ភ្នំពេញ ៖ ធនាគារជាតិនៃកម្ពុជា បានអំពាវនាវដល់ប្រជាពលរដ្ឋឱ្យប្រុងប្រយ័ត្នខ្ពស់ចពោះកម្ចីក្រៅផ្លូវការ និងការដាក់លុយវិនិយោគដើម្បីទទួលបានការប្រាក់ខ្ពស់ ដើម្បីកុំឱ្យធ្លាក់ចូលក្នុងអន្ទាក់បំណុល និងការបោកប្រាស់ពីសំណាក់ជនខិលខូច។

ថ្លែងក្នុងសន្និសីទសារព័ត៍មានមួយកាលពីល្ងាចថ្ងៃទី៨ ខែតុលា ឆ្នាំ២០២៤ នៅសណ្ឋាគារហាយ៉ាត លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានលើកឡើងថា បច្ចុប្បន្ននេះគេសង្កេតឃើញថា ការដាក់លុយវិនិយោគ និងបញ្ហាឥណទានតាមគ្រុបតេឡេក្រាម តាមហ្វេសប៊ុក បញ្ហាឥណទានដែលអត់ទីតាំងច្បាស់លាស់ ជាពិសេសឥណទានដែលបិតនៅដើមឈើកំពុងមានសកម្មភាពគួរឱ្យកត់សម្គាល់ ដូច្នេះហើយសូមប្រជាពលរដ្ឋត្រូវមានការប្រុងប្រយ័ត្នឱ្យខ្ពស់បំផុត។

លោកជំទាវ បានថ្លែងបន្តថា ៖

«ករណីទាក់ទងនឹងកម្ចីក្រៅផ្លូវការ កម្ចី ៣០០ ដុល្លារ ត្រូវបង់ការប្រាក់ ៤០ ដុល្លារក្នុងមួយថ្ងៃ ហើយបើចង់បង់ផ្តាច់ លុះត្រាមាន ៣០០ ដុល្លារ។ បើគ្មាន ៣០០ ដុល្លារទេ ត្រូវបង់ ៤០ ដុល្លារ រៀលរាល់ថ្ងៃ ហើយបើអត់សង​ គេនឹងមានវិធានការណ៍។ ដូច្នេះ ប្រជាជពលរដ្ឋ គួរងាកប្រើប្រាស់កម្ចីផ្លូវការពីធនាគារ និងគ្រឹះស្ថានមីក្រូហិរញ្ញវត្ថុ ដែលមានអាជ្ញាបណ្ណពីធនាគារជាតិនៃកម្ពុជា ប្រសិនបើមានតម្រូវការហិរញ្ញវត្ថុ ឬទុនច្បាស់លាស់ ព្រោះកម្ចីផ្លូវការពីធនាគារ និងគ្រឹះស្ថានមីក្រូហិរញ្ញវត្ថុ មានច្បាប់ការពារអតិថិជនត្រឹមត្រូវ និងសិក្សាច្បាស់លាស់ពីតម្រូវការហិរញ្ញវត្ថុរបស់អ្នកប្រើប្រាស់»។

លោកជំទាវបានលើកឡើងផងដែរថា កាលពីពេលថ្មីៗនេះ មានការសន្យាក្នុងការដាក់ប្រាក់ចំនួនតិចតូច ប៉ុន្តែទទួលបានការប្រាក់អត្រាខ្ពស់ហួសប្រមាណដូចជាករណីវិនិយោគ ៣០០ ដុល្លារ នឹងទទួលបាន ១៨០០ ដុល្លារ ​បន្ទាប់ពី ២៤ ម៉ោង, វិនិយោគ ៥០០ ដុល្លារ នឹងទទួលបាន ៣៥០០ ដុល្លារ បន្ទាប់ពី ២៤ ម៉ោង ហើយនៅមានកញ្ចប់ប្រូម៉ូសិន VIP វិនិយោគ ១០០០ ដុល្លារ នឹងទទួលបាន ៨៥០០ ដុល្លារ បន្ទាប់ពី ២៤ ម៉ោង ដោយវិធីសាស្ត្រទូទាត់ត្រូវធ្វើឡើងតាមធនាគារ Wing អេស៊ីលីដា និង ABA ជាដើម។

