ភ្នំពេញ ៖ ផ្ទះសំណាញ់ ត្រូវបានគេអនុវត្តជាទូទៅលើវិស័យកសិកម្ម ជាពិសេសការដាំបន្លែដែលអាចផ្ដល់ទន្និផលខ្ពស់ ដោយសារវាអាចការពារឥទ្ធិពលកាំរស្មីពន្លឺព្រះអាទិត្យ បម្រែបម្រួលអាកាសធាតុ ខ្យល់ តំណក់ទឹកភ្លៀង សត្វល្អិត និងភ្នាក់ងារចម្លងជំងឺតាមបរិយាកាសផងដែរ។

ដើម្បីដាំបន្លែក្នុងផ្ទះសំណាញ់បាន ជាដំបូងគេត្រូវតម្លើងផ្ទះសំណាញ់ដោយត្រូវជ្រើសរើសទីតាំងឱ្យបានល្អ ជាដីដែលអាចដាំបានពេញមួយឆ្នាំ គ្មានភាពកខ្វក់ពីគីមីសាស្ត្រ ជីវសាស្ត្រ និងរូបសាស្ត្រ ពិសេសគឺមានប្រភពទឹកសម្រាប់ស្រោចស្រពគ្រប់គ្រាន់។ ឯការសាងសង់ផ្ទះសំណាញ់ គឺធ្វើឡើងទៅតាមប្លង់ ដែលបានគ្រោងទុកអាចសង់ពី ដែក ជ័រ ឈើ ឬឫស្សី។ ហើយសម្ភារបន្ទាប់បន្សំក្នុងការសាងសង់រួមមាន ខ្សែចំណង ដែកគោល ក្លិប គ្រាប់កឹប ស៊ីម៉ងត៍ សំណាញ់ក្រឡាល្អិត ប្លាស្ទិកធន់ និងវីសជាដើម។ ដោយឡែក ប្រភេទផ្ទះសំណាញ់ភាគច្រើនមានសណ្ឋានខ្ពស់ស្រឡះ មានចរន្តខ្យល់ចេញចូល មានដំបូលការពារភ្លៀង ដែលអាចប្រើបានទាំងរដូវប្រាំង និងរដូវវស្សា។ ក្រៅពីនេះ យើងក៏ត្រូវត្រួតពិនិត្យផ្ទះសំណាញ់ និងជួសជុលជាប្រចាំ ជៀសវាងសត្វល្អិតអាចចូលទៅបំផ្លាញដំណាំបាន។

បន្ទាប់ពីសាងសង់ផ្ទះសំណាញ់រួចរាល់ហើយ អ្វីដែលយើងត្រូវធ្វើគឺការជ្រើសរើសពូជសម្រាប់ដាំ ត្រូវរើសពូជណាដែលធន់នឹងអាកាសធាតុជំងឺ និងសត្វល្អិត ដំណាំមានទីផ្សារខ្ពស់ និងជាដំណាំដែលពិបាកដាំតាមវាលចម្ការ។ សម្រាប់គ្រួសារដំណាំដែលសមស្របដាំនៅក្នុងផ្ទះសំណាញ់គឺក្រុមដាំណាំដែលមានកញ្ចុំផ្កាគេសរញី និងកេសរឈ្មោលនៅជាមួយគ្នា ពោលគឺមិនត្រូវការភ្នាក់ងារចម្លងលំអងដូចជា ឃ្មុំ ឬសត្វល្អិតនោះទេ។

ចំពោះការស្រោចស្រព កសិករអាចជ្រើសយកប្រព័ន្ធឌ្រីបដែមានលក្ខណៈសមស្រប និងមានប្រសិទ្ធភាព ព្រោះប្រព័ន្ធនេះមិនចម្លងជំងឺផ្សិត ស្រោចចំគោលដៅ និងងាយស្រួលដាក់ជី។ មួយវិញទៀត ប្រព័ន្ធនេះក៏ងាយស្រួលសម្រាប់កសិករជាស្ត្រីដោយចំណេញពេលពេលក្នុងការគ្រប់គ្រង និងថែទាំដំណាំ។ ការគ្រប់គ្រងសត្វល្អិតចង្រៃក៏លើបន្លែក៏ជាកត្តាមួយសំខាន់ផងដែរ ដែលពពួកសត្វបំផ្លាញទាំងនោះរួមមាន ពួកចៃ ពួករុយស ដង្កូវយោលទោង ពួកដង្កូវចោះផ្លែនិងដើម រុយទិចផ្លែ ជាដើម ដែលសុទ្ធសឹងជាពពួលបំផ្លាញ និងបង្កផលមិនល្អដល់ផ្នែកផ្សេងនៃដំណាំតាំងពីដើម ស្លឹក ផ្កា និងផ្លែ។

ចំពោះជំងឺសំខាន់ៗដែលអាចមានលើបន្លែមានដូចជា ជំងឺបង្កដោយមេរោគផ្សិត ជំងឺបង្កដោយបាក់តេរី ជំងឺបង្កដោយវីរុស ដែលយើងក៏អាចការពារដោយការដាំពូជដំណាំដែលធន់នឹងជំងឺ ដាំដំណាំឆ្លាស់ លើករង និងការសម្អាតចំការ សម្អាតស្មៅជាដើម។ ក្រៅពីនេះក៏មានវិធានការជីវសាស្ត្រ និងវិធានការគីមីដោយប្រើប្រាស់សារធាតុផ្សេងៗ និងអនុវត្តតាមការណែនាំនៅលើស្លាកផលិតផលផ្ទាល់ផងដែរ។ ដោយឡែកពេលប្រមូលផលរួច កសិករត្រូវសម្អាតចំការដើម្បីចម្ចាត់ជម្រកសត្វល្អិតចង្រៃ និងជំងឺដែលសល់ពីរដូវមុន ជៀសវាងកុំឱ្យកត្តាទាំងនេះអាចវិវឌ្ឍន៍និងបំផ្លាញបន្លែរបស់យើងបន្តទៀត៕