សេដ្ឋកិច្ច គឺជាឆ្អឺងខ្នងនៃប្រទេសនីមួយៗ ហើយវាត្រូវបានចូលរួមចំណែកដោយសកម្មភាពនៃពាណិជ្ជកម្ម និងសកម្មភាពនៃគ្រប់វិស័យផ្សេងទៀតដោយក្នុងនោះសូម្បីតែសហគ្រាសខ្នាតតូច និងមធ្យម ឬយើងហៅថា SMEs ទាំងនៅក្នុង និងក្រៅប្រព័ន្ធក្តីក៏សុទ្ធតែជាសរសៃឈាមយ៉ាងសំខាន់សម្រាប់សេដ្ឋកិច្ច។

អ្នកជំនាញសេដ្ឋកិច្ចពីថ្នាក់តំបន់រហូតទៅដល់ធនាគារពិភពលោកសុទ្ធតែបានទទួលស្គាល់អំពីសារៈសំខាន់នៃសហគ្រាសខ្នាតតូច និងមធ្យម SMEs (Small and Medium Enterprises) ចំពោះសេដ្ឋកិច្ចសកលលោក ជាពិសេសគឺសម្រាប់បណ្តាប្រទេសដែលកំពុងតែអភិវឌ្ឍ។

ក្នុងនាមជាវិស័យដែលមានការពាក់ព័ន្ធច្រើនជាងគេបំផុតជាមួយនឹងសកម្មភាពប្រចាំថ្ងៃរបស់ពលរដ្ឋ ភាគច្រើនវាបានដើរតួយ៉ាងសំខាន់ក្នុងការបង្កើតការងារច្រើនជាងគេបំផុតធៀបទៅនឹងអាជីវកម្ម និងក្រុមហ៊ុនធំៗទាំងឡាយ។ ជាក់ស្ដែង នៅក្នុងរបាយការណ៍របស់ធនាគារពិភពលោក World Bank បានបង្ហាញថា SMEs មានចំណែកដល់ទៅ៩០ភាគរយនៃអាជីវកម្មទាំងអស់របស់ពិភពលោក និងមានកម្លាំងធ្វើការងារក្នុងចំណែកដល់ទៅ៥០ភាគរយ។

គិតត្រឹមសហគ្រាសខ្នាតតូច និងមធ្យមក្នុងប្រព័ន្ធ ( Formal SMEs ) ធនាគារពិភពលោកបានអះអាងថា វាបានចូលរួមចំណែកដល់ចំណូលជាតិ ឬផលិតផលក្នុងស្រុកសរុបរបស់បណ្តាប្រទេសកំពុងអភិវឌ្ឍទាំងអស់ជាមធ្យមដល់ទៅ៤០ភាគរយ ហើយវាអាចនឹងមានទំហំច្រើនជាងនេះលើសលប់នៅតាមប្រទេសខ្លះ ខណៈដែលសហគ្រាសខ្នាតតូច និងមធ្យមនៅក្រៅប្រព័ន្ធ ( Informal SMEs) ត្រូវបានគេរាប់បញ្ចូល។

មានការព្យាករណ៍ថា នៅឆ្នាំ២០៣០ ពិភពលោកត្រូវការកម្លាំងពលកម្មថ្មីដល់ទៅ ៦០០លាននាក់ ហើយប្រកដណាស់ ចំណែកនៃសហគ្រាសខ្នាតតូច និងមធ្យមនឹងត្រូវបានកំណត់ថា ជាការងារអាទិភាពបំផុតសម្រាប់រដ្ឋាភិបាលមកពីជុំវិញពិភលោក។

ទោះបីជាយ៉ាងណាក្តី ការរីកចម្រើននៃវិស័យសហគ្រាសខ្នាតតូច និងមធ្យម ឬ SMEs តែងតែជួបប្រទះនូវបញ្ហាមួយចំនួនផងដែរនៅតាមតំបន់ និងប្រទេសនានាដែលក្នុងនោះកង្វះខាតដ៏សំខាន់បំផុតដើម្បីពង្រីកខ្លួនរបស់ SMEs គឺជាលទ្ធភាពក្នុងការទទួលបានហិរញ្ញវត្ថុនៅមានកម្រិតទាបនៅឡើយទាំងនៅប្រទេសអភិវឌ្ឍ ក៏ដូចជាប្រទេសកំពុងអភិវឌ្ឍផងដែរ។ ចំណុចនេះ ធនាគារពិភពលោក (World Bank) បានចង្អុលប្រាប់ច្បាស់ៗថា SMEs ត្រូវបានលើកទឹកចិត្ត និងមានឳកាសអាចទទួលបានកម្ចីងាយស្រួលជាងអាជីវកម្ម និងក្រុមហ៊ុនធំៗ ប៉ុន្តែភាគច្រើននៃម្ចាស់អាជីកម្មតែងតែនិយមជ្រើសយកវិធីសាស្ត្រក្នុងការស្វែងរកទុន និងហិរញ្ញវត្ថុក្រៅផ្លូវការដោយខ្លួនឯងទៅវិញ។

អ្វីដែលគួរឲ្យភ្ញាក់ផ្អើលមួយទៀតនោះត្រង់ថា IFC ( The International Finance Corporation) បានធ្វើការព្យាករណ៍ថា អាជីវកម្មខ្នាតតូចរហូតដល់ទៅប្រមាណ៦៥លាននៅតាមបណ្តាប្រទេសកំពុងអភិវឌ្ឍបានជួបភាពបរាជ័យក្នុងការស្នើសុំជំនួយ និងកម្ចីហិរញ្ញវត្ថុ ឬស្មើនឹងប្រមាណ ៥,២ទ្រីលានដុល្លារជារៀងរាល់ឆ្នាំ។

ទោះបីជាយ៉ាងណាក្តី World Bank ក៏បានរកឃើញដំណោះស្រាយ និងតែងតែព្យាយាមផ្សព្វផ្សាយបន្ថែមតាមរយៈដៃគូនៅតាមបណ្តាប្រទេសក្នុងការធ្វើឲ្យប្រសើរឡើងវិញនៃកំណើនអាជីវកម្មរបស់ SMEs ដែលក្នុងនោះមានដូចជា ការគាំទ្រដល់ការវាយតម្លៃផ្នែកហិរញ្ញវត្ថុ, ការគាំទ្រការអនុវត្តគំនិតផ្តួចផ្តើមថ្មី, ការកែលម្អហេដ្ឋារចនាសម្ព័ន្ធនៃការផ្តល់ឥណទាន, ការអភិវឌ្ឍថ្មីទៅលើការបង្កើតថ្មីក្នុងហិរញ្ញវត្ថុ សម្រាប់SME ក៏ដូចជាការរៀបចំព្រឹត្តិការណ៍ និងការជជែកពិភាក្សាទៅលើប្រធានបទហិរញ្ញវត្ថុសម្រាប់ SMEs នៅគ្រប់កម្រិតផងដែរ៕