ភ្នំពេញ ៖ ការ​មាន​គ្រួសារ និង​ចិញ្ចឹម​កូនប្រុស-ស្រី គឺត្រូវចំណាយប្រាក់ច្រើនណាស់ រាប់ចាប់តាំងពីការថែទាំចំណីអាហារ សម្លៀកបំពាក់ ការអប់រំ លំនៅឋាន ជាដើម ហើយនៅមានការចំណាយជាច្រើនផ្សេងទៀតដែលមិនទាន់ត្រូវបានរាប់បញ្ចូល ពោលគឺត្រូវចំណាយខ្ពស់ជាងការរស់នៅតែម្នាក់ឯង។

អ្នកត្រូវក្រឡេកមើលការចំណាយរបស់គ្រួសារអ្នក និងស្វែងរកអ្វីដែលត្រូវកំណត់រឿងអាទិភាពអាចជួយអ្នកឱ្យចំណាយតិច និងសន្សំប្រាក់ឱ្យបានកាន់តែច្រើនសម្រាប់គ្រាអាសន្នណាមួយ។ ខាងក្រោមនេះ គឺជាយុទ្ធសាស្ត្រដែលអាចជួយគ្រប់គ្រងការចំណាយរបស់គ្រួសារអ្នកបាន ហើយអ្នកអាចនឹងមានប្រព័ន្ធហិរញ្ញវត្ថុកាន់តែរឹងមាំក្នុងរយៈពេលវែង។

១. ប្រើអ្វីដែលអ្នកមានស្រាប់ ហើយទិញតែអ្វីដែលអ្នកចាំបាច់ប្រើ

មិនថា វាជាម្ហូបអាហារ សម្លៀកបំពាក់ ឬរបស់របរផ្សេងៗទៀតដែលគ្រួសារអ្នកត្រូវការនោះទេ ចូរអ្នកព្យាយាមប្រើប្រាស់របស់របរនៅផ្ទះដែលមានស្រាប់ ដូច្នេះអ្នកមិនខ្ជះខ្ជាយលុយទិញរបស់ដែលអ្នកមានស្រាប់នោះទៀតទេ។ រៀបចំផ្ទះរបស់អ្នក ហើយរៀបចំទុកដោយឡែកនូវរ​បស់ដែលគ្រួសាររបស់អ្នកត្រូវការប្រើប្រាស់ និងមិនប្រើប្រាស់។

ព្យាយាមទិញតែរបស់របរដែលគ្រួសារអ្នកត្រូវការដើម្បីកាត់បន្ថយការចំណាយរបស់អ្នក។ សូមសសេរចំណាំលើបញ្ជីរបស់របរដែលអ្នកចង់បាន ប្រៀធៀបនឹងរបស់របរដែលអ្នកត្រូវការ ហើយត្រូវមានភាពប្រាកដប្រជាជាមួយនឹងបញ្ជីរបស់អ្នក។ ក្នុងន័យនេះ ដើម្បីកាត់បន្ថយការចំណាយ អ្នកត្រូវទិញរបស់ណាដែលត្រូវការប្រើប្រាស់ជាចាំបាច់ ជាជាងរបស់អ្នកចង់បាន ដែលបង្កើនដល់ការចំណាយ។

២. រៀបចំម្ហូបអាហារដោយខ្លួនឯង

តម្លៃម្ហូបអាហារជាធម្មតាគឺជាចំណែកដ៏ធំមួយនៃចំណាយថវិកាគ្រួសារ។ ការរៀបចំអាហារដោយខ្លួនឯងអាចជួយអ្នកសន្សំប្រាក់បាន។ អ្នកអាចពិនិត្យមើលមុខម្ហូបឱ្យហើយ មុននឹងទៅទិញនៅផ្សារ ហើយរៀបចំផែនការមុខម្ហូបប្រចាំសប្តាហ៍ខាងមុខ។ ការរៀបចំអាហារសម្រាប់អាហារថ្ងៃត្រង់របស់កូនអ្នក ឬអាហារពេលល្ងាចជាលក្ខណៈគ្រួសារនឹងជួយឱ្យអ្នកមិនទៅហូបអាហារនៅខាងក្រៅ ហើយនឹងជួយសន្សំសំចៃពេលវេលាទៀតផង។

