ភ្នំពេញ ៖ សហគ្រាសធុនតូច និងមធ្យម (SME) ត្រូវបានរដ្ឋាភិបាលចាត់ទុកថា បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ច-សង្គម តាមរយៈការបង្កើតការងារ និងកំណើនប្រកបដោយនិរន្តរ៍ភាព ប៉ុន្តែបើទោះ SME ដើរតួនាទីសំខាន់ក៏ដោយ SME មួយចំនួននៅតែប្រឈមបញ្ហាកង្វះប្រភពហិរញ្ញវត្ថុ ខណៈដែលធនាគារ SME រង់ចាំស្វាគមន៍ការស្នើសុំកម្ចីដើម្បីបន្តដំណើរ និងពង្រីកសហគ្រាសរបស់ខ្លួន។

ធនាគារសហគ្រាសធុនតូច និងមធ្យម កម្ពុជា ម.ក (ធនាគារ SME) ដែលទទួលបានអាជ្ញាបណ្ណផ្លូវការជាធនាគារពាណិជ្ជពីធនាគារជាតិនៃ កម្ពុជា (“NBC”) កាលពីថ្ងៃទី២៧ ខែកុម្ភៈ ឆ្នាំ២០២០ ត្រូវបានបង្កើតឡើងដោយមានគោលបំណង និងទិសដៅជាយុទ្ធសាស្ត្រ ស្របទៅតាមគោលនយោបាយរបស់រាជរដ្ឋាភិបាលកម្ពុជា ក្នុងការផ្តល់ហិរញ្ញប្បទានប្រកបដោយប្រសិទ្ធភាព និងចីរភាព ដើម្បីគាំទ្រសហគ្រាសធុនតូច និងមធ្យម សំដៅជំរុញពិពិធកម្ម សេដ្ឋកិច្ច និងការនាំចេញ ស្របតាមគោលនយោបាយដែលបានកំណត់ដោយរាជរដ្ឋាភិបាលកម្ពុជា។

ទោះជាយ៉ាងនេះក្តី សហគ្រិននៅក្នុងវិស័យ SME ដែលខ្វះធនធានហិរញ្ញវត្ថុ គួរស្វែងពីគម្រោងហិរញ្ញប្បទានសហគ្រាសធុនតូច និងមធ្យមរបស់ធនាគារ SME ដើម្បីងាយស្រួលក្នុងការដាក់ស្នើ និងទទួលបានកម្ចី ក្នុងការពង្រីកអាជីវកម្ម ឬប្រើប្រាស់ ដើម្បីបម្រើឱ្យគោលបំណងអាជីវកម្មរបស់ខ្លួនឱ្យកាន់តែមានភាពល្អប្រសើរ។

គម្រោងហិរញ្ញប្បទានសហគ្រាសធុនតូច និងមធ្យមនេះ ត្រូវបានអភិវឌ្ឍន៍ឡើងក្នុងគោលបំណងផ្តល់ការគាំទ្រដល់ម្ចាស់សហគ្រាសធុនតូច និងមធ្យមទូទៅនៅក្នុងព្រះរាជាណាចក្រកម្ពុជា តាមរយៈគម្រោងហិរញ្ញប្បទានដែលមានលក្ខខណ្ឌអនុគ្រោះ និងអត្រាការប្រាក់់ទាប។ សហគ្រិនទូទៅអាចប្រើប្រាស់គម្រោងហិរញ្ញប្បទានខាងលើ ដើម្បីយកទៅពង្រីកអាជីវកម្ម ឬដំណើរការអាជីវកម្មថ្មី។

លក្ខណៈពិសេសរបស់គម្រោងនេះ មានដូចខាងក្រោម ៖

• ទំហំហិរញ្ញប្បទាន : រហូតដល់ ៤,០០០ លានរៀល ឬ ១,០០០,០០០ ដុល្លារអាមេរិក
• គោលបំណង : ប្រើប្រាស់ជាទុនបង្វិល ឬទុនវិនិយោគ
• រយៈពេលហិរញ្ញប្បទាន : រហូតដល់ ៧ឆ្នាំ សម្រាប់ទុនបង្វិល ឬ ១០ឆ្នាំ សម្រាប់ទុនវិនិយោគ
• រូបិយប័ណ្ណ : ប្រាក់រៀល និងដុល្លារអាមេរិក
• អត្រាការប្រាក់ : ចាប់ពី ៥.៨៨% ក្នុងមួយឆ្នាំ
• ទ្រព្យធានា : ទំហំហិរញ្ញប្បទានរហូតដល់ ៧០% នៃតម្លៃទ្រព្យធានាសម្រាប់ប្លង់ទន់ ឬ ៨០% នៃតម្លៃទ្រព្យធានាជាប្លង់រឹង

ឯកសារតម្រូវមានដូចជា ឯកសារបញ្ជាក់អត្តសញ្ញាណភាគីអ្នកខ្ចី ឬអ្នករួមខ្ចី រួមមានអត្តសញ្ញាណប័ណ្ណ ឬលិខិតឆ្លងដែន ឬ លិខិតដែលមានតម្លៃស្មើ -ឯកសារបញ្ជាក់កម្មសិទ្ធទ្រព្យធានា -ឯកសារអាជីវកម្ម រួមមាន អាជ្ញាប័ណ្ណអាជីវកម្ម ប័ណ្ណប៉ាតង់ ឬវិញ្ញាបនបត្រចុះបញ្ជី (ប្រសិនបើមាន) -ឯកសារបញ្ជាក់ចំណូលចំណាយ (ប្រសិនបើមាន) -របាយការណ៍ហិរញ្ញវត្ថុ (ប្រសិនបើមាន) -របាយការណ៍ធនាគារ (ប្រសិនបើមាន) ឬ -ឯកសារផ្សេងៗទៀត អាស្រ័យទៅតាមប្រភេទអាជីវកម្ម  (ប្រសិនបើមាន)។

លក្ខណៈវិនិច្ឆ័យ មានដូចជា -សហគ្រាសធុនតូច និងមធ្យម ដែលស្ថិតនៅក្នុងប្រទេសកម្ពុជា -សហគ្រាសធុនតូច និងមធ្យម ដែលមានម្ចាស់ភាគហ៊ុនជាជនជាតិខ្មែរយ៉ាងហោច ៥១% -សហគ្រាសធុនតូច និងមធ្យម ដែលស្ថិតក្នុងវិស័យអាទិភាព និងបានចុះបញ្ជីអាជីវកម្មត្រូវបានលើកទឹកចិត្ត និង-តម្រូវការមានទ្រព្យធានាដូចជា ដី ឬអាគារ។ អត្ថប្រយោជន៍ មានដូចជា -ផ្តល់ជូននូវអត្រាការប្រាក់ដែលមានភាពប្រកួតប្រជែង -គម្រោងហិរញ្ញប្បទានដែលមានរយៈពេលវែង -តម្រូវការទ្រព្យធានាសមស្រប -បង្កើនប្រសិទ្ធភាព និងផលិតភាពអាជីវកម្ម៕