្ងៃពុធ សប្ដាហ៍នេះ លោក Powell បានអះអាងថា ធនាគារកណ្តាល Fed មានសិទ្ធិក្នុងការរង់ចាំមើលពីការវិវត្តនៃពន្ធគយ អតិផរណា និងទីផ្សារការងារ មុនពេលសម្រេចចិត្តកាត់បន្ថយអត្រាការប្រាក់។ ធនាគារកណ្តាលអាម៉េរិក Fed បានផ្អាកការរបន្ធូរបន្ថយអត្រាការប្រាក់របស់ខ្លួនចាប់តាំងពីខែមករា ដោយសារតែភាពមិនច្បាស់លាស់អំពីផលប៉ះពាល់នៃអត្រាពន្ធគយរបស់ Trump ថាតើអាចប៉ះពាល់ដល់អតិផរណា និងសេដ្ឋកិច្ចទាំងមូលដែរ ឬទេ។ លើសពីនេះ ធនាគារកណ្តាលអាម៉េរិកក៏បានប្តេជ្ញាចិត្តយ៉ាងមុតមាំក្នុងការរក្សាឯករាជ្យភាពរបស់ខ្លួនចេញពីនយោបាយ។  ទន្ទឹមនឹងនេះ មន្ត្រី Fed បានផ្តល់សញ្ញាថា ពួកគេរំពឹងថានឹងកាត់បន្ថយអត្រាសំខាន់ពីរដងបន្ថែមទៀតនៅឆ្នាំនេះ និងមួយដងទៀតនៅក្នុងឆ្នាំ២០២៦៕