ភ្នំពេញ ៖ ប្រមុខដឹករាជរដ្ឋាភិបាល សម្តេចតេជោ ហ៊ុន  សែន នាយករដ្ឋមន្ត្រីនៃកម្ពុជា បានបន្តអំពាវនាវដល់ប្រជាពលរដ្ឋកម្ពុជាគ្រប់រូបកុំស្លន់ស្លោពាក់ព័ន្ធការដួលរលំនៃធនាគារអាមេរិក ព្រោះវាមិនបង្កផលប៉ះពាល់ដល់កម្ពុជានោះទេ ខណៈអ្នកជំនាញក្នុងវិស័យហិរញ្ញវត្ថុបានលើកឡើងថា វិស័យធនាគារ និងមីក្រូហិរញ្ញវត្ថុមានការប្រុងប្រយ័ត្នខ្ពស់ណាស់ មិនអាចឈានដល់ករណីដូចសហរដ្ឋអាមេរិកនោះទេ។

ការអំពាវនាវរបស់សម្តេចតេជោ ត្រូវបានធ្វើឡើងអំឡុងពេលអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រជូនដល់និស្សិតនៃវិទ្យាស្ថានវ៉ាន់ដាចំនួន ៤ ៧០៥ នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រ នៅថ្ងៃទី២២ ខែមីនា ឆ្នាំ២០២៣។

សម្តេចតេជោ ហ៊ុន  សែន បានប្រកាសដល់ប្រជាពលរដ្ឋកម្ពុជាគ្រប់រូប សូមកុំស្លន់ស្លោពាក់ព័ន្ធការដួលរលំនៃធនាគារអាមេរិក។ ធនាគារអាមេរិកមានរាប់រយធនាគារ ដូច្នេះកុំទៅភ័យដែលគ្រាន់តែធនាគាររបស់អាមេរិកចំនួន ២​មានការដួលរលំនោះ កុំឃើញធនាគារនៅអាម៉េរិកប៉ុន្មានដួលរលំ បែរជានាំគ្នាទៅដកប្រាក់នៅធនាគារក្នុងស្រុក ដែលអាចនាំឱ្យធនាគារក្នុងស្រុកខ្លួនឯងដួលរលំនោះទេ។

គួរបញ្ជាក់ផងដែរថា កាលពីពេលថ្មីៗនេះ ធនាគារធំៗចំនួន ៣ នៅអាមេរិកបានប្រកាសពីការដួលរលំរបស់ខ្លួនជាបន្តបន្ទាប់ រាប់ចាប់ពីថ្ងៃទី១០ ខែមីនា ឆ្នាំ២០២៣នេះ រួមមានធនាគារ Signature ធនាគារ Silvergate និងធនាគារ SVB(Silicon Valley Bank។ រឿងដ៏គួរឲ្យបារម្ភចំពោះសេដ្ឋកិច្ចនោះគឺ ធនាគារទាំងពីរនេះជាស្ថាប័នផ្ដល់សេវាកម្មពាក់ព័ន្ធនឹងវិស័យធុរកិច្ចថ្មី(tech startups) និងវិស័យគ្រីបតូ ឬរូបិយប័ណ្ណអេឡិចត្រូនិក។

លោក កាំង តុង​ងី ប្រធាន​នាយក​ដ្ឋាន​ទំនាក់​ទំនង​នៃ​សមាគម​​មីក្រូ​ហរិញ្ញវត្ថុ បានថ្លែងប្រាប់ AMS ថា សហរដ្ឋអាមេរិកមានការឆ្លើយតបវិជ្ជមានទាក់ទងនឹងការធានាលើប្រាក់បញ្ញើរបស់អតិថិជន ហើយអ្វីដែលជាការកត់សម្គាល់គឺថា ធនាគារទាំង៣ ដែលបានប្រកាសក្ស័យធន គឺភាគច្រើនមានប្រតិបត្តិការពាណិជ្ជកម្មពាក់ព័ន្ធទៅនឹង Cryptocurrency រួមទាំងការវិនិយោគលើក្រុមហ៊ុនបច្ចេកវិទ្យា ដែលរយៈ​ពីរឆ្នាំចុងក្រោយនេះ ទាំង Cryptocurrency ទាំងភាគហ៊ុនរបស់ក្រុមហ៊ុនបច្ចេកវិទ្យា មានការដាំក្បាលចុះខ្លាំង គួបផ្សំជាមួយនឹងការដំឡើងអត្រាការប្រាក់របស់ធនាគារកណ្តាលអាមេរិក ដែលបង្កើតជាបញ្ហាគនលើគ្នា ដូច្នេះវាបង្កើតជាបញ្ហាដែលបានកើតឡើងនេះ។