៣. កាត់បន្ថយការចំណាយប្រចាំថ្ងៃដែលមិនចាំបាច់

ការចំណាយប្រចាំថ្ងៃតូចតាចអាចហាក់ដូចជាមិនជារឿងធំដុំនោះទេអំឡុងពេលចាយវាយរបស់របរអ្វីមួយដែលមានតម្លៃថោកៗ ប៉ុន្តែបើគិតជាខែវិញ វាធ្វើឱ្យមានផលប៉ះពាល់យ៉ាងខ្លាំងដល់កាបូបរបស់អ្នក។ ឧទាហរណ៍ គិតពីម្ហូបអាហារ ឬកាហ្វេ ចំណីសម្រាប់កូនៗ និងអាហារខ្ចប់ ឬរបស់របរកំប៉ិកកំប៉ុកផ្សេងៗ ពួកយើងប្រហែលចំណាយខ្ទង់ ១០០ ដុល្លារ ឬច្រើនជាងនេះរៀងរាល់ខែលើការចំណាយតិចៗទាំងនេះ។ ទាំងនេះអាចបន្ថែមទៅលើការលេចធ្លាយការចំណាយដ៏ធ្ងន់ធ្ងរនៅក្នុងការរៀបចំថវិការបស់អ្នក ហើយអាចជាបំពង់បង្ហូរលុយយ៉ាងធំលើហិរញ្ញវត្ថុរបស់អ្នក ជាពិសេសនៅពេលដែលអ្នកកំពុងប្រើប្រាស់ប្រាក់ដោយប្រើប័ណ្ណឥណពន្ធ។

៤. ប្រសិនបើអ្នកមានផ្ទះផ្ទាល់ខ្លួន សូមព្យាយាមសន្សំឱ្យបានច្រើន

ប្រសិនបើអ្នកមានផ្ទះផ្ទាល់ខ្លួន អ្នកអាចសន្សំបានច្រើនក្នុងរយៈពេលវែងពីការដកចេញថ្លៃជួល។ បើជាប់កម្ចីទិញផ្ទះ អ្នកគួរសងឱ្យបានឆាប់ ហើយអ្នកអាចសន្សំបានរាប់ម៉ឺនដុល្លារពីការប្រាក់ទិញផ្ទះនេះ។ អ្នកជំនាញណែនាំឱ្យប្រើម៉ាស៊ីនគណនាប្រាក់កម្ចី ដើម្បីស្វែងយល់ថា តើអ្នកនឹងសន្សំបានប៉ុន្មាន ដោយផ្អែកលើចំនួនកម្ចីទិញផ្ទះ និងការទូទាត់បច្ចុប្បន្នរបស់អ្នក។ ស្វែងរកការចំណាយណាមិនចាំបាច់ ដែលគ្រួសាររបស់អ្នកអាចកាត់បន្ថយថវិការបស់អ្នក ដើម្បីផ្តល់អាទិភាពដល់ការបង់សង់របស់អ្នកឱ្យលឿនជាងមុន។ អ្នកនឹងអរគុណខ្លួនឯងនាពេលអនាគត។

៥. ជំរុញឱ្យកូនរបស់អ្នកដឹងពីស្ថានភាពហិរញ្ញវត្ថុគ្រួសារ

ការជំរុញឱ្យកូនរបស់អ្នកចូលរួមក្នុងហិរញ្ញវត្ថុគ្រួសារ តែអាស្រ័យលើអាយុដែលកូនរបស់អ្នក ហើយណែនាំពួកគេឱ្យចូលរួមក្នុងកិច្ចការលុយកាក់ដែលសមស្របតាមអាយុ ដូចជាការសរសេរបញ្ជីគ្រឿងទេសដោយផ្អែកលើថវិកាគ្រួសាររបស់អ្នក ឬបង្ហាញពួកគេពីរបៀបដែលអ្នកបញ្ជាទិញទំនិញនានា។

នៅពេលដែលអ្នកធ្វើឱ្យគ្រួសារទាំងមូលរបស់អ្នកចូលរួមកាន់តែច្រើន ពួកគេនឹងយល់ពីរបៀបដែលអ្នកចំណាយ និងសន្សំជាលក្ខណៈគ្រួសារកាន់តែប្រសើរ។ វានឹងជួយកូនរបស់អ្នកបង្កើតទម្លាប់ល្អក្នុងការចាយវាយ និងរកលុយ ហើយនឹងជួយឱ្យអ្នក និងក្រុមគ្រួសាររបស់អ្នកយល់កាន់តែច្រើននៅពេលនិយាយពីការសន្សំប្រាក់៕