សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
EuroCham ប្រចាំកម្ពុជា បានចេញផ្សាយនូវរបាយការណ៍ Business Pulse H1 2025 របស់ខ្លួនកាលពីពាក់កណ្តាលខែវិច្ឆិកាកន្លងទៅ ដោយបានរៀបរាប់លម្អិតអំពីស្ថានភាពនៃអាជីវកម្មនៅគ្រប់វិស័យសំខាន់ៗរបស់កម្ពុជា និងបានធ្វើការសន្និដ្ឋានថា បរិយាកាសទូទៅនៃអាជីវកម្ម ថ្វីត្បិតតែជួបភាពលំបាកនៅដើមឆ្នាំ២០២៥ក៏ពិតមែន ប៉ុន្តែសកម្មភាពជាក់ស្តែងនៃអាជីវកម្មស្ទើរទូទាំងប្រទេស នៅតែអាចរក្សាបាននូវភាពសុទិដ្ឋិនិយម និងប្រកបដោយការប្រុងប្រយ័ត្នខ្ពស់ ។
យោងតាមការស្ទង់មតិពីម្ចាស់អាជីវកម្មមួយចំនួនបានបង្ហាញឱ្យឃើញពីឧបសគ្គ និងភាពប្រឈមសំខាន់ៗចំនួន២ រួមមាន បញ្ហាជម្លោះព្រំដែនថៃ-កម្ពុជា បានរំខានដល់ខ្សែសង្វាក់ផ្គត់ផ្គង់សម្រាប់អាជីវកម្មស្ទើរប្រមាណ ៤០ភាគរយ ហើយទី២ គឺអត្រាពន្ធគយរបស់សហរដ្ឋអាម៉េរិក ដែលកំពុងកើតមានសម្ពាធថ្លៃដើមកើនឡើងសម្រាប់អ្នកនាំចេញ និងការពន្យាពេលក្នុងការសម្រេចចិត្តធ្វើវិនិយោគថ្មីៗបន្ថែម។ សម្រាប់ប្រាក់ចំណូលបានធ្លាក់ចុះនៅក្នុងវិស័យភាគច្រើន ជាពិសេសអចលនទ្រព្យ សំណង់ និងសេវាកម្មផ្សេងទៀត។ ទោះជាយ៉ាងណាក្តី វិស័យសេវាកម្មហិរញ្ញវត្ថុ និងផលិតផលប្រើប្រាស់នៅតែបន្តមានតម្រូវការ ហើយមានទំនុកចិត្តថា នៅតែអាចមានស្ថិរភាព។ អ្វីដែលជាការកត់សម្គាល់ របាយការណ៍បានបង្ហាញថា កេរ្តិ៍ឈ្មោះរបស់ប្រទេសកម្ពុជានៅក្នុងគោលដៅវិនិយោគមានការកើនឡើងបន្តិចបន្តួច ដោយសារតែវិនិយោគិនបរទេសមួយចំនួននៅតែមានភាពស្ទាក់ស្ទើរក្នុងការសម្រេចចិត្តចូលទីផ្សារ។
នាយកប្រតិបត្តិ EuroCham លោក Martin Brisson បានធ្វើការកត់សំគាល់ថា៖ ការស្ទង់មតិតាមរយៈរបាយការណ៍ Business Pulse គឺមានសារៈសំខាន់ណាស់សម្រាប់ការផ្តល់ជាទិន្នន័យទីផ្សារថ្មីៗដោយផ្ទាល់លើការអនុវត្ត ការព្យាករណ៍ និងផលប៉ះពាល់នៃបញ្ហា ដូចជា ការរំខានពីបញ្ហាព្រំដែនថៃ-កម្ពុជា និងពន្ធគយរបស់សហរដ្ឋអាម៉េរិក ដែលជួយដល់អ្នកធ្វើគោលនយោបាយក្នុងវិស័យរដ្ឋ និងវិស័យឯកជន អាចធ្វើការសម្រេចចិត្តដោយពឹងផ្អែកទៅលើព័ត៌មានលម្អិតទាំងនេះ។
នៅក្នុងវិស័យសេវាកម្មហិរញ្ញវត្ថុ ប្រាក់កម្ចីដែលមិនទាន់បានសងកើនឡើងត្រឹមតែ ២,៩ភាគរយប៉ុណ្ណោះធៀបទៅនឹងឆ្នាំមុន ប៉ុន្តែប្រាក់បញ្ញើបានកើនឡើងខ្លាំងជាងឆ្នាំមុន ដោយកើនប្រមាណ ១៤,៥ភាគរយ។ ដោយឡែក សម្រាប់អត្រានៃប្រាក់កម្ចីមិនដំណើរការ ឬ NPL របស់ប្រព័ន្ធធនាគារទាំងមូល បានកើនឡើងច្រើនជាង ៨,៣ភាគរយ ធៀបនឹងឆ្នាំ២០២៤ ដែលមានត្រឹមតែ ៧,៤ភាគរយ។
លោក Nicolas Hollanders នាយកប្រតិបត្តិនៃធនាគារ BRED កម្ពុជា បានចូលរួមបញ្ចេញមតិទៅលើទស្សនវិស័យរបស់វិស័យហិរញ្ញវត្ថុនេះថា ៖ ស្ថានភាពសាច់ប្រាក់ និងដើមទុននៅតែមានភាពរឹងមាំ ប៉ុន្តែហានិភ័យឥណទានកំពុងកើនឡើង ខណៈដែលតម្រូវការធ្លាក់ចុះ។
ដោយឡែក សម្រាប់វិស័យទេសចរណ៍ និងបដិសណ្ឋារកិច្ច បានបង្ហាញពីភាពល្អប្រសើរឡើងវិញ ជាមួយការទទួលបានកំណើនទេសចរអន្តរជាតិប្រហែល ៦,២ភាគរយធៀបនឹងឆ្នាំមុន។ អាកាសយានដ្ឋានអន្តរជាតិតេជោ ដែលទើបតែដាក់ឲ្យដំណើរការនៅត្រីមាសទី៣ នៃឆ្នាំ២០២៥នេះ រំពឹងថានឹងក្លាយជាកម្លាំងចលករដ៏ទាក់ទាញ និងមានប្រសិទ្ធភាពខ្ពស់ ។ ចុងក្រោយគេ គឺវិស័យកសិកម្ម និងកែច្នៃម្ហូបអាហារ បានបង្ហាញពីការនាំចេញដ៏រឹងមាំជាមួយនឹងកំណើនប្រមាណ ២៧ភាគរយ បើធៀបនឹងឆ្នាំមុន ឬប្រមាណជា ២,៨៧ ពាន់លានដុល្លារ ដែលភាគច្រើនជំរុញដោយដំណាំមិនមែនស្រូវ។ គួរឲ្យដឹងដែរថា របាយការណ៍ Business Pulse H1 2025 ក៏មានផ្តល់នូវការវិភាគ និងព្យាករណ៍អំពីអនាគត ទៅលើអាទិភាពនៃអាជីវកម្ម សម្ពាធថ្លៃដើម និងទំនុកចិត្តនៃសកម្មភាពវិនិយោគផងដែរ ដើម្បីអាចជាគន្លឹះ និងជួយសម្រួលដល់អ្នកវិនិយោគក្នុងវវិស័យឯកជន និងអ្នកធ្វើគោលនយោបាយក្នុងវិស័យរដ្ឋផងដែរ៕
Account
Security
Favourite Content