លោក កាំង តុងងី បានថ្លែងថា ៖

“យ៉ាងណាក្តី នៅកម្ពុជាយើង វិស័យមីក្រូហិរញ្ញវត្ថុ កំពុងតែតាមដានដោយយកចិត្តទុកដាក់លើបញ្ហានេះ ហើយយើងកំពុងរៀបចំការប្រុងប្រយ័ត្ន បង្កើតសេណារីយ៉ោផ្សេងៗគ្នាដើម្បីការពារ ប្រសិនបើករណីផលប៉ះពាល់រីករាលដាលមកដល់កម្ពុជាយើង។​ តែយ៉ាងណាក្តី ក្នុងដំណាក់កាលនេះ វានៅក្នុងដំណាក់កាលដែលលឿន ដែលយើងមិនទាន់អាចធ្វើការវាយតម្លៃបានថា តើវាមានផលប៉ះពាល់ប៉ុណ្ណា ហើយប្រហែលជាយើងមិនទាន់អាចវាយតម្លៃបាននោះទេ”

លោកបានថ្លែងបន្តថា ជាធម្មតា វិស័យធនាគារ និងមីក្រូហិរញ្ញវត្ថុ តែងតែមានវិធានការប្រុងប្រយ័ត្នជានិច្ច នៅពេលមានផលវិបាកកើតឡើង ហើយយើងតែងតែរៀបចំសេណារីយ៉ោការពារទុកថា ប្រសិនបើមានបញ្ហាណាមួយកើតឡើង យើងត្រូវដោះស្រាយតាមវិធីណា។ នៅតាមគ្រឹះស្ថាននីមួយៗ តែងតែធ្វើស្ថិតិ និងពិនិត្យលើសុខមាភាពគ្រឹះស្ថានរបស់ខ្លួនជាប្រចាំ ដើម្បីការពារហានិភ័យផ្សេងៗដែលអាចកើតឡើង។ ជារួម យើងមិនទាន់អាចវាយតម្លៃបានទេ តែយើងប្រុងប្រយ័ត្ន និងត្រៀមខ្លួនជានិច្ចដើម្បីទប់ទាល់នៅពេលដែលបញ្ហាណាមួយកើតមានឡើង។ លោក កាំង តុងងី បានលើកឡើងដូច្នេះថា ៖

“ចំពោះថា ធនាគារនៅស្រុកខ្មែរដួលរលំនោះ វាមិនអាចទៅរួចនោះទេ ព្រោះនៅកម្ពុជា វិស័យធនាគារ និងមីក្រូហិរញ្ញវត្ថុមានការប្រុងប្រយ័ត្នខ្ពស់ណាស់​ ហើយមួយវិញទៀត មិនមានធនាគារនៅស្រុកយើងធ្វើការវិនិយោគនោះទេ តែដូចនៅសហរដ្ឋអាមេរិក គេមានធនាគារវិនិយោគ (Investment Bank) ដូច្នេះលុយដែលបានមកពីប្រាក់បញ្ញើរបស់អតិថិជនគឺធនាគារយកទៅវិនិយោគ (មានហានិភ័យ)។ ប៉ុន្តែនៅស្រុកខ្មែរ លុយដែលដាក់ជាបញ្ញើគឺប្រើប្រាស់ទៅលើកម្ចី ដោយមិនប្រើប្រាស់លើការវិនិយោគផ្តេសផ្តាស់នោះទេ ដូច្នេះបញ្ហាដួលរលំមិនអាចកើតឡើងនោះទេ៕”