លោក សុខ វឿន អនុប្រធានក្រុមប្រឹក្សាភិបាលសមាគមមីក្រូហិរញវត្ថុកម្ពុជា បានថ្លែងប្រាប់ថា កម្ចីឥណទានផ្លូវការពីធនាគារ និងគ្រឹះស្ថានមីក្រូហិរញ្ញវត្ថុ ដែលទទួលស្គាល់ដោយធនាគារជាតិនៃកម្ពុជា ត្រូវបានទទួលស្គាល់ជាប្រភពទុនសំខាន់សម្រាប់ការពង្រីកអាជីវកម្ម និងការបើកអាជីវកម្ម ។

លោកបានថ្លែងបន្តថា ការប្រើប្រាស់ឥណទានក្រៅផ្លូវការត្រូវបានមើលឃើញថា មានហានិភ័យខ្ពស់ ដោយអត្រាការប្រាក់ខ្ពស់ និងអាចរុញច្រានឱ្យអ្នកប្រើប្រាស់ឥណទានក្រៅផ្លូវការជាប់នូវបំណុលលើសលប់។ កន្លងមកនេះធ្លាប់មានការត្អួញត្អែរមួយចំនួនថា ការទទួលបានឥណទានផ្លូវធនាគារ និងគ្រឹះស្ថានហិរញវត្ថុគឺមានភាពស្មុគស្មាញ និងនីតិវិធីច្រើន ដែលធ្វើឱ្យប្រជាជនមួយចំនួនងាកទៅខ្ចីបុលពីឯកជនជាជាងប្រើប្រាស់កម្ចីផ្លូវការពីស្ថាប័នធនាគារ និងគ្រឹះស្ថានមីក្រូហិរញ្ញវត្ថុជាដើម។ តែយ៉ាងក៏ដោយ នីតិវិធីខ្លះ គឺជាច្បាប់ដែលតម្រូវឱ្យធនាគារ និងគ្រឹះស្ថានមីក្រូហិរញ្ញវត្ថុអនុវត្តន៍។ ឧទាហរណ៍ ការពិនិត្យលើប្រវត្តិឥណទានអតិថិជន ការកំណត់អត្តសញ្ញាណរបស់អតិថិជនឱ្យបានច្បាស់លាស់ និងលក្ខខណ្ឌកម្ចី ដែលទាំងនេះគឺច្បាប់តម្រូវ។

យ៉ាងណាក៏ដោយ ប្រតិបត្តិករហិរញ្ញវត្ថុនៅតែលើកទឹកចិត្តដល់អ្នកដែលមានបំណងប្រើប្រាស់កម្ចី គួរប្រើប្រាស់កម្ចីគ្រឹះស្ថានហិរញ្ញវត្ថុផ្លូវការ ទោះបីមាននីតិវិធីច្រើនក្នុងការពិនិត្យ និងវាយតម្លៃមុននឹងផ្តល់កម្ចីក្តី ព្រោះក្រោមហេតុផលថា នីតិវិធី និងលក្ខខណ្ឌដែលតម្រូវដោយគ្រឹះស្ថានហិរញ្ញវត្ថុផ្លូវការ នឹងធានាដល់ការប្រើប្រាស់ឥណទាន ឬកម្ចីរបស់អតិថិជនបានជោគជ័យ និងចំគោលដៅ។ ផ្ទុយទៅវិញ ការប្រើប្រាស់កម្ចីក្រៅផ្លូវការបង្កផលប៉ះផលអវិជ្ជមានជាច្រើនដល់អ្នកប្រើប្រាស់ ដូចជា អត្រាថ្លៃ ការគំរាមកំហែងទាមទារប្រាក់ ដែលឈានដល់ការប្រើប្រាស់អំពើហឹង្សា បរិហាកេរ្តិ៍តាមរយៈបណ្តាញសង្គម ហើយនឹងឈានដល់មានករណីធ្វើអត្តឃាតទៀតផង៕